سەنبى, 19 قاڭتار 2013 7:53
سودىرلاردىڭ كوزى جويىلدى
الجير ارمياسىنا ءال-كايداعا قاتىسى بار تەررورلىق توپ باسىپ العان كەن ورنى مەن وعان جاقىن جاتقان اۋماققا باقىلاۋ ورناتۋدىڭ ءساتى ءتۇستى.
سەنبى, 19 قاڭتار 2013 7:53
سودىرلاردىڭ كوزى جويىلدى
الجير ارمياسىنا ءال-كايداعا قاتىسى بار تەررورلىق توپ باسىپ العان كەن ورنى مەن وعان جاقىن جاتقان اۋماققا باقىلاۋ ورناتۋدىڭ ءساتى ءتۇستى.
اسكەريلەر ون ءبىر سودىردىڭ كوزىن جويدى, ولاردىڭ اراسىندا «يسلام ادىلەتتىلىگى جولىنداعى ءشول دالا ۇلدارى» تەررورلىق توبىنىڭ ليدەرى, سونداي-اق «ءابۋ ءال-باراا» الجيرلىك توپتىڭ باسشىسى رەتىندە تانىمال ابدۋللا ۋلد احميدا بولعان. كەپىلدىككە الىنعاندار ىشىندە دە شىعىندار بار. ءازىرگە وتىز ادام قازا تاپتى دەگەن مالىمەت بەلگىلى بولىپ وتىر. بىراق قۇربان بولعاندار سانىنىڭ وزگەرۋى مۇمكىن. قازا تاپقاندار ىشىندە ەكى بريتاندىق, ەكى فيليپپيندىك, ەكى جاپون مەن فرانتسۋز بار, اقش-تىڭ ءبىر ازاماتى ءىز-ءتۇزسىز جوعالعاندار ساناتىندا تۇر. جالپى, كەپىلدىككە الىنعان 600 ادام قۇتقارىلعان, ولاردىڭ اراسىندا بىرنەشە شەتەلدىك بار.
ەۋرووداقتان شىعۋ جولىن قاراستىرۋدا
بريتانيانىڭ ەگەر بريۋسسەل لوندونمەن قارىم-قاتىناس فورمۋلاسىن قايتا قاراۋعا كەلىسپەيتىن بولسا, ەۋرووداق قۇرامىنان شىعۋى مۇمكىن. بۇل تۋرالى وسى ەل پرەمەرى دەۆيد كەمەرون ءوزىنىڭ ەو-عا قاتىستى باعدارلامالىق سوزىندە مالىمدەۋگە ءتيىس بولاتىن.
بريتاندىقتار الجيردە ادامداردىڭ كەپىلدىككە الىنۋىنا بايلانىستى كەيىنگە قالدىرىلعان د.كەمەروننىڭ لوندون مەن بريۋسسەل اراسىنداعى قارىم-قاتىناستار تۋرالى ءسوزىن وتكەن جىلدىڭ جازىنان بەرى كۇتۋدە. اپتا باسىندا پرەمەردىڭ وكىلدەرى ونىڭ ەو-نىڭ بولاشاعىنا قاتىستى ءوز كوزقاراستارىن ەگجەي-تەگجەيلى باياندايتىنىن حابارلاعان. بىراق الجيردەگى وقيعاعا بايلانىستى پرەمەر گااگاعا بارۋدى كەيىنگە قالدىردى. دەگەنمەن, پرەمەردىڭ ءباسپاسوز قىزمەتى ونىڭ ايتپاق بولعان سوزدەرىنەن ءۇزىندى كەلتىرگەن. سويتسە, ول ەگەر بريۋسسەل لوندونعا قاتىستى كوزقاراسىن وزگەرتپەسە, بريتانيانىڭ ەۋرووداقتان شىعۋى مۇمكىن ەكەنىن ايتپاق بولىپتى.
ماليگە ۇشاقتار مەن نۇسقاۋشىلار جىبەردى
اقش ماليگە اسكەري-كولىك ۇشاقتارى مەن ۇشقىشسىز ۇشاتىن بارلاۋشى ۇشاقتارىن, سونداي-اق اسكەري نۇسقاۋشىلار جىبەرمەك. سونىمەن بىرگە, اقش-تىڭ اسكەري باسشىلىعى ناقتى اسكەري وپەراتسيالارعا ولاردىڭ قاتىسپايتىنىن دا اتاپ كورسەتىپ وتىر.
امەريكالىق اسكەري تاسىمالداۋشىلاردىڭ وڭىرگە ساپارلارى 18 قاڭتاردا باستالماق. وپەراتسياعا س-17 جانە س-5 ۇشاقتارى تارتىلاتىن بولادى. سونىمەن بىرگە, اقش-تىڭ شتابتار باستىعى كوميتەتىنىڭ باسشىسى گەنەرال مارتين دەمپسي فرانتسيانىڭ اسكەري وپەراتسيالارعا تىكەلەي كومەك كورسەتۋ جونىندە ءوتىنىش جاساماعانىن دا اتاپ ءوتتى. امەريكالىق اسكەري نۇسقاۋشىلار مالي اۋماعىندا ەمەس, كورشى افريكالىق ەلدەر اۋماعىندا جۇمىس ىستەيتىن بولادى دەپ كۇتىلۋدە. ەۋرووداق پەن ماليدىڭ كورشىلەرى دە سودىرلارمەن كۇرەستە وسى ەلگە كومەك كورسەتۋ نيەتتەرىنىڭ بار ەكەنىن مالىمدەپ وتىر.
