بەيسەنبى, 7 ناۋرىز 2013 7:26
قازىرگى تاڭدا مەديتسينانىڭ ۋرولوگيا سالاسىنداعى وزەكتى تاقىرىپتاردىڭ ءبىرى – ەرلەردىڭ قۋىق استى بەزىنىڭ سىرقاتتارى. 60 جاستان اسقان ەرلەر اراسىندا بۇل اۋرۋ جۇرەك اۋرۋلارى مەن قاتەرلى ىسىككە قاراعاندا ءجيى كەزدەسەدى. قۋىق استى بەزىنىڭ (پروستاتانىڭ) بارىنشا كەڭ تاراعان سىرقات تۇرلەرى رەتىندە جەدەل جانە سوزىلمالى پروستاتيت; قۋىق استى بەزىنىڭ زالالسىز گيپەرپلازياسى (پروستاتا ادەنوماسى); قۋىق استى بەزىنىڭ قاتەرلى ىسىگىن اتاۋعا بولادى.
بەيسەنبى, 7 ناۋرىز 2013 7:26
قازىرگى تاڭدا مەديتسينانىڭ ۋرولوگيا سالاسىنداعى وزەكتى تاقىرىپتاردىڭ ءبىرى – ەرلەردىڭ قۋىق استى بەزىنىڭ سىرقاتتارى. 60 جاستان اسقان ەرلەر اراسىندا بۇل اۋرۋ جۇرەك اۋرۋلارى مەن قاتەرلى ىسىككە قاراعاندا ءجيى كەزدەسەدى. قۋىق استى بەزىنىڭ (پروستاتانىڭ) بارىنشا كەڭ تاراعان سىرقات تۇرلەرى رەتىندە جەدەل جانە سوزىلمالى پروستاتيت; قۋىق استى بەزىنىڭ زالالسىز گيپەرپلازياسى (پروستاتا ادەنوماسى); قۋىق استى بەزىنىڭ قاتەرلى ىسىگىن اتاۋعا بولادى.
زامانعا ساي ءار جاستاعى ادامدار باۋىردىڭ, بۇيرەكتىڭ, جۇرەكتىڭ قايدا ورنالاسقانىن جانە ولاردىڭ اتقاراتىن قىزمەتتەرىن بىلگەنىمەن, قۋىق استى بەزى تۋرالى تۇسىنىكتەرى جوققا ءتان. بۇل ماسەلەگە ۋرولوگ, اندرولوگ ماماندار كەيىنگى كەزدە باسا نازار اۋدارا باستادى. سوندىقتان, جاسى ۇلعايعان ەر ادامدار اراسىندا قۋىق استى بەزى اۋرۋلارىن پروفيلاكتيكالىق ءتۇردە ەمدەتەتىندەردىڭ سانى ارتا تۇسۋدە.دەگەنمەن, قۋىق استى بەزىنىڭ قىزمەتىنە جانە ەمدەلۋىنە بايلانىستى ماسەلەلەر تولاستار ەمەس. زاماناۋي تالاپتارعا بايلانىستى دارىگەرلەردىڭ ۇلەسىندە كوپتەگەن ءار ءتۇرلى ەمدەۋ تاسىلدەرى بار. حيرۋرگيالىق ءتاسىل ءتيىمدى, الايدا, جاعىمسىز جاقتارى دا بار, سوندىقتان وتە قاجەت بولماعان جاعدايدا ءدارىگەرلەر ونى قولدانبايدى.ەسىڭىزدە بولسىن, قۋىق استى بەزى تەك ەركەكتەردە عانا كەزدەسەدى. قۋىق استى بەزى (پروستاتا) – بۇل جامباس جاعىنداعى قۋىقتىڭ باسىندا ورنالاسقان كىشىگىرىم دەنە مۇشەسى. ول قاساعا سۇيەكتىڭ ارتىندا ورنالاسقان, ونى تىك ىشەكتىڭ ءىش جاعىنان دارىگەر ۋرولوگ نەمەسە اندرولوگ (كەيبىر حيرۋرگيالىق سىرقات كەزىندە حيرۋرگ, پروكتولوگ) سۇق ساۋساقپەن سيپالاپ سەزىپ, تەكسەرەدى. ول بەز تىك ىشەككە «باتىپ تۇرعان» گرەك جاڭعاعىن ەسكە تۇسىرەدى. كوپتەگەن دەرەكتەر بويىنشا, بەز قالىپتى جاعدايدا تۇرعاندا كىشكەنتاي تالشىننىڭ (كاشتاننىڭ) كولەمىندەي عانا بولادى. جاسوسپىرىمدىك كەزەڭدە ونىڭ سالماعى 2 گرامنان تومەن, ال جىنىستىق جەتىلۋدەن كەيىن ونىڭ سالماعى 10 گرامعا دەيىن وسەدى جانە ەرەسەكتەردە 20 گرامنان اسپايدى. قۋىق استى بەزىنىڭ ورتاڭعى بولىگىمەن ۋرەترا, ياعني ءۇرپى وتەدى. بارشاعا ايان, ءۇرپى ارقىلى قۋىقتاعى نەسەپ سىرتقا شىعارىلادى.