لينگۆيستيكالىق كوميسسيانىڭ قۇرامى ورتالىق سايلاۋ كوميسسياسىنىڭ 2015 جىلعى 27 اقپانداعى قاۋلىسىنا ءوزگەرىستەر ەنگىزۋمەن جاڭارتىلعان بولاتىن. وندا ورتالىق سايلاۋ كوميسسياسىنىڭ جانىنداعى لينگۆيستيكالىق كوميسسيانىڭ قۇرامى بەكىتىلىپ, فيلولوگيا عىلىمدارىنىڭ دوكتورى, پروفەسسور, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى تۇركىتانۋ كافەدراسىنىڭ مەڭگەرۋشىسى (كەلىسىم بويىنشا) مىرزاتاي جولداسبەكوۆ توراعا بولىپ تاعايىندالدى.
وسىعان وراي كوميسسيا ءمۇشەلەرى وزدەرىنىڭ جۇمىسىنا قاتىستى ۇيىمداستىرۋ ماسەلەلەرىن, «قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءراسىمى تۋرالى» ورتسايلاۋكومنىڭ 2005 جىلعى 31 تامىزداعى قاۋلىسىمەن ايقىندالاتىن قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءراسىمىن تالقىلادى.
وسى قاۋلىعا سايكەس مەملەكەتتىك ءتىلدى ەركىن مەڭگەرگەندىگىن انىقتاۋ ءۇشىن الدىمەن لينگۆيستيكالىق كوميسسيا ۇسىنعان تاقىرىپقا كولەمى ەكى بەتتەن اسپايتىن جازباشا تاپسىرما جازۋ بەرىلەدى. ودان كەيىن كولەمى ءۇش بەتتەن اسپايتىن باسپا ءماتىنىن وقۋ ۇسىنىلادى. ال لينگۆيستيكالىق كوميسسيا ۇسىنعان تاقىرىپقا ساي كوپشىلىك الدىندا ءسوز سويلەۋگە كەمىندە ون بەس مينۋت ۋاقىت بەرىلەدى. بۇل تۋرالى مىرزاتاي جولداسبەكوۆ:
«قازاقستان رەسپۋبليكاسىنىڭ پرەزيدەنتىن سايلاۋ قارساڭىندا لينگۆيستيكالىق كوميسسيا قۇرىلادى. وسىعان وراي بۇگىن ءبىز ءبىرىنشى ءماجىلىستى وتكىزدىك. اتالعان كوميسسيا ءتوراعاسى ەتىپ مەنى تاعايىندادى. كوميسسيا حاتشىسى بولىپ پەداگوگيكا عىلىمدارىنىڭ دوكتورى, پروفەسسور, «نازارباەۆ ۋنيۆەرسيتەت» دببۇ «رۋحاني جاڭعىرۋ» مادەني ورتالىعىنىڭ ديرەكتورى گۇلتاس قۇرمانباي بەكىتىلدى. جالپى زاڭ بويىنشا پرەزيدەنتتىككە كانديدات ءوزىنىڭ مەملەكەتتىك ءتىلدى ەركىن مەڭگەرگەندىگى جونىندە ەمتيحان تاپسىرادى. ەمتيحان ءۇش كەزەڭنەن تۇرادى. الدىمەن جازباشا وتەدى. ول ءۇش بەتتەن اسپاۋى ءتيىس. جازۋعا ءبىر ساعات ۋاقىت بەرىلەدى. ەگەر كانديدات وسى ۋاقىت ىشىندە ۇلگىرە المادىم دەسە, وعان تاعى جارتى ساعات ۋاقىت قوسىلادى. مۇنان سوڭ كوميسسيا مۇشەلەرى ول جازبانى مۇقيات تەكسەرەدى. ەكىنشى كەزەڭدە كانديدات سول كوميسسيا ۇسىنعان ءماتىندى وقيدى. ول تاقىرىپتاردى لينگۆيستيكالىق كوميسسيا الدىن الا بەكىتەدى. سونى پرەزيدەنتتىككە كانديدات ءوزى تاڭداپ الىپ, 15 مينۋت وقيدى. كوميسسيا مۇشەلەرى ونى مۇقيات تىڭدايدى. كانديدات ەركىن وقۋى ءتيىس. ءۇشىنشى كەزەڭدە ۇمىتكەر كوميسسيا الدىندا ءسوز سويلەيدى.ونىڭ دا تاقىرىبى بەكىتىلگەن. پرەزيدەنتتىككە كانديدات ەلدىڭ تاريحىن, مادەنيەتىن, تاۋەلسىز قازاقستاننىڭ بارلىق جەتىستىكتەرىن تولىق ءبىلۋى ءتيىس. مۇنىڭ ءبارىن كوميسسيا مۇشەلەرى جان-جاقتى تالقىلايدى», دەدى.
ال لينگۆيستيكالىق كوميسسيانىڭ وتىرىسىنا ونىڭ ءمۇشەلەرى مەن پرەزيدەنتتىككە كانديداتتان باسقا, ورتالىق سايلاۋ كوميسسياسىنىڭ مۇشەلەرى بايقاۋشىلار رەتىندە قاتىسۋعا قۇقىلى. لينگۆيستيكالىق كوميسسيانىڭ شەشىمى كوميسسيا مۇشەلەرى سانىنىڭ كوپشىلىك داۋىسىمەن اشىق داۋىس بەرۋ ارقىلى قابىلدانىپ, وتىرىس حاتتاماسىمەن رەسىمدەلەدى جانە وتىرىسقا قاتىسىپ وتىرعان ورتالىق سايلاۋ كوميسسياسىنىڭ مۇشەسىنە دەرەۋ بەرىلەدى.
وسىلاي دەپ وتىرىستى قورىتىندىلاعان لينگۆيستيكالىق كوميسسيا مۇشەلەرى ءوزدەرىنىڭ جۇمىسى اشىق جانە جاريالى تۇردە جۇزەگە اسىرىلاتىنىن, بۇقارالىق اقپارات قۇرالدارى كانديداتتاردىڭ ارقايسىسى بويىنشا شەشىم قابىلداۋ پروتسەسىن بايقاۋعا مۇمكىندىك الاتىنىن اتاپ ءوتتى.