وتكەن جىلى قىركۇيەك ايىندا رەسەيلىك ينۆەستور «كومپوزيت گرۋپپ» حولدينگى وبلىس ورتالىعىنداعى يندۋستريالىق ايماققا «بەلورۋس» ماركالى تراكتور قۇراستىراتىن زاۋىتتىڭ ىرگەتاسىن قالادى. العاشقى كەلگەن ينۆەستيتسيا كولەمى 2,3 ميلليارد تەڭگەنى قۇرادى. بىلتىر قىركۇيەك ايىنان باستاپ, زاۋىتتىڭ العاشقى تسەحى جۇمىس ىستەيدى.
– وسى تسەحتىڭ وزىنەن متز تراكتورلارى ساپقا قويىلدى. بيىل زاۋىتتان بارلىعى 1000 تراكتور شىعارىلۋى ءتيىس. مۇندا «بەلورۋس» تراكتورىنىڭ 28 مودەلى قۇراستىرىلادى. العاشقى جۇزدەن اسا تراكتوردى قازاقستاندىق شارۋالارعا ساتىپ تا ۇلگەردىك, بۇگىن-ەرتەڭ 4 تراكتور قىرعىزستانعا جونەلتىلەدى. مۇنى جاڭا زاۋىتتىڭ العاشقى ەكسپورتى دەپ ءبىلىڭىز. كەلەسى تراكتور توبى تاجىكستانعا جونەلتىلەدى, – دەيدى «كومپوزيت گرۋپپ» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى اندرەي گومايۋنوۆ.
2 مىڭ شارشى مەتر ءوندىرىس تسەحىندا سەگىز ساتىدان تۇراتىن تراكتور جەلىسى جۇمىس ىستەپ تۇر. زاۋىت اشىلعان قىركۇيەك ايىنان باستاپ وسىندا جۇمىسقا تۇرعان ەرداۋلەت داندىباەۆتىڭ ءتاجىريبەسى كۇن سايىن تولىعىپ, ىسكە كوزى ۇيرەنە باستاپتى. قازىر ءوزىنىڭ ساتىسىندا اتقاراتىن جۇمىستى ءۇيىرىپ اكەتەتىن بولعان.– تراكتور سەگىز ساتىدان وتەدى, ەڭ سوڭعى ساتىدا دوڭگەلەگى سالىنىپ, ساپقا قويۋعا جىبەرىلەدى. اۋىلدا وستىك قوي, وسى تراكتوردى مىندىك, تالاي شوپكە باردىق, ءوزىمىز جۇرگىزدىك. ەندى سول «متز» تراكتورىن قۇراستىرۋعا ءوزىم قاتىسىپ وتىرمىن, ءوز قولىمنان ءوتىپ جاتىر. ەشقانداي قيىندىعى جوق. ءبىزدىڭ ەكونوميكانىڭ, ءوندىرىستىڭ دامۋىن كورسەتەتىن كورىنىس. بۇرىن بۇل جۇمىس تۇسىمە دە كىرگەن ەمەس, – دەيدى ە.داندىباەۆ.
جەردىڭ توڭى ءجىبىپ, توپىراق قۇرعاسىمەن زاۋىتتىڭ جانىنان تاعى دا 6 مىڭ شارشى مەتر بولاتىن ەكى تسەحتىڭ قۇرىلىسى باستالادى. وندا تراكتور كابيناسى تولىق جاسالىپ شىعادى. زاۋىت ديرەكتورىنىڭ ايتۋىنشا, كابينانىڭ قوستانايدا جاسالۋى ينۆەستيتسيالىق جوباداعى جەرگىلىكتەندىرۋ ۇدەرىسىن ارتتىرادى.
– قازىر تسەحتاعى جۇمىستاردىڭ جەرگىلىكتەندىرىلۋى 12 پايىزدان اسپايدى. ال كۇزگە قاراي, كابينا قۇراستىراتىن تسەحتى قوسقاننان كەيىن جۇمىستى جەرگىلىكتەندىرۋ كولەمى 41 پايىزعا جەتەتىن بولادى, – دەيدى اندرەي الەكسەەۆيچ. زاۋىتتىڭ باس ديرەكتورىنىڭ ايتۋىنشا, كۇزدە, جاڭا تسەح پايدالانۋعا بەرىلگەننەن كەيىن ءوندىرىس قۋاتى كۇرت كوتەرىلەتىن بولادى. كەلەر جىلى زاۋىت 3000 تراكتور قۇراستىرۋدى مەجەلەپ وتىر ەكەن.رەسەيلىك ينۆەستور «كومپوزيت گرۋپپ» حولدينگىنىڭ قۇرامىنا ەنەتىن «كومپوزيت گرۋپپ قازاقستان» زاۋىتىنىڭ قۋاتى ساتىلاپ اتقارىلاتىن جۇمىستارعا تىكەلەي بايلانىستى. قازىر سونىڭ تەك ءبىرىنشى ساتىسى عانا ءونىم بەرە باستادى. زاۋىتتىڭ ەكىنشى ساتىسىندا تراكتوردىڭ كابيناسى وندىرىلەدى, ءۇشىنشى ساتىسىندا قوزعالتقىش, ءتورتىنشى ساتىسىندا رادياتور شىعارىلادى.
