14-22 قىركۇيەك ارالىعىندا الەمنىڭ بىلەكتى بالۋاندارى قازاقستانعا ات باسىن بۇرادى. كۇرەس تۇرلەرىنەن 2019 جىلعى الەم چەمپيوناتىندا وليمپيادا ويىندارىنىڭ ليتسەنزياسى تاراتىلماق. 2020 جىلعى توكيو وليمپياداسىنىڭ جولداماسىن جەڭىپ الۋ ءۇشىن الەمنىڭ مىڭعا جۋىق بالۋانى كىلەمگە شىعادى دەپ كۇتىلۋدە. الەم چەمپيوناتىندا 1-ءشى ورىن مەن 6-شى ورىن ارالىعىندا جايعاسقان قازاقستاندىق سپورتشىلار تورتجىلدىق دوداسىنا تىكەلەي جولداما الادى. نۇر-سۇلتانداعى الەمدىك سىندا كۇرەستىڭ ءۇش تۇرىنەن جالپى ەسەبى 108 وليمپيادا جولداماسى ءوز يەسىن تاپپاق.
«وتكەن اپتادا ءبىز بىرىككەن كۇرەس الەمىنىڭ پرەزيدەنتى لالوۆيچ مىرزامەن كەزدەسىپ, الەم چەمپيوناتىنا دايىندىق بارىسىن تالقىلادىق. دايىندىق كەزەڭىنە كوپ ۋاقىت قالعان جوق, سوندىقتان, وليمپيادا الەمىندەگى ءىرى سپورتتىق وقيعاعا ۇلكەن جاۋاپكەرشىلىكپەن قاراۋىمىز كەرەك. قازاقستاندىق سپورتشىلاردى دايىنداۋ باپكەرلەردىڭ مىندەتى, ال ۇيىمداستىرۋ كوميتەتى الەم بىرىنشىلىگىن جوعارى دەڭگەيدە وتكىزۋگە بار كۇشىن سالسا دەيمىن. ءبارىمىز كۇش بىرىكتىرسەك, الەمدىك دودانى ابىرويمەن اتقاراتىنىمىز ءسوزسىز. ليتسەنزيالىق الەم چەمپيوناتىن وتكىزۋدىڭ ءوزى ۇلكەن مارتەبە. ءوز جەرىمىزدەگى باسەكەدە بالۋاندارىمىز جانكۇيەرلەردى قۋانتادى دەگەن ۇمىتتەمىز», - دەدى قازاقستان ۇوك باسشىسى تيمۋر ق ۇلىباەۆ.
قازاقستان ۇوك پرەزيدەنتىنىڭ ايتۋىنشا, ءبىزدىڭ ەلىمىزدىڭ الەم چەمپيوناتتارىن ۇيىمداستىرۋداعى تاجىريبەسى مول. ونىڭ ۇستىنە, ەلوردادا بىرنەشە رەت الەمدىك دەڭگەيدەگى ءىرى جارىستار ءوتتى.
«بىزدە اۋقىمدى سپورتتىق باسەكەلەردى وتكىزۋ تاجىريبەسى بار. جاقىندا عانا نۇر-سۇلتاندا شايبالى حوككەيدەن الەم چەمپيوناتى جوعارى دەڭگەيدە وتكىزىلدى. «بارىس-ارەناعا» قاراپ, ينفراقۇرىلىمنىڭ دا دايىن ەكەنىن ايتۋعا بولادى. ناقتى تاپسىرمالار بەرىلدى», - دەدى جيىندا ءسوز العان استانا اكىمى باقىت سۇلتانوۆ.
الەم چەمپيوناتىن ۇيىمداستىرۋ كوميتەتىنىڭ جيىنى جۇيەلى تۇردە ءوتىپ تۇرادى. ماۋسىم ايىندا بىرىككەن كۇرەس الەمىنىڭ وكىلدەرى دايىندىق بارىسىمەن تەرەڭىرەك تانىسۋ ءۇشىن نۇر-سۇلتانعا كەلەدى دەپ كۇتىلۋدە.
«بۇل وتە ۇلكەن جانە ماڭىزدى وقيعا. ءبىز UWW-مەن بىرلەسە جۇمىس ىستەۋگە نيەتتىمىز. ەگەر ءبىر جاعادان باس, ءبىر جەڭنەن قول شىعارىپ, بىرلەسە جۇمىس ىستەسەك, الەم چەمپيوناتىن وتە جوعارى دەڭگەيدە وتكىزەمىز», - دەدى قازاقستان رەسپۋبليكاسى مادەنيەت جانە سپورت مينيسترى ارىستانبەك مۇحامەدي ۇلى.
ەسكە سالا كەتەيىك, جاقىندا قازاقستان ۇوك باسشىسى تيمۋر ق ۇلىباەۆ UWW پرەزيدەنتى, حالىقارالىق وليمپيادا كوميتەتىنىڭ مۇشەسى نەناد لالوۆيچپەن كەزدەسىپ, كۇرەس تۇرلەرىنەن ەلىمىزدە وتەتىن الەم چەمپيوناتىنا دايىندىق بارىسىن تالقىلادى. كەزدەسۋدە UWW پرەزيدەنتى قازاقستاننىڭ الەم چەمپيوناتىن جوعارى دەڭگەيدە وتكىزەتىنىنە سەنىم ءبىلدىردى.
سونداي-اق, قازاقستان ۇوك باسشىسى مەن UWW پرەزيدەنتى اراسىنداعى كەزدەسۋ بارىسىندا Qazaq Kuresi حالىقارالىق فەدەراتسياسىن UWW قاتارىنا ەنگىزۋ ماسەلەسى وڭ شەشىمىن تاپتى.
ايتا كەتەلىك, ليتسەنزيالىق الەم چەمپيوناتىن وتكىزۋ قۇقىعىن قازاقستان بىلتىرعى قىركۇيەك ايىندا جەڭىپ الدى. الەمدىك سىندى قابىلداۋعا ستامبۋل قالاسى دا ۇمىتكەر اتانعان بولاتىن.