سارسەنبى, 6 ناۋرىز 2013 6:29
قىس. بيىل اۋا رايى قۇبىلىپ تۇر. جانايىم ۇيىنە جەتكەنشە اسىعىپ كەلەدى. ايالدامادا كىسى كوپ ەكەن. بىرەۋى وتىرسا, ەكىنشىسى ءتۇسىپ, ساپىرىلىسىپ جاتىر. كەشىكپەي مۇنىڭ كۇتكەن كولىگى دە جەتتى. جىلى دا جايلى اۆتوبۋستىڭ جۇمساق ورىندىعىنا جايعاسقاننان كەيىن كادىمگىدەي بۋىندارى بوساپ, ماۋجىراي باستادى. ول ءوزىنىڭ قاتتى شارشاعانىن ەندى عانا سەزىندى. تاڭەرتەڭنەن تىزە بۇككەن جوق ەدى. اۆتوبۋس ءالى ءبىراز جۇرەدى. بۇل ەكى كوزىن تارس جۇمىپ, وي قۇشاعىنا ەرە بەردى.
سارسەنبى, 6 ناۋرىز 2013 6:29
قىس. بيىل اۋا رايى قۇبىلىپ تۇر. جانايىم ۇيىنە جەتكەنشە اسىعىپ كەلەدى. ايالدامادا كىسى كوپ ەكەن. بىرەۋى وتىرسا, ەكىنشىسى ءتۇسىپ, ساپىرىلىسىپ جاتىر. كەشىكپەي مۇنىڭ كۇتكەن كولىگى دە جەتتى. جىلى دا جايلى اۆتوبۋستىڭ جۇمساق ورىندىعىنا جايعاسقاننان كەيىن كادىمگىدەي بۋىندارى بوساپ, ماۋجىراي باستادى. ول ءوزىنىڭ قاتتى شارشاعانىن ەندى عانا سەزىندى. تاڭەرتەڭنەن تىزە بۇككەن جوق ەدى. اۆتوبۋس ءالى ءبىراز جۇرەدى. بۇل ەكى كوزىن تارس جۇمىپ, وي قۇشاعىنا ەرە بەردى.
…وسىدان تۋرا ءۇش جىل بۇرىن جانايىم مەن جۇبايى نۇرجاننان باقىتتى جان جوق ەدى. ەندى سول ساتتەر كورگەن تۇستەي, ەلەس تە بەرمەيدى. ول كەزدەرى جانايىم ايەل ادام دا جۇمىس ىستەۋگە ءتيىس دەپ ويلامايتىن. ونىڭ ويىنشا ايەلدىڭ باستى مىندەتى – ۇيدە وتىرىپ بالا تاربيەلەۋ. ويلاماعان جەردەن وتباسىنىڭ ويرانى شىقتى. ەرلى-زايىپتىلار ءبىرىن-ءبىرى كورمەستەي بولىپ, ەكى جاققا كەتە باردى. ءۇش بالا انالارىنا ەردى. قازىر تورتەۋى وسى قالادا پاتەر جالداپ تۇرىپ جاتىر. نۇرجان سودان بەرى قاراسىن كورسەتكەن ەمەس. اليمەنت تولەتەدى دەپ قاۋىپتەنە مە ەكەن, بۇلاردان جاسىرىنىپ جۇرگەن سياقتى. ءتىرى جان ەمەس پە, وعان قاراپ, الاقان جايعالى وتىرعان جانايىم جوق. قۇدايعا شۇكىر, جۇمىس ىستەيدى, جاس كەزىندە اسپازدىققا وقىپ ەدى, كادەگە جارادى. تەك, جۇرەگى قۇرعىر, سوڭعى كەزدەرى ءجيى مازالاپ ءجۇر. شانشىپ-شانشىپ كەتكەندە, شىبىن جانىن قويارعا جەر تاپپاي قالاتىنى بار. دارىگەرلەرگە كورىنىپ ەدى, الاي قاراپ, بىلاي قاراپ, كوميسسياعا سالدى. مۇگەدەكتىك بەرەمىز, كۇتىنۋىڭىز كەرەك دەدى. شوشىندى. بىراق. قايدا بارادى؟!كوندۋكتوردىڭ «جاستار كافەسى» دەگەن ءسوزى ونىڭ ويىن ءبولىپ جىبەردى. اۆتوبۋس الگىندەي بولعان جوق, ۇزاي بەردى. ول دەمىن الىپ الدى دا ۇيىنە بەتتەدى. وسىنداي دا قولىنداعى دورباسىنىڭ سالماعى دا سەزىلىپ قالادى. ەكىنشى قاباتقا كوتەرىلدى. ەسىكتى قاعۋى مۇڭ ەكەن, ار جاقتان كەنجەسى زارينانىڭ «بۇل كىم؟» دەگەن ءتاتتى داۋىسى ەستىلدى. بۇدان كەيىن انانىڭ بار شارشاعانى باسىلىپ, بويىن تىكتەپ الدى.