فەستيۆال ماقساتى وزگەرىسسىز. بۇل – ۇلتتىق حورەوگرافيالىق ونەردى قولداۋ جانە تانىمال ەتۋ, پەداگوگ-حورەوگرافتاردىڭ كاسىبي قاۋىمداستىعىن نىعايتۋ, حورەوگرافيالىق ءبىلىم بەرۋ سالاسىندا شىعارماشىلىق جەتىستىكتەر مەن تاجىريبە الماسۋ.
فەستيۆال ەلباسى ن. نازارباەۆتىڭ جاريالاعان «رۋحاني جاڭعىرۋ» قوعامدىق سانانى جاڭعىرتۋ مەملەكەتتىك باعدارلاماسىن جۇزەگە اسىرۋ جانە جاستار جىلى اياسىندا وتۋدە. وسىعان بايلانىستى ۇيىمداستىرۋشىلار قازىرگى جاستاردىڭ مادەني تاربيەسى مەن شىعارماشىلىق الەۋەتىن دامىتۋعا ەرەكشە كوڭىل بولەدى.
فەستيۆال ستۋدەنتتەر مەن وقىتۋشىلاردىڭ, كونتسەرتمەيستەرلەر مەن ادىسكەرلەردىڭ, عالىمدار مەن بالەت ارتىستەرىنىڭ باسىن قوستى. اتاپ ايتساق, كەڭ اۋقىمدى حالىقارالىق شاراعا قازاقستان, رەسەي, باشقۇرستان, قىرعىزستان, وزبەكستان, بۋرياتيا, ياكۋتيا جانە وڭتۇستىك كورەيا حورەوگرافيالىق وقۋ ورىندارىنىڭ كاسىبي بي ۇجىمدارى مەن ستۋدەنتتىك ۇجىمدارى قاتىسۋدا.
حالىقارالىق ونەر مەرەكەسىنىڭ اشىلۋ سالتاناتىندا داريا دميتريەۆا (ياكۋتيا), ليۋدميلا مەرگەنەۆا (بۋرياتيا), گاينيكامال بەيسەنوۆا (قازاقستان) شىعارماشىلىق جاستاردىڭ تالانتىن دامىتۋعا باعىتتالعان اۋقىمدى ءبىلىم بەرۋ باعدارلاماسى تۋرالى, بۇگىنگى زاماناۋي بالەت ونەرىنىڭ باعىت-باعدارى تۋرالى قىسقاشا ءسوز سويلەدى. بالەت شەبەرلەرى تاجىريبەسىمەن ءبولىسىپ, جەكە شەبەرلىك سىنىپتارى اياسىندا ءوز ەلدەرى مەن وڭىرلەرىندەگى بالەت مەكتەپتەرىن تانىستىردى.
بالەت مەكتەپتەرىنىڭ V فەستيۆالىنىڭ باعدارلاماسى ءىس-شارالارعا اسا باي بولدى. فەستيۆال قوناقتارى ءۇش كۇن بويى ءتۇرلى تاقىرىپتار مەن جانرلارداعى شارالاردى تاماشالاپ, بالەت تۋرالى تانىمىن كەڭەيتتى. اتاپ ايتقاندا, «ۆرەميون سۆيازۋيۋششايا نيت» اتتى تاقىرىپتاعى قازاق ساحنالىق كيىمىنىڭ ەكسپوزيتسياسى, گ. قاپانوۆانىڭ «بيگە جول» فوتوەكسپوزيتسياسى, جاس اۆتور ناتالي-رامينتى باراۋسكايتەنىڭ «بي بوياۋلارى» اتتى كوركەم كورمەسى, «جاھاندانۋ داۋىرىندەگى زاماناۋي ونەر جانە ءبىلىم» كونفەرەنتسياسى, «مەكتەپتىڭ تۇساۋكەسەرى جانە حورەوگرافيالىق ءبىلىم بەرۋدىڭ دامۋ بولاشاعى – XXI عاسىر بالەتى» اتتى دوڭگەلەك ۇستەل, «ا.سەلەزنەۆ اتىنداعى الماتى حورەوگرافيالىق ۋچيليششەسىنىڭ بۇگىنى» اتتى ءفيلمىنىڭ تۇساۋكەسەرى بولىپ ءوتتى.
«ورلەۋ» V حالىقارالىق بالەت مەكتەپتەرىنىڭ فەستيۆالى بۇگىن, 18:30-دا اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ساحناسىندا وتەتىن گالا-كونتسەرتپەن اياقتالادى.
بۇعان قوسا, ءۇش كۇنگە سوزىلعان فەستيۆالدىڭ ۇلتتىق يۋنەسكو كلۋبتارى فەدەراتسياسى, «پەتروقازاقستان», «بالەت پەن ۇلتتىق ءبيدى دامىتۋ جانە قولداۋ» قورى, سونداي-اق اباي اتىنداعى ماوبت-ىڭ قولداۋىمەن وتكەنىن دە ايتا كەتكەنىمىز ءلازىم.