2019 جىلعى 18 ءساۋىر كۇنى نۇر-سۇلتان قالاسىندا قازاقستاندىق كينەماتوگرافيستەر – مۇرات ەسجان مەن ايساۋلە ابىلداەۆانىڭ "تيىن" جانە "I' m going to Paris" درامالىق كارتينالارىنىڭ تۇساۋكەسەرى ءوتتى. ەكى فيلم دە فەستيۆال فورماتىنداعى اۆتورلىق جۇمىستار. كارتينالاردىڭ وندىرىسىمەن وتاندىق MurAi Production كومپانياسى اينالىستى. "I' m going to Paris" تۋىندىسىنىڭ پروديۋسەرى جاننا سيۋ مەمەل قىسقا مەتراجدى فيلمدەر كاتەگورياسى بويىنشا ءۇش دۇركىن "وسكار" سىيلىعىنىڭ لاۋرەاتى اتانعان.
مۇرات پەن ايساۋلە شىعارماشىلىقتارى نەگىزىندە وتباسىلىق قۇندىلىقتار يدەيالارى مەن "ساندىق" داۋىردە ءومىردىڭ ءمانىن اشۋدى كوزدەيدى, ياعني الەمدە كەيدە وبەكتيۆتى شىندىق ۆيرتۋالدى شىندىقپەن قاقتىعىسقا تۇسەتىنىن كورسەتكىسى كەلەدى. ەكى جوبانىڭ دا نەگىزگى مەسسەدجى – اركىم شىن مانىندە باقىتتى بولۋعا جانە تۋعان-تۋىسقاندارى مەن جاقىندارىنىڭ جانىندا تولىققاندى ءومىر سۇرۋگە لايىق.
كينو كورسەتىلىم ForteBank باس كەڭسەسىندە Astana Film Academy قولداۋىمەن ۇيىمداستىرىلدى. كورەرمەنگە "I'm going to Paris" ءفيلمى اعىلشىن تىلىندە, "تيىن" ءفيلمى قازاق تىلىندە ۇسىنىلدى. قوناقتارتار شارا بارىسىندا ويىن-ساۋىق باعدارلاماسىن دا تاماشالادى.
ەرلى-زايىپتى مۇرات پەن ايساۋلە ەسجان – «بولاشاق» باعدارلاماسى بويىنشا اقش-تاعى San-Francisco Film Academy بىتىرگەن قازاقستاندىق جاس كينەماتوگرافيستەر. مۇرات – كينوستسەناريست, ايساۋلە پروديۋسەر ماماندىعى بويىنشا ءبىلىم العان. ولار وقۋدان كەيىن "I' m going to Paris" دەبيۋتتىك ءفيلمىن ءتۇسىردى. بۇل كينولەنتانى تۇسىرۋگە ارنالعان قاراجاتتىڭ ءبىر بولىگى كراۋدفاندينگ ارقىلى جينالدى, ال جالپى بيۋدجەتى 13 مىڭ دوللاردى قۇرايدى.
"I' m going to Paris" كارتيناسىندا پاريجگە بارۋدى ارماندايتىن قىز لورە تۋرالى باياندالادى. ول ساياحات جاساۋدى جانە ادەمى ءومىر ءسۇرۋدى ارماندايدى. الايدا, ول سول كەزدە جاي عانا مەيرامحانادا جۇمىس ىستەيتىندىكتەن, اكتەرلىك مانسابىن باستاۋدا ساتسىزدىكتەرگە ۇشىراسا بەرەدى. دەگەنمەن, لورە الەۋمەتتىك جەلىلەرگە جالعان پوستتار مەن سۋرەتتەرىن جاريالاپ, شىن مانىندەگى ارمانىنىڭ قانداي ەكەنىن بىلدىرەتىن. فيلم كورەرمەندى ادامنىڭ وتكەن ومىرىمەن تانىستىرادى, ول ءوز ءومىرىن وففلاينعا وزگەرتە المايتىن جانە لورا ءۇشىن جالعىز جانعا جايلى مەكەن ۆيرتۋالدى ويلاستىرىلعان الەم عانا.
«ءبىر كۇنى مەن وزىنە-ءوزى قول جۇمساعان قاراپايىم قازاقستاندىق قىزدىڭ وقيعاسى تۋرالى ەستىدىم. پارادوكس, ونىڭ الەۋمەتتىك جەلىلەردەگى لەنتاسى وتە جاقسى ەدى, فوتولارىنداعى ءوڭى بالبۇل جانعان, باقىتتى ارۋ سياقتى كورىنەتىن. مەنىڭ كوز الدىمدا ءبارى قالاعانىنداي بولعان ادامنىڭ بەينەسى تۇردى. الايدا, ول قىز ەكى ءومىردى قاتار سۇرگەن: الەۋمەتتىك جەلىلەردە وتە باقىتتى جانە تابىستى; شىن مانىندە دەپرەسسيادا جانە جار شەتىنەن قۇلاۋعا از عانا قالعان. مەن وسى قىسقا عۇمىرعا تەرەڭ تالداۋ جاسادىم, الەۋمەتتىك جەلىلەر ءبىزدىڭ ومىرىمىزگە قالاي اسەر ەتەتىنىن جانە ءبىزدىڭ ەلىمىزدە كوپتەگەن ادامدار ونلاين-كەڭىستىكتە باقىتتى ءومىر ءسۇرۋدىڭ جالعان بەينەلەرىن نەگە جاسايتىنى تۋرالى ويلادىم. بۇل جاعدايدان شىعاتىن ەشقانداي جول جوق پا؟
راس, ستاتيستيكا كورسەتىپ وتىرعانداي, قازاقستانداعى وزىنە-ءوزى قول جۇمساۋ پروبلەماسى وتە ماڭىزدى جانە كوبىنەسە ادامدار جەكە باستىڭ قايعى-قاسىرەتىنەن نەمەسە ناقتى ومىرلەرىنە قاناعاتتانباعاندىقتان ۆيرتۋالدى كەڭىستىككە جاسىرىنۋعا تىرىسادى. مەن زامانداستارىمنىڭ وزدەرىن جاقسى كورسەتۋگە تىرىسپاستان, ومىردە قالاي بار, سولاي قابىلداعاندارىن قالايمىن. ادامدار قازىرگى الەمدە ءومىر ءسۇرۋى كەرەك. مەن ءبارىن تۇزەتۋگە جانە وزگەرتۋگە بولاتىنىنا سەنەمىن», دەيدى مۇرات ەسجان.
