ەلباسى نۇرسۇلتان نازارباەۆتىڭ اتىنا قازاقستان رەسپۋبليكاسىنىڭ پرەزيدەنتى وكىلەتتىگىن توقتاتۋىنا بايلانىستى قازىرگى ءجانە بۇرىنعى مەملەكەتتەر باسشىلارىنان جەدەلحاتتار مەن حاتتار كەلىپ تۇسۋدە.
ۇلىبريتانيا پرەمەر-مينيسترى تەرەزا مەيدىڭ حاتىندا نۇرسۇلتان نازارباەۆتىڭ باسشىلىعىمەن قازاقستاننىڭ ءوسىپ-ءوركەندەگەن مەملەكەتكە اينالعانى جانە بۇكىل الەم بويىنشا سەرىكتەستەرى بار ەكەنى اتاپ وتىلگەن.
« ۇلىبريتانيا ءۇشىن سىزدەرمەن ارىپتەس بولۋ – زور مارتەبە. ءسىزدىڭ باسشىلىعىڭىزبەن ۇلىبريتانيا مەن قازاقستان اراسىنداعى قارىم-قاتىناستار دايەكتى دامىپ كەلەدى. الداعى جىلدارى ستراتەگيالىق سەرىكتەستىگىمىز نىعايعان سايىن ەلدەرىمىزدىڭ دوستىعى ارتا تۇسەدى دەپ سەنەمىن», دەلىنگەن حاتتا.فرانتسيا پرەزيدەنتى ەمانۋەل ماكرون جەكە ءوزىنىڭ جانە فرانتسۋز حالقىنىڭ اتىنان نۇرسۇلتان نازارباەۆقا ەل دامۋىنىڭ جاڭا كەزەڭىندە تابىسقا جەتە بەرۋىنە تىلەكتەستىك بىلدىرگەن.
«تاۋەلسىز قازاقستاننىڭ ءجۇرىپ وتكەن جولىن ۇلگى تۇتارلىق دەۋگە بولادى. ءسىزدىڭ باسشىلىعىڭىزبەن جانە ءوزىڭىز تاربيەلەگەن جاڭا كادرلاردىڭ ارقاسىندا ەلدەرىڭىز ءىرى مەملەكەت رەتىندە قالىپتاستى. وزەكتى حالىقارالىق ماسەلەلەرگە قاتىستى سىندارلى ۇستانىمى قازاقستاندى الەمدىك دەڭگەيدەگى ماڭىزدى ەلگە اينالدىردى», دەلىنگەن جەدەلحاتتا.
ءۇندىستاننىڭ پرەمەر-مينيسترى نارەندرا مودي ءوزىنىڭ حاتىندا نۇرسۇلتان نازارباەۆتىڭ الداعى ۋاقىتتا دا ءۇندىستان مەن قازاقستان اراسىنداعى قاتىناستاردى نىعايتا تۇسەتىنىنە سەنىم ءبىلدىرگەن.«قازىرگى زامانعى تاريحتا كوشباسشىنىڭ جاڭادان قۇرىلعان مەملەكەتتى زاماناۋي مىقتى ەلدەر سياقتى وركەندەتىپ, العا جەتەلەپ شىعارعان مىسالدارى از. ونداي كوشباسشىلاردىڭ اسا كورنەكتى مەملەكەت قايراتكەرىنە اينالعان مىسالدارى دا سيرەك. تانىمال كوشباسشىنىڭ ءوز ەركىمەن وكىلەتتىگىن توقتاتۋى ودان دا سيرەك كەزدەسەدى. قازاقستاندى سوڭعى وتىز جىلعا جۋىق باسقارىپ, بيلىك تىزگىنىن ۇستايتىن باسشىلاردىڭ جاڭا بۋىنىن تاربيەلەۋ جونىندەگى شەشىمىڭىز ارقىلى پاراساتتىلىق تانىتتىڭىز», دەلىنگەن حاتتا.
كانادانىڭ بۇرىنعى پرەمەر-ءمينيسترى جان كرەتەن ءوزىنىڭ حاتىندا ەلباسىنىڭ جانە قازاقستان رەسپۋبليكاسىنىڭ اتىنا ىزگى تىلەگىن جەتكىزگەن.
«حالىقارالىق قوعامداستىق ءسىزدىڭ جاھاندىق بەيبىتشىلىك پەن قاۋىپسىزدىكتى نىعايتۋ ىسىنە قوسقان ۇلەسىڭىزدى جوعارى باعالايدى. ءسىز دانا ساياساتىڭىزدىڭ ارقاسىندا ەلىڭىزدە تۇراقتىلىقتى جانە ورنىقتى ەكونوميكالىق دامۋدى قامتاماسىز ەتتىڭىز», دەلىنگەن جەدەلحاتتا.