ۆيتسە-مينيستر 2019 جىلدان باستاپ ەلباسىنىڭ تاپسىرماسى بويىنشا «قاراپايىم زاتتار ەكونوميكاسىن» دامىتۋ بويىنشا قولجەتىمدى نەسيەلەندىرۋ مىندەتتەرىن شەشۋ ءۇشىن 600 ملرد تەڭگە بولىنەتىنىن ايتتى.
ەكونوميكالىق قىزمەتتىڭ 65 تۇرىنەن 365 تاۋارلىق پوزيتسيا ايقىندالدى. بۇل نەسيەلەر «بجك-2020» باعدارلاماسى ارقىلى سۋبسيديالانادى.
ا.ج. 1 مامىرىنداعى جاعداي بويىنشا بانكتەر 14,9 ملرد تەڭگە سوماسىنا 28 ءوتىنىمدى ماقۇلداعان. ەدب قاراۋىندا 139,2 ملرد تەڭگەگە 104 جوبا جاتىر. 613,4 ملرد تەڭگە سوماسىنا 729 جوبانىڭ قۇجاتتارى ازىرلەنۋ ساتىسىندا. «دامۋ» قورى 8 ملرد تەڭگە سوماسىنا 24 جوبا بويىنشا سۋبسيديالاۋدى ماقۇلدادى.
سونىمەن قاتار, بيزنەستى قارجىلاندىرۋدىڭ قولجەتىمدىلىگىن ارتتىرۋ ماقساتىندا «قاراپايىم زاتتار ەكونوميكاسى» بويىنشا اينالىمداعى قاراجاتتى نەسيەلەندىرۋ ۇلەسىن 30%-دان 50%-عا دەيىن ارتتىرۋ شارالارى قابىلداندى. «بجك-2020» ارقىلى «قاراپايىم زاتتار ەكونوميكاسىن» كەپىلدەندىرۋ تەتىگى ەنگىزىلدى. سونداي-اق «بجك-2020» باعدارلاماسى بويىنشا قارجىلاندىرۋدى ارتتىرۋ ۇسىنىلادى.
«بيزنەستىڭ جول كارتاسى-2020» باعدارلاماسى بويىنشا سۋبسيديالاۋ مەن كەپىلدەندىرۋگە وتىنىمدەر سانى جىلدان-جىلعا ارتىپ كەلەدى. ەلباسىنىڭ تاپسىرماسى بويىنشا بۇل باعدارلاماعا قوسىمشا 30 ملرد تەڭگە قارجى بولىنەتىن بولادى.
ە. الپىسوۆ اكىمدىكتەردىڭ وڭىرلىك ەكونوميكالاردى دامىتۋعا مۇددەلى بولۋى كەرەكتىگىن اتاپ ايتتى. سوندىقتان جەرگىلىكتى اتقارۋشى ورگاندار مەملەكەتتىك قولداۋ شارالارىن بىرگە قارجىلاندىرۋى ءتيىس.
مىسالى, الماتى اكىمدىگى قوسىمشا رەزەرۆتەردەن سۋبسيديالاۋعا 1,9 ملرد تەڭگە ءبولدى. شىمكەنت اكىمدىگى دە قوسىمشا رەزەرۆتەردەن كەپىلدەندىرۋگە 250 ملن تەڭگە ءبولدى. اتىراۋ وبلىسىنىڭ اكىمدىگى سۋبسيديالاۋعا 600 ملن تەڭگە ءبولدى. قالعاندارى وسى اكىمدىكتەردەن ۇلگى الۋى ءتيىس.
«كاسىپكەرلىك - مەملەكەتتىڭ تۇراقتى ەكونوميكالىق ءوسىمىنىڭ جانە حالىقتىڭ ءال-اۋقاتىنىڭ ماڭىزدى ءتۇيىنى. جالپى, بيزنەستىڭ دامۋىنىڭ وڭ ديناميكاسى بايقالىپ وتىر. بيزنەستى مەملەكەتتىك قولداۋ شارالارىنىڭ كولەمى ارتىپ كەلەدى», دەدى ۇلتتىق ەكونوميكا ۆيتسە-ءمينيسترى.
ە. الپىسوۆ شاعىن جانە ورتا بيزنەستى ودان ءارى ىنتالاندىرۋ ءۇشىن بيزنەس-ورتانى دامىتۋ بويىنشا زاڭنامالىق تۇزەتۋلەردىڭ جەتىنشى پاكەتى قابىلداعانىن جەتكىزدى, بۇل تۇزەتۋلەر كاسىپكەرلىك قىزمەتتى دامىتۋ ءۇشىن قولايلى جاعدايلار جاساۋعا باعىتتالعان.
«دكب-2020» باعدارلاماسىن 2025 جىلعا دەيىن ۇزارتۋ اياسىندا باعدارلاما تۇجىرىمداماسى ازىرلەندى, جۇمىس توبى قۇرىلدى جانە بارلىق دەڭگەيلەردە تالقىلاۋلار باستالدى.
قارجىلاي قولداۋ تەتىكتەرىن جەتىلدىرۋگە باعىتتالعان تۇزەتۋلەر ازىرلەندى, اتاپ ايتقاندا:
كەپىلدەندىرۋ ءۇشىن نەسيە كولەمىن ارتتىرۋ ارقىلى كەپىلدىك بويىنشا جۇكتەمەنى تومەندەتۋ;
شاعىن قارجىلىق ۇيىمداردى تارتۋ;
اينالىم قاراجاتىنىڭ ۇلەسىن ارتتىرۋ;
كاسىپكەرلەردىڭ ءتيىمدى جوبالارىنا تالاپتاردى كوتەرۋ;
مەملەكەتتىك باعدارلاما قۇرالدارىن ارتتىرۋ (فرانشيزا, شوب-تى قارجىلاي ەمەس قولداۋدى كۇشەيتۋ, باسىمدىقتى سالالاردى كەڭەيتۋ ت.ب.) جانە ت.ب.
ۇلتتىق ەكونوميكا ۆيتسە-ءمينيسترى بيزنەس-قاۋىمداستىقتاردى بۇل ىسكە بەلسەنە قاتىسۋعا شاقىردى.
«ءبىز بارلىق ۇسىنىستاردى قاراستىرۋعا ءازىرمىز. مەن بۇل شارالاردىڭ بيزنەستى قولداۋ جانە قارجىلاندىرۋ شارالارىنىڭ قولجەتىمدىلىگىن ارتتىراتىنىنا, سونداي-اق بيزنەستىڭ ەل ەكونوميكاسىنا ۇلەسىن كوبەيتۋ مۇمكىندىگىن تۋدىراتىنىنا سەنىمدىمىن. كاسىپكەرلىككە قولداۋ كورسەتۋ ماڭىزدى. مينيسترلىك ءاردايىم مۇنداي جۇمىستاردى جالعاستىرا بەرەتىن بولادى», دەدى ە. الپىسوۆ.