ايتا كەتەرلىگى, ەرلى-زايىپتى جاس ماماننىڭ لەنتانى ءتۇسىرۋ تاريحىنىڭ ءوزى ءبىر ءفيلمنىڭ جەلىسىنە سۇرانىپ تۇر. ويتكەنى, مۇرات پەن ايساۋلە تىلدىك كەدەرگىلەرگە, وزگە دە قيىندىقتارعا قاراماستان ءوز ماقساتتارىنا سوڭىنا دەيىن كۇرەسىپ جەتتى. ايتالىق, شاكىرتاقىنىڭ قاراجاتى تولىعىمەن وقۋعا جانە پاتەر جالداپ تۇرۋعا جۇمسالدى, ال ولارعا ءالى ەكى بالانى تاماقتاندىرىپ, وقىتۋ كەرەك. ول ءۇشىن مۇرات پيتستسا جەتكىزۋشىسى بولىپ قارا جۇمىس ىستەۋگە تۋرا كەلدى.
ء"فيلمدى ءتۇسىرۋ وتە قيىن بولدى. لوكاتسيالار اقىلى ەدى. بارلىعى رۇقسات الۋدى قاجەت ەتەدى. اقش-تا زاڭدارعا وتە جاۋاپتى قارايدى جانە كوپ جاعدايدا قۇجاتتامالاردى راسىمدەۋ ۇزاق ۋاقىت پەن اجەپتاۋىر اقشانى تالاپ ەتەدى. سونىمەن قاتار, ءتۇسىرۋ توبى جۇمىسىنىڭ اقىسىن تولەۋ, سونداي-اق قىمبات تۇراتىن كامەراعا كەيدە قارۋلى كۇزەت جالعا الۋ قاجەت. كەيبىر تۇسىرىلىمدەر سان-فرانتسيسكونىڭ قولايسىز اۋدانداردا جۇرگىزىلدى", دەيدى ايساۋلە ابىلداەۆا.
وتاندىق كينەماتوگرافيستەردىڭ ەڭبەكتەرى ەش كەتكەن جوق. جوبا امەريكا ستسەناريستەرى گيلدياسىنىڭ (Writers Guild of America) وكىلدەرى تاراپىنان وڭ باعاسىن الدى. سونداي-اق, مۇراتتىڭ اعىلشىن تىلىندەگى تولىقمەتراجدى كينوستسەناريى Scriptapalooza ستسەناريلەرى كونكۋرسىنىڭ نۇسقاسى بويىنشا امەريكانىڭ ۇزدىك 100 ستسەناريى قاتارىنا ەندى. بايقاۋعا 3500-دەن استام ءوتىنىم تۇسكەنىن دە ايتا كەتكەن ءجون.
ەلگە ورالعاننان كەيىن مۇرات “قازاقفيلم” كينوستۋدياسىنىڭ “دەبيۋت” شىعارماشىلىق جوباسىنىڭ اياسىندا «تيىن» اتتى ەكىنشى ءفيلمىن تاسپالادى. جازۋشى ليرا قونىستىڭ اتتاس اڭگىمەسى جەلىسىمەن تۇسىرىلگەن تۋىندىنىڭ باستى وزەگى – اتاسىمەن قالعان ءبۇلدىرشىننىڭ اكەگە ساعىشى. بەس جاسار قايساردىڭ قازىرگى بار مۇراتى – ءبىر دوربا تيىن جيناۋ. سەبەبى, اتاسى بىرگە نىڭ ايتۋىنشا, اكەسى داريانىڭ ار جاعىنا كەتتى. ول جاققا بارۋ ءۇشىن قايىقشى شالعا ءبىر دوربا تيىن بەرۋ كەرەك-مىس.
«ەكىنشى ءفيلمدى تۇسىرۋگە مەنى اكەسىنەن ايىرىلعان بالا تۋرالى اڭگىمە شابىتتاندىردى. مەن ونى گازەتتەن وقىعان بولاتىنمىن. ول جازبا ماعان قاتتى اسەر ەتتى, ويتكەنى مەن دە اكەمىن. اڭگىمەنى وقىپ بولعان سوڭ, بىردەن وسى كارتينانى جاساۋ تۋرالى شەشىم قابىلدادىم. العاشقى ەڭبەگىمىزدىڭ ارقاسىندا "قازاقفيلم" دە مەنىڭ الەۋەتىمدى كورىپ, ماعان وسىنداي جوبانى سەنىپ تاپسىردى», دەيدى مۇرات ەسجان.