قاراعاندىعا جۇمىس ساپارىمەن كەلگەن قازاقستان فۋتبول فەدەراتسياسىنىڭ (قفف) باس حاتشىسى ازامات ايتقوجين وبلىستىق دەنە شىنىقتىرۋ جانە سپورت باسقارماسى جانە «شاحتەر» فۋتبول كلۋبىنىڭ باسشىلىعىمەن كەزدەستى.
ا.ايتقوجين قاراعاندىداعى «شاحتەر» جانە تەمىرتاۋداعى «مەتاللۋرگ» ستاديوندارىندا بولىپ, ينفراقۇرىلىمنىڭ جالپى جاعدايىمەن تانىستى. ەسكە سالساق, قازاقستان فۋتبول فەدەراتسياسىنىڭ الاڭدارعا رۇقسات بەرۋ جانە سەرتيفيكاتتاۋ جونىندەگى كوميسسياسى اتالعان ەكى سپورتتىق نىساندا قازاقستاننىڭ كاسىپقوي فۋتبول ليگاسى اياسىندا قانداي دا بولسىن جارىس وتكىزۋگە تىيىم سالعان بولاتىن.
قازىر قاراعاندىنىڭ «شاحتەرى» پرەمەر-ليگا كوماندالارى اراسىنداعى قازاقستان چەمپيوناتىنىڭ ويىندارىن نۇر-سۇلتان قالاسىنداعى «استانا ارەنا» ستاديونىندا وتكىزىپ ءجۇر.
قالىپتاسقان جاعدايمەن جان-جاقتى تانىسقان قازاقستان فۋتبول فەدەراتسياسىنىڭ باس حاتشىسى «شاحتەر» جانە «مەتاللۋرگ» ستاديوندارىنا جوندەۋ جۇمىستارىن جۇرگىزۋدىڭ ناقتى مەرزىمىن بەلگىلەدى.