سارسەنبى, 1 مامىر 2013 2:05
قازاقستان حالقىنىڭ حح سەسسياسىندا ەلباسى نۇرسۇلتان نازارباەۆ «دوستىق» ۇيلەرىنىڭ ماڭىزىنا جانە ولاردىڭ الداعى ۋاقىتتا قالاي جۇمىس ىستەۋى كەرەكتىگىنە توقتالدى. راسىندا, ۇلتتار اراسىنداعى تاتۋلىق پەن بىرلىكتى نىعايتا بەرۋ ءۇشىن بۇل ناعىز كەرەك ماسەلە دەپ بىلەمىن. پرەزيدەنت ايتقانداي, ۇلتتار مەن ۇلىستاردىڭ تاتۋلىعى مەن دوستىعى ءۇشىن قانداي باعا دا, قانداي جۇمىس تا كوپتىك ەتپەيدى.
سارسەنبى, 1 مامىر 2013 2:05
قازاقستان حالقىنىڭ حح سەسسياسىندا ەلباسى نۇرسۇلتان نازارباەۆ «دوستىق» ۇيلەرىنىڭ ماڭىزىنا جانە ولاردىڭ الداعى ۋاقىتتا قالاي جۇمىس ىستەۋى كەرەكتىگىنە توقتالدى. راسىندا, ۇلتتار اراسىنداعى تاتۋلىق پەن بىرلىكتى نىعايتا بەرۋ ءۇشىن بۇل ناعىز كەرەك ماسەلە دەپ بىلەمىن. پرەزيدەنت ايتقانداي, ۇلتتار مەن ۇلىستاردىڭ تاتۋلىعى مەن دوستىعى ءۇشىن قانداي باعا دا, قانداي جۇمىس تا كوپتىك ەتپەيدى.
قازىر اقپاراتتار اعىنى زامانىندا ۇلتتار مەن ۇلىستاردىڭ اراسىنداعى كيكىلجىڭ وقيعالاردى جانە جەر شارىنىڭ «ىستىق نۇكتەلەرىندەگى» جاعدايلاردى كۇن سايىن كورىپ-ءبىلىپ وتىرمىز. «اعايىن تاتۋ بولسا – اس كوپ» دەگەن قازاقتىڭ ماقالى بار. تاتۋلىق بولسا بىرلىك بولادى, بىرلىك بولسا ىسكە بەرەكە كىرەدى. بەرەكە بار جەردە بارلىعى دا بار. ءبىزدىڭ ەلىمىزدە ءبىر-بىرىنە الاكوزدەنىپ وتىرعان ەشكىم جوق. ءبىر ۇلتتان تۇراتىن ەڭبەك ۇجىمى جوق. قاي اۋىلدى, قاي ەڭبەك ۇجىمىن الساڭىز دا, وندا ءتۇرلى ۇلت وكىلدەرى كەزدەسەدى. ولاردىڭ بارلىعىنىڭ دا مۇڭى مەن قۋانىشى ءبىر. جۇمىستى بىرگە اتقارسا, مەرەكە قىزىعىن بىرگە كورەدى, توي-تومالاقتا دا بىرگە بولادى.
قوستانايداعى «دوستىق» ءۇيىن 2006 جىلى نۇرسۇلتان ءابىش ۇلىنىڭ ءوزى كەلىپ اشقان بولاتىن. وندا قازىر 16 ەتنومادەني بىرلەستىك بار. وسىدان ءۇش جىل بۇرىن قىرعىز اعايىنداردىڭ «اسابا» ەتنومادەني بىرلەستىگى تىركەلدى. بۇل – «دوستىق» ۇيىندەگى ەڭ جاس ۇجىم. ولاردىڭ وزدەرى دە ءبىراز قىزىقتى شارالار وتكىزىپ ۇلگەردى. ۋكراينداردىڭ ەتنومادەني بىرلەستىگىنە بيىل ون بەس جىل تولدى. ولار جىل سايىن فەستيۆال وتكىزەدى. تاتار-باشقۇرتتىڭ سابانتويى دا جىلدا اتالىپ وتەدى. ال بىلتىردان بەرى ازەربايجان ەتنومادەني بىرلەستىگى مۇشەلەرىنىڭ باستاماسىمەن كاۆكاز حالىقتارىنىڭ فەستيۆالى وتۋدە. بۇل شارانى جاقىندا عانا بۇكىل قوستانايلىقتار تاعى دا تاماشالادى.
قازىر ۇلتتاردىڭ مۇنداي مادەني شاراسىنا وزگە ۇلتتار وكىلدەرىنىڭ بارلىعى دا قاتىناسادى. مىسالى, ۋكرايننىڭ دەلەبەڭدى قوزدىراتىن كوڭىلدى اندەرى مەن بيلەرىن ورىنداۋشىلاردىڭ اراسىندا تەك ۋكراين ەمەس, ورىستار دا, قازاقتار دا, كورەيلەر دە جۇرەدى. قازىر قازاقتىڭ ءانىن ورىس تا, كورەي دە, وزبەك تە, چەشەن دە ناقىشىنا كەلتىرىپ ورىنداي بەرەدى. باسقا ۇلتتار جونىندە دە وسىنى ايتۋعا بولادى.
قالانىڭ ورتالىعىنداعى تاريحي عيماراتقا ورنالاسقان «دوستىق» ءۇيى بۇل كۇندە ۇلكەن ەسىك بولعان. وندا كۇن سايىن مادەني شارالار ءوتىپ جاتادى. «دوستىق» ءۇيى وبلىس ورتالىعىندا عانا بار. ال اۋداندار مەن شالعاي اۋىلداردا دا وسىنداي جۇمىستار قاجەت. پرەزيدەنت سەسسيادا اسسامبلەيا جانىنان «دوستىق» ۇيلەرى ديرەكتورلارىنىڭ رەسپۋبليكالىق ادىستەمەلىك كەڭەسىن قۇرىپ, جۇمىستىڭ ەڭ وزىق جانە ءتيىمدى تاسىلدەرىن تابۋدى جانە ورتالىقتاندىرۋدى تاپسىردى. بۇل الداعى ۋاقىتتا «دوستىق» ۇيلەرىنىڭ جۇمىسىنا ۇلكەن كومەك بولار ەدى. وعان جاستاردى كوبىرەك تارتۋ كەرەكتىگى دە بايقالادى.
قازىر ەتنومادەني بىرلەستىكتەر شارالارىندا, كوبىنەسە, ورتا جانە اعا بۋىن وكىلدەرى جۇرەدى. قازاقستاندا تۇرىپ جاتقان بارلىق ۇلتتار وكىلدەرىنىڭ ءداستۇر-سالتى, مادەنيەتى – بارلىعىمىزدىڭ ورتاق بايلىعىمىز. «دوستىق» ۇيلەرى وسىعان قىزمەت ەتۋى قاجەت.
انتون ترۋحانوۆ,
قوستاناي وبلىستىق
«دوستىق» ءۇيىنىڭ ديرەكتورى.
قوستاناي.