– ونىڭ ءمانىسى مىنادا. ءبىز وسى يندۋستريالىق ايماقتان تاعى دا 8 مىڭ شارشى مەتر تسەح سالامىز, وندا قىتاي قوزعالتقىشىن ءبىزدىڭ تراكتورعا ارناپ قۇراستىراتىن بولامىز. بۇل ساتى 2020-2022 جىلدارى ىسكە قوسىلادى, ال تراكتوردىڭ رادياتورى دا وسى قوستانايدا جاسالۋ ءۇشىن 2020-2023 جىلدارى تسەح قۇرىلىسى جۇرەدى, – دەيدى اندرەي الەكسەەۆيچ.
وسى جۇمىستار ءۇشىن رەسەيلىك ينۆەستورلار بارلىعى 15 ميلليارد تەڭگە ينۆەستيتسيا قۇيادى. ەڭ باستى ماسەلەنىڭ ءبىرى – ەندى وسى تراكتورلارعا ءبىزدىڭ شارۋالار مەن ديقانداردىڭ قولجەتىمدىلىگى قانداي؟ قازاقستاندا جاسالعان «بەلورۋس» تراكتورى ءبىزدىڭ ەكسپورتتىق الەۋەتىمىزدى كۇشەيتە الا ما؟
– «بەلورۋس» تراكتورىنىڭ شارۋاعا قولايلى ەكەنى وتكەن عاسىردىڭ 60-جىلدارىنان باستاپ-اق بەلگىلى بولعان. قازىر ءبىزدىڭ العاشقى شىعارعان تراكتورلارىمىزدىڭ ءوزى ءوتىپ جاتىر. ءبىز جاقىندا عانا قوسىمشا قۇن سالىعىن تولەمەۋ جەڭىلدىگى جونىندە ينۆەست كەلىسىمشارتقا قول قويدىق. ەندى تراكتور شارۋالارعا قوسىمشا قۇن سالىعىنسىز ساتىلادى, بۇل تەحنيكا شارۋاعا 12 پايىزعا ارزان تۇسەدى دەگەن ءسوز, – دەيدى اندرەي الەكسەەۆيچ.
جوعارىدا قوستانايدان «بەلورۋس» ماركالى تراكتورىنىڭ 28 مودەلى قۇراستىرىلاتىنىن ايتتىق. ال اندرەي الەكسەەۆيچتىڭ ايتۋىنشا, ءازىر فەرمەرلەر وتكەن عاسىردىڭ 70-جىلدارىنان بەرى پايدالانىلىپ كەلە جاتقان متز-82 تراكتورىن قولاي كورەدى ەكەن. بۇل – قازاقستاندىق شارۋالارعا ەرتەدەن تانىس تەحنيكا, ءارى شاعىن, ارزان جانە قوسالقى بولشەكتەرى دە تەز تابىلادى, باعاسى دا تومەن. ال ءىرى شارۋاشىلىقتارعا ات كۇشى كوپ قۋاتتى تراكتورلار سۇرانىسپەن وتەتىن كورىنەدى. قايتكەندە دە, «بەلورۋس» تراكتورىنىڭ اۋىل شارۋاشىلىعى ماشينا-تراكتور پاركىن جاڭالاۋدا وزىندىك ورنى بار, كوپ جىل بويى تاجىريبەدەن ءوتكەن. بۇل – تەك قازاقستاندىق ديقاندار ءۇشىن عانا ەمەس, كەڭەس وداعى قۇرامىندا بولعان ەلدەردىڭ بارلىعىنا تانىس تەحنيكا. سوندىقتان قوستانايدا قۇراستىرىلاتىن, بارىنشا جاڭارتىلعان, جەتىلدىرىلگەن تراكتور ەۋرازيالىق ەكونوميكالىق وداق ەلدەرىنە ەكسپورتقا باعىتتالىپ وتىر. قوستاناي