قۋىق استى بەزىنىڭ ۇلعايۋىن مەديتسينا تىلىمەن قۋىق استى بەزىنىڭ زالالسىز گيپەرپلازياسى دەپ اتايدى. بۇل پروستاتا اۋرۋلارىنىڭ كەڭ تاراعان ءتۇرى. (كۇندەلىكتى تۇرمىستا «پروستاتا بەزىنىڭ ادەنوماسى» دەگەن تەرمين ءجيى قولدانىلادى). زالالسىز اۋرۋ دەپ اتالۋىنىڭ سەبەبى, مۇندا قاتەرلى جاسۋشالار تۇزىلمەيدى. «گيپەرپلازيا» ءسوزى «كولەمنىڭ ۇلعايۋى, كەڭەيۋى» دەپ اۋدارىلادى. دارىگەرلەردىڭ كوپشىلىگى قۋىق استى بەزىنىڭ ۇلعايۋىن اعزا قارتايۋىنىڭ قاراپايىم ءبىر ءتۇرى دەپ ەسەپتەيدى.قۋىق استى بەزىنىڭ ۇلعايۋ بەلگىلەرىن 40 جاستان اسقان ەركەكتەردىڭ 10 پايىزىنان بايقاۋعا بولادى. ارينە, بۇل وسى ادامداردىڭ بارلىعىن پروستاتا اۋرۋلارىنىڭ بەلگىلەرى مازالايدى دەگەن ءسوز ەمەس. الايدا, ۇلعايعان بەزدىڭ جاعىمسىز اسەرى بايقالسا, تەز ارادا ۋرولوگ دارىگەرگە قارالۋ كەرەك. ەسكەرتە كەتسەك, جوعارى مامانداندىرىلعان, زاماناۋي تەحنولوگيالار ارقىلى جاسالاتىن ارنايى وپەراتسيالار ءتۇرى ب.و. جاربوسىنوۆ اتىنداعى ۋرولوگيا عىلىمي ورتالىعىندا كۇن سايىن ءوتىپ جاتادى.قۋىق استى بەزى نەگە ۇلعايادى؟ عىلىم ازىرگە بۇل سۇراققا ناقتى جاۋاپ بەرە المايدى. كەيبىر بولجامدارعا سايكەس, اتالعان اۋرۋدا ناسىلدىك نەمەسە گەنەتيكالىق بەيىمدىلىك بار, ويتكەنى, بۇل دەرت ازيا تۇرعىندارىنىڭ اراسىندا از تارالعان, كەرىسىنشە قارا ءناسىلدى امەريكالىقتاردىڭ اراسىندا ءجيى كەزدەسەدى.حالقىمىزدىڭ ءومىر ءسۇرۋ شارتتارىنا بايلانىستى وتكەن كەزەڭدە پروستاتا ادەنوماسى از پايىزدا كەزدەسكەن دەگەن ءدۇدامال پىكىرلەر بار. تازا اۋا, ينفەكتسيانىڭ ازدىعى, اتقا وتىرۋ, كونسەرۆانتسىز تازا تاعام, ءمولدىر بۇلاق سۋى, تابيعي انتيبيوتيككە باي قىمىز ءىشۋ, وسىنىڭ ءبارى, ارينە, دەنساۋلىق كەپىلى بولعان. بىراق, ادام بالاسى 100 جاسقا دەيىن ءومىر سۇرسە, وندا ءىس جۇزىندە ءاربىر ەركەك بۇل اۋرۋعا شالدىعار ەدى دەيدى ماماندار. سونىمەن, قۋىق استى بەزى ادەنوماسىنىڭ دامۋ قاۋپى دالەلدەنگەن جالعىز فاكتور – ەركەك اعزاسىنىڭ قارتايۋى بولىپ تابىلادى.پروستاتا گيپەرپلازياسىنىڭ جاعدايىنداعى نەگىزگى ماسەلەلەر رەتىندە اۋرۋدىڭ جاسىرىن تۇردە دامۋىن جانە بىرتىندەپ ءۇرپى وزەگى جولدارىن جاۋىپ تاستايتىنىن اتاۋعا بولادى. سونىمەن قاتار, قۋىق بۇلشىق ەتتەرىنىڭ جۇمىسى بۇزىلادى. ناتيجەسىندە ول نە مولشەردەن تىس بوساڭسيدى, نە نەسەپ شىعارۋ كەزىندە قاجەتتى دەڭگەيدە جيىرىلماۋى مۇمكىن. بايقاعاندارىڭىزداي, پروستاتا گيپەرپلازياسى ناتيجەسىندە تۋىنداعان قيىندىقتار نەسەپ شىعارۋ پروتسەسىنە اسەر ەتەدى. بۇل جاعدايدا مىناداي بەلگىلەر پايدا بولادى: نەسەپ شىعارار الدىندا كۇشەنۋ; نەسەپ شىعارۋدىڭ كىدىرۋى; ءالسىز نەمەسە ۇزىك-ۇزىك نەسەپ اعىسى; اۋرۋ جاڭا عانا دارەتحاناعا بارىپ كەلسە دە قايتادان نەسەپ شىعارعىسى كەلۋى: قۋىقتا قالدىق ءزاردىڭ سەزىلۋى جانە دە ءجيى, اسىرەسە, تۇندە نەسەپ شىعارۋ. كەيدە اتالعان بەلگىلەردىڭ ءبارى بولماشى تۇردە بايقالادى دا, سىرقات ادام ونى ەلەمەيدى.