سەنبى, 7 ءساۋىر 2012 7:53
استانادا بوكستان ازيا ايماعى بويىنشا ءوتىپ جاتقان حالىقارالىق ليتسەنزيالىق تۋرنيردىڭ العاشقى كۇنى موڭعوليا قۇراماسىندا ونەر كورسەتەتىن قازاق بوكسشىسىن كەزدەستىردىك.
بۇل جىگىتتى ءبىز بىلتىر موڭعوليانىڭ جىل سپورتشىسى اتانعانىنان, ال بيىل ەل چەمپيوناتىندا توپ جارىپ, باس جۇلدەنى جەڭىپ العانىنان بىلەتىنبىز. ءبىراق, ول التايدىڭ ار جاعىندا, ءبىز بەر جاعىندا بولعاننان كەيىن جاقىن اڭگىمەگە تارتۋدىڭ ءساتى تۇسپەي كەلگەن ەدى. «ىزدەگەنگە سۇراعان» دەيدى عوي, موڭعوليا قۇراماسىندا ونەر كورسەتەتىن قانداسىمىزدى استاناعا بارلىق ەلدەردەن بوكسشىلار جينالا باستاعان كەزدە ىزدەپ ءجۇرىپ تاپتىق. ونىڭ اتى سپورتسۇيەر قاۋىمعا ءبىراز تانىلىپ قالعان.
سەنبى, 7 ءساۋىر 2012 7:53
استانادا بوكستان ازيا ايماعى بويىنشا ءوتىپ جاتقان حالىقارالىق ليتسەنزيالىق تۋرنيردىڭ العاشقى كۇنى موڭعوليا قۇراماسىندا ونەر كورسەتەتىن قازاق بوكسشىسىن كەزدەستىردىك.
بۇل جىگىتتى ءبىز بىلتىر موڭعوليانىڭ جىل سپورتشىسى اتانعانىنان, ال بيىل ەل چەمپيوناتىندا توپ جارىپ, باس جۇلدەنى جەڭىپ العانىنان بىلەتىنبىز. ءبىراق, ول التايدىڭ ار جاعىندا, ءبىز بەر جاعىندا بولعاننان كەيىن جاقىن اڭگىمەگە تارتۋدىڭ ءساتى تۇسپەي كەلگەن ەدى. «ىزدەگەنگە سۇراعان» دەيدى عوي, موڭعوليا قۇراماسىندا ونەر كورسەتەتىن قانداسىمىزدى استاناعا بارلىق ەلدەردەن بوكسشىلار جينالا باستاعان كەزدە ىزدەپ ءجۇرىپ تاپتىق. ونىڭ اتى سپورتسۇيەر قاۋىمعا ءبىراز تانىلىپ قالعان. دەسەك تە ايتا كەتەيىك. ونىڭ اتى-ءجونى – ەربولات تولەك. 1990 جىلى 25 قاراشا كۇنى بايان-ولگەي قالاسىندا تۋعان. بوكسپەن اينالىسقانىنا ەكى-اق جىلداي ۋاقىت بولىپتى. العاشقى كەزدە كۇرەسپەن اينالىسقان ەكەن. كۇرەس بولعاندا قازاق كۇرەسىنەن باسقاسىنىڭ بارىمەن اينالىسقانمىن دەيدى. 2010 جىلى بىلعارى قولعاپتى كيىپ, اسكەريلەردىڭ ورتالىق سپورت كلۋبىندا بوكسپەن اينالىسا باستاعان ەكەن. العاشقى باپكەرى قاينار قايساناي دەگەن ازامات بولىپتى. ال قازىر ۇلتتىق قۇرامانىڭ باس باپكەرى گانزاريگ تيميۋدورجدىڭ قاراماعىندا جاتتىعادى.
– قاينار قايساناي – ءبايولكەلىك باپكەر. مەنى بوكسقا اكەلگەن وسى كىسى. سودان العاش رەت جاسوسپىرىمدەر اراسىندا وتكەن ەل چەمپيوناتىنا قاتىسىپ, قولا ءجۇلدەگەر اتاندىم, – دەيدى ەربولات.
قانداسىمىز كوپ سوزگە جوق, سىپايى, قاراپايىم, كىشىپەيىل, ادامدى جاقىن تارتاتىن جىگىت ەكەن. اڭگىمە كەزىندە ونىڭ اتا-اجەسىنىڭ وسىدان ءبىراز جىل بۇرىن كوكشەتاۋعا كوشىپ كەلگەنىن ءبىلدىك. ال اكە-شەشەسى, باسقا تۋىسقاندارىمەن بىرگە بايان-ولگەيدە تۇرادى ەكەن. كوشىپ كەلۋگە ويلارىڭ بار ما دەسەك, ءبىز ەندى ول جاقتا ۇيرەنىپ قالدىق قوي. بىراق, ءبارىن ءبىر اللا بىلەدى, دەيدى. ەربولاتتىڭ تاعى ءبىر ايتقانى, موڭعوليادا ودان باسقا تالانتتى ەكى بوكسشى بار ەكەن. بىرەۋى – 52 كيلوداعى ەركىن جامانتاي, ەكىنشىسى 75 كيلوداعى ىبىرايىم ءتىلەۋحان. وسى ەكەۋى بيىلعى ەل چەمپيوناتىندا قولا جۇلدەگەر اتانىپتى. ال جالپى, موڭعوليادا بوكسپەن اينالىساتىن قازاق بالالارى وتە كوپ كورىنەدى. ەربولاتتان ءبىزدىڭ قۇرامادا كىمنىڭ بوكستاسقانى ۇنايدى, ولاردىڭ ءبارىن تانيسىڭ با دەپ سۇراعان ەدىك. ءبارىن تانيتىنىن, كوبىسىمەن دوس ەكەنىن, ال بوكسشىلاردىڭ ىشىندە ەكى دۇركىن الەم چەمپيونى سەرىك ساپيەۆتىڭ ونەرى ۇنايتىنىن ايتتى. ال ءوزىنىڭ سالماعىنداعى ۆاسيلي لەۆيتتى ول سىرتتاي عانا بىلەدى ەكەن.
ەربولات استانادا ليتسەنزيا الا الماسا, وعان ەش وكىنبەيتىنىن, ءالى جاس ەكەنىن, كەلەسى جىلى قازاقستانعا تاعى كەلىپ, وسىندا وتەتىن الەم چەمپيوناتىندا بار كۇش-جىگەرىن سالاتىنىن, ال ودان كەيىن مىندەتتى تۇردە وليمپياداعا جولدامانى جەڭىپ الۋعا تىرىساتىنىن جەتكىزدى.
داستان كەنجالين.
سۋرەتتە: ە.تولەك.