بۇگىن س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە «تۇڭعىش» اتتى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى ەكسكۋرسيا جوباسىنىڭ سالتاناتتى اشىلۋ ءراسىمى ءوتتى.
شاراعا ەلباسى كىتاپحاناسىنىڭ ديرەكتورى ءا.م.راحىمجانوۆ, س.سەيفۋللين اتىنداعى قازاتۋ رەكتورى ا.ق.كۇرىشباەۆ, ەلباسى كىتاپحاناسى ديرەكتورىنىڭ ورىنباسارى ك.ك.اكتاەۆا, وقىتۋشىلار مەن ستۋدەنتتەر قاتىستى.
سالتاناتتى ءىس-شارا شىمىلدىعى قازاقستان رەسپۋبليكاسى مەملەكەتتىك كۇزەت قىزمەتى پرەزيدەنتتىك وركەسترىنىڭ اسكەري دەفيلەسىمەن اشىلدى. سونداي-اق (ەلباسى جەكە ارحيۆىنىڭ قۇجاتتارىنان جاساقتالعان) «قازاقستانداعى پرەزيدەنتتىك ينستيتۋتتىڭ قۇرىلۋ جانە دامۋ تاريحى» كورمەسى اشىلدى.
كورمەنى اشقان ەلباسى كىتاپحاناسىنىڭ ديرەكتورى, ساياسي عىلىمداردىڭ دوكتورى, پروفەسسور ءامىرحان راحىمجانوۆ:
– تاۋەلسىزدىك جىلدارىندا مەملەكەت ومىرىندە ورىن العان تاريحي وقيعالاردى ەسكەرە وتىرىپ, حالىقتىڭ ءۇمىتى اقتالدى دەۋگە تولىق نەگىز بار. قازاقستان قارقىندى دامىپ كەلە جاتقان ەلدەردىڭ قاتارىنا قوسىلىپ, جاڭاشا ويلاۋ مەن تىڭ كوزقاراستىڭ ۇلگىسىنە اينالدى. وسى تۇستا ەلباسىمىز تاڭداعان پرەزيدەنتتىك ينستيتۋت قوعام بىرلىگىن نىعايتىپ, مەملەكەت ەگەمەندىگىن كۇشەيتتى. مۇنىڭ ءبارى قازاقستاننىڭ الەم الدىنداعى ابىرويىن اسقاقتاتتى, - دەدى.
باسقارما توراعاسى ا.كۇرىشباەۆ كوشپەلى ەكسكۋرسيانىڭ ماڭىزدىلىعىنا توقتالىپ, شارا ۇيىمداستىرۋشىلارىنا العىس ءبىلدىردى. «ەلباسىمىزدىڭ قايراتكەرلىك جولىنداعى بارلىق ماڭىزدى قۇجاتتارى توپتاستىرىلعان بۇل كورمەنىڭ ورنى ەرەكشە. يگى شارانىڭ ءبىزدىڭ وقۋ وردا قابىرعاسىندا ءوتىپ جاتقاندىعى كوڭىل قۋانتادى. وسكەلەڭ ۇرپاققا ۇلكەن ءتالىم, تاعىلىم, جىگەر سىيلايتىنى انىق», - دەپ تۇيىندەدى اقىلبەك قاجىعۇل ۇلى. سونداي-اق رەكتور ۋنيۆەرسيتەتتىڭ عىلىمي جەتىستىكتەرىنىڭ كورمەسىمەن تانىستىردى.
قازاقستان رەسپۋبليكاسى تۇڭعىش پرەزيدەنتى – ەلباسى كىتاپحاناسىنىڭ «تۇڭعىش» كوشپەلى ەكسكۋرسيالىق جوباسى مەملەكەت باسشىسىنىڭ جاسامپاز يدەيالارى مەن باستامالارىن, كىتاپحانانىڭ بىرەگەي قورلارىن ناسيحاتتاپ, كەلۋشىلەردى ن.ءا.نازارباەۆتىڭ ءومىر جولى مەن قىزمەتىمەن تانىستىرادى.
ستۋدەنتتەر نازارىنا قازاقستان رەسپۋبليكاسىنىڭ تۇڭعىش پرەزيدەنتى-ەلباسىنىڭ تاريحي جولىن اشاتىن بەينەحرونيكانىڭ سيرەك كادرلارى, فوتوسۋرەتتەر مەن مۇراعاتتىق قۇجاتتار جيىنتىعى ۇسىنىلدى. كەلۋشىلەر ەلباسىنىڭ داڭعىل جولىن بەينەلەيتىن بىرەگەي ماتەريالدار كەشەنىن تاماشالاپ, بەينەحرونيكانىڭ سيرەك كەزدەسەتىن كادرلارىمەن, سۋرەتتەر مەن ارحيۆ قۇجاتتارىمەن, حح عاسىردىڭ 60-70 جىلدارىنداعى قۇجاتتارمەن, مەملەكەتتىك جانە قوعامدىق ناگرادالارى, ن.ءا.نازارباەۆقا وتاندىق جانە شەتەلدىك سپورتشىلار تارتۋ ەتكەن سىيلىقتار توپتاماسىمەن تانىستى.
كورمەگە قر تۇڭعىش پرەزيدەنتى جەكە مۇراعاتىنىڭ قورىنان جانە ەلباسى مۇراجايىنىڭ قورىنان الىنعان زاتتىق بۇيىمدار, فوتوسۋرەتتەر, جەكە زاتتار ۇسىنىلدى.
شارا بارىسىندا كىتاپحانا ديرەكتورى ءا.م.راحىمجانوۆ « ۇلى دالا ۇلاعاتتارى» «مودەل نازارباەۆا», «نۋرسۋلتان نازارباەۆ. بيوگرافيا» جانە وزگە دە كىتاپتاردى سىيعا تارتتى.