بەيبىتشىلىك جانە كەلىسىم سارايىندا كسرو حالىق ءارتىسى, مەملەكەتتىك سىيلىقتىڭ لاۋرەاتى, كومپوزيتور ەركەعالي راحماديەۆتىڭ 80 جىلدىعىنا ورايلاس “تاڭ سامالى” اتتى كونتسەرت ءوتتى.
كەشتە كومپوزيتوردىڭ اندەرى ورىندالىپ, جينالعان جۇرتتى ءبىر جەلپىنتىپ تاستادى. “تاڭ سامالى” دەسە دەگەندەي, ادەمى اندەردى بىرىنەن سوڭ ءبىرى قالىقتاتقان انشىلەر قاتارى دا وسال ەمەس. اتاپ ايتقاندا, قايرات بايبوسىنوۆ, سەرىك وسپانوۆ, گۇلنار حامزينا, عاليا بايعازينوۆا, ازامات جىلتىرگوزوۆ, نۇراي تاناباەۆ, جۇپار عابدۋللينا, كلارا تولەنباەۆا, مەدەت شوتاباەۆ, ءباتيما يزەناەۆا, بيبىگۇل جانۇزاق, ەربول ءسادۋاقاسوۆتار ءان شىرقاپ, كلاسسيكالىق اندەردىڭ سۇلۋلىعىن تىڭدارمان جۇرەگىنە جەتكىزە ءبىلدى.
م. ماقاتاەۆ, ك. سالىقوۆ, ت. مولداعاليەۆتاردىڭ ولەڭدەرىنە جازىلعان ە. راحماديەۆتىڭ اندەرى قانشا ۋاقىتتان بەرى سىنىن جوعالتپاي, سول سۇلۋ كۇيىندە جينالعانداردى باۋراپ الدى. سونىمەن قاتار, وپەرالاردان دا اريالار ورىندالدى. مىسالى, ا. جىلتىرگوزوۆ “الپامىس” وپەراسىنان الپامىستىڭ, بيبىگۇل جانۇزاق گۇلبارشىننىڭ ارياسىن ناقىشىنا كەلتىرە ورىنداسا, “قامار سۇلۋ” وپەراسىنان قامار مەن احمەتتىڭ دۋەتىن عاليا بايعازينوۆا مەن قياقباي اسامباەۆ ناشىنە كەلتىرە شىرقادى. كونتسەرتتى ايتقالي جايىموۆتىڭ ديريجەرلىگىمەن باستان-اياق قازاق حالىق اسپاپتارى وركەسترى سۇيەمەلدەدى.
كەش سوڭىندا كومپوزيتور كونتسەرتتى ۇيىمداستىرۋشىلارعا ءوز العىسىن ءبىلدىردى. “ەلىمىز تىنىش بولسىن, ەلباسىمىز, اتقا مىنگەن ازاماتتار امان بولسىن”, دەگەن اقساقالدىق تىلەگىن بىلدىرگەن ە.راحماديەۆ ورىندالعان كەي ءاندەردىڭ بۇدان جارتى عاسىردان استام ۋاقىت بۇرىن جازىلعاندىعىن ەسكە سالدى.
كەشكە پارلامەنت ءماجىلىسىنىڭ توراعاسى ورال مۇحامەدجانوۆ قاتىسىپ, كونتسەرتتى تاماشالادى.
ۆەنەرا تۇگەلباي.