بەيسەنبى, 14 ماۋسىم 2012 7:12
جاقىندا لوندوندا حالىقارالىق اۋەسقوي بوكس قاۋىمداستىعى الەمدەگى ايگىلى ءۇش بوكسشىمەن ايبا-نىڭ ارۆ (AIBA Professional Boxing) جوباسى بويىنشا كەلىسىم-شارتقا قول قويدى. بۇل كەلىسىم-شارت قازاقستاننان ەكى دۇركىن الەم چەمپيونى سەرىك ساپيەۆپەن, ازەربايجاننىڭ اسا اۋىر سالماقتاعى بوكسشىسى, الەم چەمپيونى ماگومەدراسۋل مەدجيدوۆپەن جانە كورەيا وكىلى دجونگ-حۋن شينمەن جاسالدى.
بەيسەنبى, 14 ماۋسىم 2012 7:12
جاقىندا لوندوندا حالىقارالىق اۋەسقوي بوكس قاۋىمداستىعى الەمدەگى ايگىلى ءۇش بوكسشىمەن ايبا-نىڭ ارۆ (AIBA Professional Boxing) جوباسى بويىنشا كەلىسىم-شارتقا قول قويدى. بۇل كەلىسىم-شارت قازاقستاننان ەكى دۇركىن الەم چەمپيونى سەرىك ساپيەۆپەن, ازەربايجاننىڭ اسا اۋىر سالماقتاعى بوكسشىسى, الەم چەمپيونى ماگومەدراسۋل مەدجيدوۆپەن جانە كورەيا وكىلى دجونگ-حۋن شينمەن جاسالدى.
بۇل قول قويۋ ءراسىمى ءبىزدىڭ ەلدەن لوندونعا WSB (بۇكىلالەمدىك بوكس سەرياسى) جوباسى اياسىندا اسا اۋىر سالماقتاعى حورۆاتيالىق فيليپپ حرگوۆيچپەن قولعاپ ءتۇيىستىرۋ ءۇشىن بارعان رۋسلان مىرساتاەۆتىڭ كەزدەسۋىنىڭ باستالۋىنا ءبىر ساعات قالعاندا وتكەن. ال وسى كەزدەسۋدە مىرساتاەۆتىڭ قارسىلاسىنان جەڭىلىپ قالعانى بەلگىلى.
ال الداعى كەزدە جاڭا جوبا اياسىندا ونەر كورسەتەتىن بوكسشىلارعا كەلسەك, ءوزىمىزدىڭ سەرىك ساپيەۆ 28 جاسىندا ءتورت الەم چەمپيوناتىنا قاتىسقان بوكسشى. سونىڭ ەكەۋىندە – 2005, 2007 جىلدارى چەمپيون بولسا, 2009 جىلى قولا مەدالعا, ال بىلتىر كۇمىس جۇلدەگە يە بولعان. قازىر ول باس باپكەر مىرزاعالي ايتجانوۆتىڭ جەتەكشىلىگىمەن لوندون وليمپياداسىنا دايىندالۋدا.
سەرىكتىڭ ءوزى حالىقارالىق اۋەسقوي بوكس قاۋىمداستىعىنىڭ جاڭا جوباسى بويىنشا مىناداي پىكىر بىلدىرگەن ەكەن.
– بۇگىندە اۋەسقوي بوكستا بىلعارى قولعابىن شەگەگە ءىلىپ, شارشى الاڭعا مۇلدەم جاقىنداماي كەتكەن تالانتتى بوكسشىلار كوپ. قازىر ءبىزدىڭ ارامىزدا دا, سول بويىنداعى كۇش-قۋاتىن دەر كەزىندە جۇمساي الماي, جاسى كەلگەندە رينگتەن كەتكەن بوكسشىلار از ەمەس. مەن ولاردىڭ ءبارىن ايتپاي-اق قويايىن. سول بوكسشىلارعا ايبا-نىڭ كاسىپقوي بوكس جوباسى دەر كەزىندە ۇسىنىلعاندا ولار, ءسوز جوق, شارشى الاڭنىڭ شاڭىن ءالى ءبىراز ۋاقىت قاعار ەدى. ال ەندى ءوزىم وسى جوباعا كەلگەنىمە ەش وكىنبەيمىن. بۇل جوبا ماعان وتە ۇنادى. بۇل – بوكسشىنىڭ اۋەسقوي رينگتەن كەتكەننەن كەيىنگى الەۋمەتتىك-تۇرمىستىق جاعدايىن جاقسارتۋعا, سپورتتاعى جەتىستىكتەرىن جالعاستىرۋعا, بولاشاعىن قامتاماسىز ەتۋگە, ەڭ باستىسى, ول ايبا مەن ۇلتتىق بوكس فەدەراتسيالارىنىڭ بىرىگىپ جۇمىس ىستەۋىنە جاسالعان جوبا.
جالپى ايتقاندا, ايبا-نىڭ كاسىپقوي بوكس جوباسى – ونىڭ بۇكىلالەمدىك بوكس سەرياسىنان باسقا جاساعان ءۇشىنشى جوباسى. ەگەر بۇكىلالەمدىك بوكس سەرياسىندا (WSB) كوماندالار مەن رەيتينگ بويىنشا ۇزدىك شىققان بوكسشىلار اراسىندا جەكەلەگەن چەمپيوناتتار وتكىزىلسە, ارۆ (ايبا-نىڭ كاسىپقوي بوكسى) جوباسى بوكسشىلاردىڭ اۋەسقوي رينگتەن كەتىپ, WSB سەرياسى سياقتى وليمپيادا جولداماسىنا تالاسا الادى.
