قاسىرەتتى تاريحقا قاتىستى ەسكە الۋ, تاعزىم ەتۋ شاراسىن قازاقستان حالقى اسسامبلەياسى ۇمىت قالدىرعان ەمەس. ولار «تاريحتان تاعىلىم – وتكەنگە تاعزىم» حالىقارالىق جوباسىنىڭ ءىس-شارالارىن العاش رەت 2010 جىلى استانا قالاسىندا ۇيىمداستىرىپ, «الجير» مۇراجاي-مەموريالدىق كەشەنىندە «تاريحتان – بۇگىنگى كۇنگە» اتتى تمد ەلدەرى تاريحشىلارىنىڭ ءبىرىنشى فورۋمى ءوتتى. وعان 300-دەن استام اكادەميالىق تاريح عىلىمدارىنىڭ وتاندىق جانە شەتەلدىك عالىمدارى قاتىستى. فورۋم ناتيجەسى بويىنشا تاريحي مۇرانى زەرتتەۋدىڭ بىرىڭعاي جولدارىن ازىرلەۋ بويىنشا استانا حارتياسى قابىلداندى.
بيىل ماڭعىستاۋ وبلىسى قازاقستان حالقى اسسامبلەياسى «تاريحتان تاعىلىم – وتكەنگە تاعزىم» اتتى جىل سايىنعى حالىقارالىق جوبانىڭ شەڭبەرىندە قاراقيا اۋدان ورتالىعىندا ساياسي قۋعىن-سۇرگىن قۇرباندارىن ەسكە الۋ كۇنىنە ارنالعان «تاريح قاسىرەتى» اكتسياسىن وتكىزدى.
ۇلتتىق بىرلىك پەن قوعامدىق كەلىسىمدى نىعايتۋعا جانە جالپى قۇندىلىقتاردى قالىپتاستىرۋعا ىقپال ەتۋگە, تاريحتا ءىز قالدىرعان قاسىرەتتى وقيعانى كەلەشەك ۇرپاققا تاريحي دەرەك رەتىندە جەتكىزىپ, ولاردى وتكەندى قاستەرلەۋگە, ۇلت تاريحىنا جانە تاۋەلسىزدىككە, تاتۋلىق پەن بەيبىتشىلىككە قۇرمەتپەن قاراۋعا تاربيەلەۋ ىسىندە ازاماتتىق قوعام مەن مەملەكەتتى بىرىكتىرۋ ماقساتىنداعى اكتسيانى ماڭعىستاۋ وبلىسى قازاقستان حالقى اسسامبلەياسى قاراقيا اۋدانى اكىمدىگى قولداۋىمەن ۇيىمداستىردى. ءىس-شاراعا قاتىسقان قازاقستان حالقى اسسامبلەياسى مەن وڭىرلىك اسسامبلەيانىڭ مۇشەلەرى, مەملەكەتتىك ورگانداردىڭ, شىعارماشىل زيالى قاۋىم, ەتنومادەني بىرلەستىكتەردىڭ, جاستار ۇيىمدارىنىڭ وكىلدەرى, ساياسي قۋعىن-سۇرگىن جانە دەپورتاتسياعا ۇشىراعان حالىقتار وكىلدەرىنىڭ ۇرپاقتارى, مۋزەي جانە مۇراعات قىزمەتكەرلەرى, باق وكىلدەرى ءۇشىن اۋدان ورتالىعىندا ورنالاسقان مۇناي مۇراجايىنا ەكسكۋرسيا ۇيىمداستىرىلدى. ودان سوڭ «قاسىرەت» مەموريالىنىڭ الدىندا ساياسي قۋعىن-سۇرگىن قۇرباندارىن ەسكە الۋ ميتينگىسى ءوتتى. ميتينگ ساياسي قۋعىن-سۇرگىن قۇرباندارىن ەسكە الۋ كۇنىنە ارنالعان كونتسەرتپەن اياقتالدى.
اسسامبلەيا وكىلدەرى ۇيىمداستىرعان ساياسي قۋعىن-سۇرگىن قۇرباندارىن ەسكە الۋ شاراسى اقتاۋ قالاسىندا دا جالعاسىن تاپتى. ماڭعىستاۋ وبلىسى قازاقستان حالقى اسسامبلەياسى مەن «چوسون» كورەي ەتنومادەني ءبىرلەستىگى ۇيىتقى بولدى. ەتنومادەني ءبىرلەستىك وكىلدەرى مەن ماڭعىستاۋ وبلىسى قحا مۇشەلەرى جانە ەلىمىزدىڭ ءار قالاسىنان جينالعان «قازاقستان كورەيلەر قاۋىمداستىعى» مۇشەلەرى ەسىمى ەل ەسىندە ساقتالعان قايراتكەرلەردىڭ ءبىرى, قاراپايىم جۇمىسشىدان مەملەكەت قايراتكەرى دارەجەسىنە دەيىن كوتەرىلگەن تۇلعا جالاۋ مىڭباەۆ ەسكەرتكىشىنە گۇل شوقتارىن قويدى. سونداي-اق دوستىق ۇيىندە « ۇلى دالا مۇراسى» ءجانە «كورەي ناقىشتارى» اتتى كورمە ءوتتى. كورمەگە «مارتارت» جانە تاعى دا باسقا ونەر ستۋديالارىنىڭ كورنەكتى كارتينالارى قويىلدى. «چوسون» ەتنومادەني بىرلەستىگىنىڭ ءتورايىمى رايسا مادەنوۆا كورمەدەگى ونەر تۋىندىلارىنىڭ ءمانى مەن ماعىناسىن تانىستىردى. كورمە بارىسىندا قوناقتارعا قازاقتىڭ ۇلتتىق تاعامدارى باۋىرساق پەن شۇبات ۇسىنىلدى.
«قازاقتانۋ» جوباسى اياسىندا قازاقتىڭ سالت-ءداستۇرىنىڭ ءبىرى «تۇساۋكەسەر» ۇيىمداستىرىلىپ, شارانىڭ قۇرمەتتى قوناعى – «قازاقستان كورەيلەرى قاۋىمداستىعىنىڭ» توراعاسى وگاي سەرگەي ءبىر جاسقا تولعان قازاق بالاسىنىڭ تۇساۋىن كەسىپ, ءتاي-ءتاي باسقان بالدىرعانعا اق تىلەگىن ارنادى.
كورەيلەر قيىن جىلدارى باۋىرىنا باسقان قازاق حالقىنا دەگەن ريزاشىلىعىن ءبىلدىرىپ, قازاقتىڭ سالت-داستۇرىنە قۇرمەتپەن قارايتىندىعىن جەتكىزدى.
ماڭعىستاۋ وبلىسى