قازاق دالاسىنا بويلاي ەنگەن بۇل رۋح 27 جىل بويىنا تەك ورلەۋمەن كەلەدى. وسىناۋ سالتاناتتى مەرەكەگە ارنالعان ءىس-شارا بارىسىندا ءسوز العان نۇر-سۇلتان قالاسى اكىمىنىڭ ورىنباسارى ەرلان قاناليموۆ بۇل ماسەلەلەرگە ايرىقشا توقتالدى.
– رامىزدەر حالقىمىزدىڭ مۇقالماس رۋحىن, قاھارماندىعىن, ارمان-تىلەگىن جەتكىزەتىن قۇندى بەلگىلەر. 1992 جىلدان بەرى مەملەكەتتىك رامىزدەر كۇنىن اتاپ ءوتۋ قالىپتى داستۇرگە اينالدى. ءرامىزدەر ازات ەلدىكتىڭ ايعاعى بولسا, ونى ۇلىقتاۋ سانالى ۇرپاقتىڭ ساليقالى ءىسى. سوندىقتان دا ادامزات تاريحىندا ەلىن كىرشىكسىز سۇيگەن اردا ۇلدارى مەن قىزدارى ەلدىكتىڭ سيمۆولى بولعان ەل رامىزدەرىن ءاردايىم بيىك ۇستاعان, – دەدى ە.قاناليموۆ.
ال ەلتاڭبا اۆتورلارىنىڭ ءبىرى جانداربەك مالىبەكوۆ مەملەكەتتىك رامىزدەرىمىزدىڭ الەمگە تانىلعانىنا اسا قۋانىشتى ەكەنىن ءبىلدىردى.
– وسىدان 27 جىل بۇرىن قابىلدانعان تۋىمىز, ءانۇرانىمىز, ەلتاڭبامىز قازىر الەمگە تانىلدى. بۇل رامىزدەر قازىر حالقىمىزدى رۋحتاندىرىپ تۇر. وتكەن جىلى ەلتاڭبامىزعا لاتىن قارپى ەنگىزىلگەن كەزدە ءوزىم ولشەپ-ءپىشىپ ەلباسىنا كورسەتتىم. تاريحىمىزعا جاقىنداتا تۇسكەن جاڭا الىپپە قازاق ەلى تاۋەلسىزدىگىنىڭ شىنايى كورىنىسى بولىپ وتىر. وعان قوسا, ەلتاڭبا بەكىتىلەر تۇستا ونىڭ توبەسىنە بەس جۇلدىزدى ەلباسىنىڭ ءوزى قاداپ, ەلىمىزدىڭ جۇلدىزى جارقىراي بەرسىن دەگەن بولاتىن. مىنە, سول كۇنگە دە جەتتىك, – دەدى بەلگىلى ساۋلەتشى.
وسى رەتتە, مەملەكەتتىك ءرامىزدەرگە قاتىستى مىنا ءبىر دەرەكتىڭ دە ارتىعى بولماس. سول ۋاقىت كۋاگەرلەرىنىڭ ايتۋلارىنا قاراعاندا, تاۋەلسىزدىك تاڭى اتقان سوڭ مەملەكەتتىك رامىزدەر پىشىنىنە جاريالانعان بايقاۋ وتە تارتىستى وتكەن. اتاپ ايتقاندا, ءبىر عانا تۋدىڭ وزىنە 600 ادامنان 1 200 نۇسقا تۇسسە, ەلتاڭبانىڭ 245 جوباسى, ءانۇراننىڭ 750 ۇلگىسى بايقاۋعا قاتىسقان.
جالپى, مەملەكەتتىك رامىزدەر كۇنىن نۇر-سۇلتان قالاسىندا مەرەكەلەۋ اۋقىمى وتە كەڭ بولدى.
مەرەكە قۇرمەتىنە مەملەكەتتىك مەكەمەلەردە, وقۋ ورىندارىندا, قالا الاڭدارىندا 40-تان استام تاقىرىپتىق, مادەني ءىس-شارالار ءوتتى. بۇل كۇنى مەكتەپتەر مەن كوللەدجدەردە فوتوكونكۋرستار, كەزدەسۋلەر, ۆيكتورينالار ۇيىمداستىرىلىپ, پاتريوتيزم, ەلىمىزدىڭ مەملەكەتتىك رامىزدەرىن ءبىلۋدىڭ ماڭىزدىلىعى جانە ونىڭ ءبىزدىڭ مەملەكەتىمىزدىڭ تاريحىنداعى ماڭىزدىلىعى تۋرالى ايتىلادى. ساكەن سەيفۋللين مۇراجايى مەن تاۋەلسىزدىك سارايىندا تاقىرىپتىق كورمەلەر ۇيىمداستىرىلدى. قالانىڭ بارلىق كىتاپحانالارىندا ادەبي كەشتەر, سول سياقتى كونتسەرتتەر, دارىستەر, ءدوڭگەلەك ۇستەلدەر, سەمينارلار قالا تۇرعىندارى مەن قوناقتارىنىڭ كوزايىمىنا اينالدى.
جالپى, وسى تەكتەس شارالار ەلىمىزدىڭ بارلىق قالالارى مەن ەلدى مەكەندەرىندە جوعارى دەڭگەيدە ۇيىمداستىرىلعانىن اتاپ وتكەن ءجون.