بۇل جوبانىڭ جارىستارى 2013 جىلدىڭ ءساۋىر ايىنان باستالادى.
_________________________________________
اقجولتاي!
«سامۇرىق-قازىنا» اق-تىڭ باسقارما توراعاسى ومىرزاق شوكەەۆ پەن سپورت جانە دەنە تاربيەسى ىستەرى اگەنتتىگىنىڭ توراعاسى تالعات ەرمەگياەۆ لوندوندا وتەتىن ححح جازعى وليمپيادا جانە ءحىV پاروليمپيا ويىندارىنا دايىندىق جانە قاتىسۋ شەڭبەرىندە ىنتىماقتاستىق تۋرالى مەموراندۋمعا قول قويدى.
كەزدەسۋدە «سامۇرىق-قازىنا» قورىنىڭ توراعاسى قوردىڭ وليمپياداعا ءوز بيۋدجەتىنەن 900 ملن. تەڭگە بولگەنىن ايتتى.
________________________________________
توقسان التىنشى جولداما
وسى اپتادا لوندون وليمپياداسىنا تاعى ءبىر جولداما العان سپورتشىنىڭ ەسىمى بەلگىلى بولدى. اشىق سۋدا جۇزۋدەن جالقى جولدامانى يەلەنگەن سپورتشىمىزدىڭ ەسىمى – يۋري كۋدينوۆ. ول 1979 جىلى الماتى قالاسىندا تۋعان.
كۋدينوۆ – سوڭعى كەزدەرى حالىقارالىق جانە ەلىشىلىك جارىستاردا توپ جارىپ جۇرگەن سپورتشى. سونداي جارىستاردىڭ ءبىرىندە – پورتۋگاليادا ءوتكەن الەمدىك ىرىكتەۋ تۋرنيرىندە 10-ورىن الىپ, وليمپيادا ليتسەنزياسىن يەلەندى.
ءسويتىپ, قازاقستان سپورتشىلارى العان وليمپيادا جولداماسىنىڭ سانى 96-عا جەتتى. سپورت جانە دەنە تاربيەسى ءىستەرى اگەنتتىگى ءتورت جىلدىقتىڭ باستى باسەكەسىنە 100-دەن استام ليتسەنزيانى جەڭىپ الۋدى ماقسات ەتۋدە. ليتسەنزيالىق جارىستار 9 شىلدەگە دەيىن جالعاسسا, وتانداستارىمىزدىڭ تاعى بىرنەشە جولدامانى جەڭىپ الۋعا شاماسى جەتەدى دەپ ويلايمىز.
اتلەتتەر رەيتينگپەن تاڭدالدى
مەڭدىحان ءتاپسىر, اۋىر اتلەتيكا فەدەراتسياسىنىڭ باس حاتشىسى.
جۋىردا تالدىقورعاندا اۋىر اتلەتيكادان وتكەن قازاقستان چەمپيوناتىندا 4 قىز بەن 4 جىگىتتىڭ لوندون وليمپياداسىنا جولداما العانى بەلگىلى. سولاردىڭ ىشىندە جولداما العان فارحاد حاركي مەن ارلي چونتەي تۋرالى كوپ ادامدار بىلە بەرمەيدى.
نەگىزى, ءبىزدىڭ زىلتەمىرشىلەردىڭ 8 جولدامانى جەڭىپ العانىن بىلەسىزدەر. ولاردىڭ ەسىمدەرى وسى كەزگە دەيىن بەلگىلى بولعان جوق. ويتكەنى, ءبىز ءۇش رەيتينگ بويىنشا ۇزدىك ناتيجە كورسەتىپ ءجۇرگەن زىلتەمىرشىلەردى ەل چەمپيوناتىندا تاڭداپ الۋدى ءجون كورگەن ەدىك. ءسويتىپ, ءبىرىنشى رەيتينگ حالىقارالىق اۋىر اتلەتيكا فەدەراتسياسىنىڭ ءتىزىمى, ەكىنشىسى باپكەرلەر كەڭەسىنىڭ رەيتينگى جانە ءۇشىنشىسى ۇلتتىق قۇراما باس باپكەرىنىڭ كەڭەسشىسى ءانۋار تۇركەلەريدىڭ رەيتينگىسى بويىنشا تاڭداپ الىناتىن بولىپ شەشىلدى. جاسىراتىن نەسى بار, ەل چەمپيوناتىندا ءبارى جاقسى ونەر كورسەتتى. الايدا, يلين مەن وتەشەۆتىڭ, حاركي مەن چونتەيدىڭ حالىقارالىق فەدەراتسياداعى رەيتينگىسى, باپكەرلەر كەڭەسىندەگى بەدەلى جاقسى بولدى. ەڭ سوڭىندا ءبىز تۇركەلەريگە قاي سپورتشىعا تاڭداۋىڭىز ءتۇستى دەپ سۇرادىق. ول جاڭاعى ءتورت جىگىتتىڭ ەسىمىن اتادى. ءسويتىپ, ءبىز بەدەلدى ماماننىڭ سوزىنە توقتاپ, وسى سپورتشىلاردى لوندونعا اپارۋدى ءجون كوردىك.
دايىنداعان
داستان كەنجالين,
«ەگەمەن قازاقستان».