جاڭا كىتاپتىڭ تۇساۋكەسەرى ءوتتى

كىتاپتىڭ تۇساۋىن 100 جانە 101 -ءشى دەربەس ۇلتتىق اتقىشتار بريگاداسىنىڭ سوڭعى جاۋىنگەرى-ساتىلعان بەكماعامبەتوۆ  كەستى. كەشتى «رجەۆتە ەرلىك داڭقى قايتا جاڭعىرادى» اتتى كىتابىنىڭ اۆتورى عالىمجان بايدەربەس اشىپ,  جيناقپەن قىسقاشا تانىستىرىپ ءوتتى. ول 1942 جىلدىڭ 25 قاراشاسىندا رجەۆ-زۋبتسوۆو-سىچەۆكا-گجاتسك-ۆيازما-بەلىي-ولەنين اۋماعىندا باستالعان «مارس» وپەراتسياسىنا قاتىسقان قازاقستاندىق 100 جانە 101 -ءشى دەربەس ۇلتتىق اتقىشتار بريگاداسى جاۋىنگەرلەرى تۋرالى ايتا كەلىپ, تاريحتا «رجەۆ كاندى بۇرىشى» اتاۋىمەن قالعان وسى ءۇشبۇرىشتىڭ اقىرعى نۇكتەسى - ولەنين اۋدانىنىڭ ميشۋكوۆو, زايتسەۆو, ولەنينو, مولودوي تۋد دەرەۆنيالارىن ازات ەتكەن قوس بريگادانىڭ جورىق جولىمەن بارعان اقتوبەلىك دەلەگاتسيانىڭ رجەۆ قالاسى, ولەنين اۋدانىنداعى كەزدەسۋلەرى قامتىلعانىن, سونىمەن بىرگە مەرزىمدى باسىلىمداردا جارىك كورگەن مايدانگەرلەر ەستەلىكتەرى, رەسەيلىك جانە قازاكستاندىق ولكەتانۋشىلار, تاريحشىلار, ىزدەۋ وتريادتارى مۇشەلەرىنىڭ دەرەكتەرى دە بار دەپ كورسەتىپ ءوتتى. شاراعا ەسىمدەرى ولكەگە تانىمال قالامگەرلەر مەن كىتاپحانا وقىرماندارى جانە رجەۆ قالاسىنا قوس بريگادانىڭ جورىق جولىمەن بارعان اقتوبەلىك دەلەگاتسيا مۇشەلەرى  قاتىستى. ولار 100 جانە 101-ءشى دەربەس ۇلتتىق اتقىشتار بريگاداسىنىڭ سوڭعى جاۋىنگەرى ساتىلعان بەكماعامبەتوۆ, «رجەۆتە ەرلىك داڭقى قايتا جاڭعىرادى» اتتى كىتابىنىڭ ادەبي رەداكتورى, بەلگىلى جۋرناليست بايان قۋاندىققىزى, اقتوبە وبلىسىنىڭ قوعامدىق-ساياسي كەڭەس توراعاسىنىڭ ورىنباسارى, بەلگىلى اقىن, رەسپۋبليكالىق «ادىرنا» جۋرنالىنىڭ باسشىسى, كوسەمسوز شەبەرى مەيىرحان اقداۋلەت ۇلى, اقتوبەدە جاساقتالعان 101 بريگاداعا تىركەلگەن بالقاسىم كەنجەگاريننىڭ ۇرپاعى اسلان بالقاسىموۆ.     «ەرباقىت» سپورتتىق پاتريوتتىق كلۋبىنىڭ توراعاسى مارات قويلىباەۆ, دەلەگاتسيا مۇشەسى, ۇلى وتان سوعىسىنىڭ ارداگەرى كۋجيەۆ ەرمات تيموفەەۆيچتىڭ قىزى كۋجيەۆا اليما ەرماتقىزى, قالامىزداعى جوعارعى جانە ارناۋلى وقۋ ورىندارىنىڭ ستۋدەنتتەرى مەن مەكتەپ وقۋشىلارى بولدى. كەش بارىسىندا رجەۆ قالاسىنا قوس بريگادانىڭ جورىق جولىمەن بارعان اقتوبەلىك دەلەگاتسيا مۇشەلەرى اقىن مەيىرحان اقداۋلەت ۇلى, كۋجيەۆا اليما ەرماتقىزى وزدەرىنىڭ ساپارلارى تۋرالى اسەرلى اڭگىمەلەرىن ايتتى. ع.جۇبانوۆا اتىنداعى وبلىستىق فيلارمونيانىڭ ءانشىسى ماقاشەۆ ايباتتىڭ ورىنداۋىندا ۇوس كەزىندەگى اندەر تىڭدارمان جۇرەگىنەن ورىن الدى. تۇساۋكەسەر كەشىنە ارنالىپ 101 ۇلتتىق دەربەس اتقىشتار بريگاداسىنىڭ جورىق جولدارى جانە باتىلدىقتىڭ ەرەن  ۇلگىسى تۋرالى فوتو-شەجىرە, سلايد كورسەتىلىپ, «ەرلىك داڭقى وشپەيدى» اتتى  كىتاپ كورمەسى ۇيىمداستىرىلدى.

            ولكەتانۋ بولىمشەسىنىڭ كىتاپحاناشىسى