وبلىستىق اۋماقتىق سايلاۋ كوميسسياسى ءتوراعاسىنىڭ ورىنباسارى ءامىردين الىشەۆتىڭ ايتۋىنشا, سايلاۋعا دايىندىق جۇمىستارى جوعارى دەڭگەيدە ءجۇرگىزىلۋدە. بارلىق كانديداتتاردىڭ وبلىس دەڭگەيىندە جۇمىس ىستەيتىن سەنىمدى وكىلدەرى تىركەلىپ, ولارعا ءتيىستى كۋالىكتەرى تاپسىرىلعان. ال جەرگىلىكتى جەرلەردە, ەلدى مەكەندەردىڭ تۇرعىندارىمەن تىكەلەي جۇمىس ىستەيتىن سەنىمدى وكىلدەر اۋداندىق, قالالىق اۋماقتىق سايلاۋ كوميسسيالارى تاراپىنان تىركەلدى. سايلاۋ ۋچاسكەلەرى زامان تالابىنا جانە ورتالىق سايلاۋ كوميسسياسى بەكىتكەن نۇسقاۋلىققا ساي قاجەتتى قۇرال-جابدىقتارمەن قامتاماسىز ەتىلگەن. جەرگىلىكتى اتقارۋشى ورگاندار اۋماقتىق سايلاۋ كوميسسيالارىمەن بىرلەسە وتىرىپ, ۇگىت-ناسيحات ماتەريالدارى ورنالاستىرىلاتىن ورىنداردى بەلگىلەگەن.
شەتەلدىك بايقاۋشىلار, اسىرەسە, ەۋروپاداعى قاۋىپسىزدىك جانە ىنتىماقتاستىق ۇيىمى مۇمكىندىگى شەكتەۋلى ازاماتتاردىڭ داۋىس بەرۋى ماسەلەسىن نازاردان تىس قالدىرمايتىنى ءمالىم. «ورتالىق سايلاۋ كوميسسياسى مۇگەدەكتەردىڭ داۋىس بەرۋ قۇقىعىن جۇزەگە اسىرۋىنا بارىنشا قولايلى جاعداي جاساۋ ماسەلەسىنە ايرىقشا نازار اۋدارىپ وتىر. وسى ماسەلەگە قاتىستى نۇسقاۋلىق ەرەجە ورتالىق سايلاۋ كوميسسياسىنىڭ ارنايى قاۋلىسىمەن بەكىتىلدى. تۇركىستان وبلىسىندا تىركەلگەن 1 ميلليون 181 684 سايلاۋشىنىڭ 67 741-ءى بەلسەندى داۋىس بەرۋ قۇقىعىنا يە مۇگەدەكتەر. ونىڭ 63 582-ءسى سايلاۋ ۋچاسكەسىنە كەلىپ داۋىس بەرەدى. ءبىز وسى ازاماتتاردىڭ قۇقىقتارىن قورعاۋ ءۇشىن بارلىق سايلاۋ ۋچاسكەلەرىن پاندۋستارمەن جابدىقتادىق. مۇنان بولەك سايلاۋ ۋچاسكەلەرىندە مۇمكىندىگى شەكتەۋلى ازاماتتارعا ارنالعان ارنايى كابينالار مەن بۇرىشتار, سۋردواۋدارماشىلار, لۋپالار مەن قۇلاققاپتار, باسقا دا قاجەتتى قۇرال-جابدىقتار بولادى. سونداي-اق سايلاۋ كۇنى ينۆاتاكسيلەر مۇمكىندىگى شەكتەۋلى ازاماتتاردى سايلاۋ ۋچاسكەلەرىنە تەگىن اكەلەدى», دەيدى ءا.الىشەۆ.
سايلاۋدىڭ بارلىق تالاپقا ساي ءوتۋىن قامتاماسىز ەتۋ مىندەتى جۇكتەلگەن جاۋاپتى قىزمەتكەرلەردىڭ ءمالىمدەۋىنشە, وبلىستا سايلاۋشىلاردىڭ وزدەرى قالاعان كانديداتىنا داۋىس بەرۋىنە قاجەتتى جاعدايدىڭ بارلىعى جاسالعان. تۇركىستان وبلىسى