قولدا بار اقپاراتقا سايكەس, قاتەرلى ىسىكتىڭ كەڭىنەن تاراعان تۇرلەرىنە كەلەسى سىرقاتتار جاتادى: ءسۇت بەزىنىڭ, توق جانە تىك ىشەكتەر, قۋىقالدى بەزىنىڭ, اسقازاننىڭ قاتەرلى ىسىكتەرى جاتادى. وسى دەرتتەرگە قارسى كۇرەستە كوپ تاراعان كەدەرگىلەردىڭ قاتارىنا ادامداردىڭ مەديتسينالىق كومەككە دەرتتىڭ ابدەن اسقىنعان كەزدە جۇگىنۋى مەن سىرقاتقا دەر كەزىندە دياگنوز قويۋدىڭ جەتكىلىكتى دەڭگەيدە قولجەتىمدى بولماۋى جاتادى. ال بۇل ءوز كەزەگىندە سىرقاتتىلىق پەن ساۋىعۋ دەڭگەيىنە كەرى اسەرىن تيگىزەدى. ماسەلەن, 2017 جىلى تابىسى تومەن ەلدەردىڭ تەك 26%-ندا عانا پاتولوگيالاردى ەسەپكە الۋدىڭ جالپىعا قولجەتىمدى قىزمەتى جۇمىس ىستەدى. تابىس دەڭگەيى جوعارى ەلدەردىڭ 90%-ندا ءتيىستى مەديتسينا قىزمەتتەر قولجەتىمدى بولدى.
بۇل ماسەلەلەر قازاقستان ءۇشىن دە وزەكتى. قاتەرلى ىسىكتى زەرتتەۋدىڭ حالىقارالىق اگەنتتىگىنىڭ دەرەكتەرى بويىنشا, وتكەن جىلى ەلىمىزدە 34 000 ادامعا العاش رەت قاتەرلى ىسىكتەرگە بايلانىستى دياگنوز قويىلدى.
قاتەرلى ىسىكتەردىڭ جاڭا وسكىندەرىن ەرتە انىقتاۋعا باعىتتالعان زەرتتەۋلەردى جۇرگىزۋ – ناۋقاستاردىڭ دەنساۋلىعى مەن ءومىرىن ساقتاۋدىڭ باستى جولى. ددسۇ مالىمەتتەرى بويىنشا, ءسۇت بەزىنىڭ قاتەرلى ىسىگى, جاتىر مويىنشىعىنىڭ قاتەرلى ىسىگى, اۋىز قۋىسى مەن توق ىشەكتەردىڭ قاتەرلى ىسىگى سياقتى قاتەرلى ىسىك تۇرلەرى ەرتە انىقتالعان جانە زاماناۋي تەراپيا ادىستەرىمەن ەمدەلگەن جاعدايدا ساۋىعۋدىڭ جوعارى دەڭگەيىن كورسەتۋدە. قازاقستاندا وبىرعا جان-جاقتى دياگنوز قويۋعا دەگەن سۇرانىس ارتىپ كەلەدى. ناتيجەسىندە, وتاندىق مەديتسينا نارىعىندا دياگنوستيكا مەن ەمنىڭ سانقيلى تۇرلەرىن ۇسىنعان جاڭا ويىنشىلار پايدا بولۋدا.
بۇل تۋرالى الماتىدا وتكەن ءباسپاسوز ءماسليحاتىندا الەمنىڭ ءۇش ۇزدىك ونكولوگى – امەريكا حيرۋرگتارى القاسىنىڭ, سونداي-اق حيرۋرگتاردىڭ ەۋروپالىق اسسوتسياتسياسىنىڭ مۇشەلەرى قازىرگى الەمدە ۇلكەن سۇرانىسقا يە بولعان دياگنوستيكا تۇرلەرى تۋرالى جان-جاقتى اڭگىمەلەدى.
الماتى