اسكەريلەر زەينەتاقىسىن ءوسىرۋدى ۇسىندى
گرۋزيا پرەزيدەنتى ميحايل سااكاشۆيلي تاياۋ ۋاقىتتاردا گرۋزيا پارلامەنتى مەن ۇكىمەتىنە اسكەري قىزمەتشىلەرگە قاتىستى الەۋمەتتىك كەپىلدىكتەر تۋرالى جاڭا زاڭ جوباسىن ۇسىنباق نيەتتە.
مەن اۋعانستاندا قازا تاباتىن اسكەري قىزمەتشىلەردىڭ وتباسى مۇشەلەرىنىڭ, اسكەري قىزمەتشىنىڭ وتباسىن اسىراۋشى بولعانىنا نەمەسە بولماعانىنا قاراماستان, زەينەتاقى الۋى جونىندە ۇسىنىس جاسايمىن. بۇگىندە ءبىر رەتتىك وتەماقى تولەنەدى, بىراق مەن مۇنداي وتباسىلارىنا زەينەتاقى تولەۋدى ۇسىنامىن, قازىرگى كۇنى ءبىزدىڭ مەملەكەتتىڭ جانە بيۋدجەتتىڭ ونداي مۇمكىندىگى بار, دەپ حابارلاعان سااكاشۆيلي جۋرناليستەرگە. وسى زاڭ جوباسى ارقىلى پرەزيدەنت اسكەري زەينەتاقىلاردى ەكى ەسە ۇلعايتۋدى جانە اسكەري زەينەتاقىنىڭ ەڭ تومەنگى مولشەرىن ەڭ تومەنگى مەملەكەتتىك زەينەتاقىنىڭ ەكى ەسەلەنگەن مولشەرى كولەمىندە بەلگىلەۋدى ۇسىنباق.
اقش سومالي ۇكىمەتىن مويىندادى
اقش سياد باررە رەجىمى قۇلاعاننان كەيىن مەملەكەتتىلىك بەلگىسىن جوعالتىپ, بەي-بەرەكەتتىك تۇڭعيىعىنا باتقان سومالي ۇكىمەتىن مويىندادى.
بۇل تۋرالى سومالي پرەزيدەنتى حاسان شەيح موحاممەدپەن ۆاشينگتوندا وتكەن كەزدەسۋدە اقش مەملەكەتتىك حاتشىسى حيللاري كلينتون مالىمدەدى. مەملەكەتتىك حاتشى امەريكالىق ديپلوماتتار مەن مامانداردىڭ سوماليگە ءجيى بارا باستاعانىن ايتىپ, ءوزىنىڭ اقش-تىڭ موگاديشوداعى تۇراقتى ديپلوماتيالىق قاتىسۋىنىڭ قايتا قالپىنا كەلۋىن اسىعا كۇتەتىنىن اتاپ كورسەتتى. ءسوز رەتىندە امەريكا قۇراما شتاتتارىنىڭ 1991 جىلدان بەرى سومالي ۇكىمەتىن العاش رەت مويىنداپ وتىرعانىن ايتا كەتۋ قاجەت.
امەريكالىق ساراپشىلار جاپونياعا كەلدى
Boeing كومپانياسىنىڭ, اقش-تىڭ كولىكتەگى قاۋىپسىزدىك جونىندەگى ۇلتتىق كەڭەسى مەن ازاماتتىق اۆياتسيا فەدەرالدىق باسقارماسىنىڭ ساراپشىلارى Boeing-787 ۇشاعىنىڭ شۇعىل قونۋ سەبەبىن انىقتاۋ ءۇشىن جاپونيانىڭ تاكاماتسۋ اۋەجايىنا كەلدى.
«ارمان لاينەرى» سانالاتىن ۇشاقپەن جىل باسىنان بەرى التىنشى رەت ورىن الىپ وتىرعان وقيعا سارسەنبى كۇنى جاپونيا اۋەجايىندا ورىن العان بولاتىن. اقاۋعا ليتي باتارەيالارىنداعى تەمپەراتۋرانىڭ كوتەرىلۋى سەبەپ بولدى, سونىڭ سالدارىنان ونىڭ سىرتقى قاباتى بالقىپ كەتكەن دەپ سانايدى جاپوندىق ساراپشىلار. كولىك مينيسترلىگى بولعان ءجايتتى «ەلەۋلى وقيعا» رەتىندە باعالاپ وتىر. وسى وقيعادان كەيىن ەڭ جاڭا سانالاتىن Boeing-787 ۇشاقتارىنىڭ ۇشۋىنا تىيىم سالىندى. ولار ەگجەي-تەگجەيلى تەحنيكالىق ينسپەكتسيالاۋدان وتەتىن بولادى.
قىتاي ەكونوميكاسى ءوسۋ ۇستىندە
قىتايدىڭ ءىجو-ءسى 2012 جىلدىڭ قورىتىندىسى بويىنشا وتكەن جىلمەن سالىستىرعاندا 7,8 پايىزعا ءوسىپ, 51,93 ترلن. يۋاندى قۇرادى.
مۇنداي اقپاراتتى قحر ۇلتتىق ستاتيستيكا بيۋروسى تاراتىپ وتىر. بۇل 1999 جىلدان بەرگى ەڭ تومەنگى كورسەتكىش بولىپ سانالادى. سونىمەن بىرگە, دۇنيەجۇزىلىك بانك 2013 جىلى قىتاي ەكونوميكاسى 8,4 پايىزعا وسەدى دەگەن بولجام جاساپ وتىر. بۇل بانكتىڭ وسىدان بىرنەشە اي بۇرىن كۇتكەنىنەن 8,1 پايىزعا جوعارى. ءسوز ورايىندا 2011 جىلى ەل ەكونوميكاسىنىڭ 9,3 پايىزعا وسكەنىن دە ايتا كەتۋ كەرەك.
ينتەرنەت ماتەريالدارى نەگىزىندە ازىرلەندى.