تابالدىرىقتان اتتار-اتتاماستا تەل وسكەن ءامينا مەن زارينا اناسىنىڭ قولىنداعى دوربانى الىپ, اس ۇيگە قاراي جۇگىردى. ال, ءبارىن تۇسىنەتىن جازيرا بولسا اناسىنىڭ اياق كيىمىن شەشىپ, دايىنداپ قويعان جىلى سۋدى ىڭعايلاپ, جۋىنىپ ال, شارشاعان شىعارسىڭ دەپ بايەك بولىپ جاتىر.بۇل تاڭ اتا جۇمىسقا كەتەدى دە وسىلاي قاس قارايعاندا ءبىر-اق كەلەدى. بالالارىن كۇنى بويى كورمەيدى. «بۇگىن نە بىتىردىڭدەر؟» دەۋى مۇڭ ەكەن ۇشەۋى ءۇش جاقتان جامىراي جونەلدى. وزدەرى ساباققا زەرەك. «بەس الدىق» دەيدى. «ءوي, ق ۇلىندارىم-اۋ, قاناتتارىم-اۋ!». انا ەمىرەنىپ, ءۇش ق ۇلىنشاعىن باۋىرىنا باستى.داستارقاننىڭ ءبىر كۇندىك ىرىسى مەن ىرزىعىنا ريزاشىلىقپەن اس قايىرعان جانايىم ورنىنان تۇرىپ, كەنجەلەرى ءامينا مەن زارينانىڭ ساباعىن وقىتۋعا كىرىسىپ, قوس قۋانىشىنىڭ ەرتەڭ ساباققا كيەر كيىمىن ازىرلەي بەرگەنى سول ەدى, كوزى اياق كيىم سالعىشقا ءتۇستى. جاقىنداي كەلىپ, كىشكەنتايلارىنىڭ ءباتىڭكەلەرىنىڭ تابانى توزىپ قالعانىن اڭعاردى. ول اۋىر كۇرسىندى.قالىڭ كورپەنىڭ استىندا زاريناسىن مەيىرلەنە يىسكەپ جاتقان انانىڭ ەرتەڭىن ويلاپ, كوپكە دەيىن كوزى ىلىنبەدى. «كومىر تاۋسىلىپ بارادى, سۋدىڭ, جارىقتىڭ اقشاسىن تولەۋ كەرەك. قىزدارعا جىلى كيىم قاجەت. شىركىن, ءبىر تۇراقتى جۇمىس تابىلسا عوي…».جانايىم كوزىن اشقاندا قاسىندا جازيراسى وتىر ەكەن. «تاعى جۇرەگىڭ قىستى ما, زارەمىزدى الدىڭ عوي», دەدى ول.ءيا, جۇرەگىنىڭ شانشىپ كەتەتىنى بار. سودان ءبىر ءتۇرلى قورقادى.تاڭ اتىپ قالعان ەكەن. ول تەز-تەز ورنىنان تۇردى دا تاڭەرتەڭگى تاماقتىڭ قامىنا كىرىسىپ كەتتى. تۇسكى استى دا بىرىڭعايلاپ كەتپەسە بولمايدى. وسى كەتكەننەن كەشكە ءبىر-اق ورالادى. ون ەكى جاسار جازيرا ءۇي شارۋاشىلىعىنا تياناقتى بولعانىمەن, اناسى وعان ءالى ەرتە دەپ اس دايىنداتپايدى. داستارقان باسىنا ءبارى جينالىپ, تاڭعى شايلارىن ىشكەننەن كەيىن اناسى قىزدارىن ساباققا شىعارىپ سالدى. ءوزى دە جۇمىسقا جينالا باستادى. كوزى تاعى دا ءامينانىڭ ەسكى باتەڭكەسىنە ءتۇسىپ كەتتى…ول ايالدامادا كوپ تۇرعان جوق. اۆتوبۋسقا وتىرعانى سول ەدى, جۇرەگى قۇرعىر تاعى شانشىپ كەتتى. دارىگەرگە كورىنۋ كەرەك سياقتى. «جوق. قازىر ەمەس, بالالار نە بولادى؟! جۇمىسقا كىرگەنى سول. اۋرۋ ادامدى كىم ۇستايدى. شىداۋ كەرەك. قايتكەندە دە شىداۋ كەرەك…».گۇلناز بيسەن.