27 جاستاعى امەريكالىق بويجەتكەن العاشىندا قازاق ءتىلىن امەريكانىڭ ۆيسكونسين شتاتىندا 2 اي وقيدى. قازاق ءتىلىنىڭ سوزدىك قورى باي, كوركەم ءتىل ەكەنىن بايقاعان ول تەرەڭىرەك زەرتتەۋگە كىرىسەدى. سول سەبەپپەن قازاقستانعا كەلىپ, الماتى قالاسىنداعى ءال-فارابي اتىنداعى قازۇۋ-دا عىلىمي جۇمىسىن جالعاستىرادى.
حاننا الماتىدا ەكى اي بويى قازاق وتباسىمەن تۇرادى. بۇل ونىڭ قازاق ءتىلىن جەتىك مەڭگەرۋىنە ءۇلكەن كومەك بولادى. اق جاۋلىقتى اجەنىڭ قولىندا تۇرعاندىقتان, قازاق حالقىنىڭ ءتىلىن عانا ەمەس, مادەنيەتى مەن ءداستۇرىن دە جانىنا جاقىن تارتا باستايدى. قازىر ول قازاق ەلىنىڭ ءتول مەرەكەلەرى مەن ۇلتتىق تاعامدارىن ەرەكشە جاقسى كورەدى. بىزبەن اڭگىمە بارىسىندا ەت, باۋىرساق, ناۋرىزكوجە سىندى تاعامداردى ايرىقشا ۇناتاتىنىن جەتكىزدى. الايدا حانناعا عىلىمي جۇمىسىن تەرەڭىرەك زەرتتەۋ ءۇشىن وزگە دە قالالاردا ساۋالدامالار جۇرگىزۋ كەرەك بولعاندىقتان زەرتتەۋ جۇمىسىنىڭ قالعان بولىگىن نۇر-سۇلتان قالاسىنداعى نازارباەۆ ۋنيۆەرسيتەتتە جالعاستىردى. ونىڭ ايتۋىنشا, قازاق ءتىلى مەن مادەنيەتىنىڭ اراسىندا ەرەكشە بايلانىس بار. ول قازاق ءتىلىن ۇيرەنۋ ارقىلى قازاقتىڭ مادەنيەتىنە دە قىزىعا باستاعان. قازاقتىڭ ءتىلى مەن مادەنيەتىنە قىزىعۋشىلىقپەن قارايتىن دوستارى دا از ەمەس. ۆيسكونسيندەگى قازاق ءتىلى مەكتەبىندە وقىپ جۇرگەنىندە قازاق تىلىنە قىزىعۋشىلىق بىلدىرەتىن كوپتەگەن امەريكالىق عالىممەن تانىسقان. حاننانىڭ ايتۋىنشا, ولار دا زەرتتەۋ جۇمىستارىن جۇرگىزۋ ءۇشىن قازاقستانعا كەلۋگە نيەتتى. ولار قازاق ءتىلىنىڭ لينگۆيستيكاسى, تاريحى, مادەنيەتى, حالىق اۋىز ادەبيەتى, ەرتەگىلەرى جانە يدەولوگياسى سىندى تاقىرىپتاردا زەرتتەۋ جۇرگىزگىسى كەلەدى.
ول ءار كۇن سايىن ابايدىڭ «كوزىمنىڭ قاراسى» اتتى تۋىندىسىن تىڭدايدى ەكەن. ءار ءسوزدىڭ ماعىناسىن ءتۇسىنۋ ءۇشىن كوپ ىزدەنەدى. ونىڭ ايتۋىنشا, قازاق ءتىلى – سوزدىك قورى باي, كۇردەلى ءتىل.