جيىندى اشقان قارمۋ-دىڭ رەكتورى ازامات ەدريسوۆ پرەزيدەنتتىك ينستيتۋتتىڭ تاريحىنا توقتالىپ, ونىڭ ەلىمىز ءۇشىن كۇردەلى ساياسي جانە ەكونوميكالىق جاعدايدا دامىعانىن اتاپ ءوتتى.
– 1990 جىلدىڭ 24 ساۋىرىندە قازاق كسر جوعارعى كەڭەسى «پرەزيدەنت لاۋازىمىن تاعايىنداۋ تۋرالى» زاڭدى قابىلدادى. سول كەزدە قازاقستاندا تۇبەگەيلى وزگەرىستەردىڭ مىقتى تۇلعاسىز جانە ءتيىمدى باسقارۋ ينستيتۋتىنسىز ىسكە اسۋى مۇمكىن ەمەس ەدى, دەدى ول.
سونىمەن قاتار, رەكتور قازىرگى ۋاقىتتا پرەزيدەنتتىك باسقارۋ نىسانى بىرتىندەپ تۇرلەنە وتىرىپ, پارلامەنتتىڭ جانە بيلىكتىڭ باسقا دا تارماقتارىنىڭ وكىلەتتىكتەرىن كۇشەيتۋگە باعىت العانىن اتاپ ءوتتى. «9 ماۋسىمعا بەلگىلەنگەن پرەزيدەنتتىك سايلاۋ ەلىمىزدە باستالعان دەموكراتيالىق رەفورمالاردىڭ جالعاسۋىن كورسەتەدى», دەدى ا.ەدريسوۆ.
كونفەرەنتسياعا قاتىسۋشىلار تۇڭعىش پرەزيدەنت نۇرسۇلتان ءابىش ۇلى نازارباەۆ باستاماشى بولعان جانە جۇزەگە اسىرعان وراسان زور وزگەرىستەردىڭ قازاقستاندى بۇكىل الەمگە تانىمال جانە ورتالىق ازيا اۋماعىنىڭ كوشباسشىسى بولعانىن قامتاماسىز ەتكەنىن اتاپ ءوتتى.
قايرات ءابىلدا,
«Egemen Qazaqstan»