ۇلعايعان قۋىق استى بەزدەرى كوپتەگەن قيىنشىلىقتار اكەلۋى مۇمكىن. دارەتحاناعا ءجيى بارۋ نەمەسە تۇنگى ۇيقىسىن بۇزۋ كىمگە ۇناسىن؟ ال ودان دا قاۋىپتىسى – بۇل بۇيرەك اۋرۋلارىنا, نەسەپ جولدارىنىڭ جۇقپالى اۋرۋلارىنا, سونداي-اق, قۋىق پاتولوگياسىنا جول اشادى.قۋىق استى بەزدەرى نەعۇرلىم ۇلعايسا, ناۋقاس ادامنىڭ قيىندىقتارى سوعۇرلىم كوبەيە بەرەدى دەگەن تۇجىرىم ءبىر قاراعاندا دۇرىس سياقتى. بىراق, شىندىعىندا ول ارقاشان ولاي بولا بەرمەيدى. كەيبىر جاعدايلاردا تەك كىشكەنە عانا ۇلعايعان قۋىق استى بەزى ۇلكەن قيىندىقتاردىڭ كوزى بولىپ تابىلادى. كەرىسىنشە, كەي جاعدايدا 70-80 قاداقتاي, ياعني «ورىك» كولەمىنە دەيىن ۇلعايعان قۋىق استى بەزى تىپتەن قاۋىپسىز بولۋى مۇمكىن. سوندىقتان دا قۋىق استى بەزىنىڭ كولەمى مەن ونىڭ تيگىزەتىن زاردابىنىڭ اراسىنداعى بايلانىس ايتارلىقتاي ەمەس.وسى ۋاقىتقا دەيىن پروستاتا گيپەرپلازياسىن ەمدەۋدىڭ تەك ەكى ءتاسىلى عانا قولدانىلىپ كەلدى: حيرۋرگيالىق وپەراتسيا جانە وپەراتسياعا قولايلى ۋاقىتتى انىقتاۋ ءۇشىن اۋرۋدىڭ دامۋىن مۇقيات باقىلاۋ. بىراق عىلىم ءبىر ورنىندا تۇرعان جوق. ۇلعايعان پروستاتانى ەمدەۋ جولدارى ۇنەمى جاڭا ءادىس-تاسىلدەرمەن تولىعىپ وتىرادى. قازىرگى تاڭدا نەگىزگى جاڭا تاسىلدەر مىناداي: ەمدىك شوپتەرمەن ەمدەۋ; دارىمەن ەمدەۋ, بايقاۋ-باقىلاۋ كەزەڭى; ستەنتتەردى ەنگىزۋ (جاساندى تۇتىكشەلەر); گيپەرتەرميا (جوعارعى تەمپەراتۋرامەن ەمدەۋ); جىلۋمەن ەمدەۋ (تەرموتەراپيا); لازەر كومەگى ارقىلى ەمدەۋ, وتالاۋ.شۇعىل وپەراتسيالىق ەمدەۋ, جوسپارلى تۇردەگى قۋىق ارقىلى جاسالاتىن ادەنومەكتوميا وپەراتسياسى, ەندوۋرولوگيالىق ترانسۇرپىلىك جولمەن ەلەكترورەزەكتسيالاۋ مەن لازەر كومەگى ارقىلى وتالاۋ ءبىزدىڭ ەلدە ءجيى دە ءساتتى قولدانىلادى.قورىتا ايتقاندا, قۋىق استى بەزىنىڭ قاتەرسىز گيپەرپلازياسى استارلاپ كەلىپ, اسقىنا دامىپ, ءومىردىڭ ەكىنشى جارتىسىندا, زەينەتكەرلىك كەزەڭدە ەر ادامنىڭ ءومىر ساپاسىن تومەندەتەتىن الەۋمەتتىك اۋرۋعا اينالۋدا. سوندىقتان دا ەل ازاماتتارىنا اۋىرىپ ەم ىزدەگەنشە, اۋىرمايتىن جول ىزدەڭىزدەر جانە سىرقاتتىڭ العاشقى بەلگىلەرى پايدا بولىسىمەن دەر كەزىندە دارىگەر ۋرولوگقا كورىنىڭىز دەمەكپىز.امانجول سۇرانشيەۆ,مەديتسينا عىلىمدارىنىڭ كانديداتى, جوعارى ساناتتاعى دارىگەر ۋرولوگ.الماتى.