«سامبو كۇرەسىنىڭ اكادەميگى» اتانعان ايتۋلى ازامات تابانى كۇرەكتەي 18 جىل بويى قازاقستان ۇلتتىق قۇراماسىنىڭ باس باپكەرى بولدى. 1992-2010 جىلدار ارالىعىندا ءبىزدىڭ جىگىتتەر تەك الەم چەمپيوناتتارىندا عانا 10 التىن جانە 50-گە جۋىق كۇمىس پەن قولا مەدالدى ولجالادى. ال ودان بولەك, الەم كۋبوگى, ازيا بىرىنشىلىگى جانە باسقا دا اسا ءىرى حالىقارالىق دودالار بار. بۇل جارىستاردا دا قويشىبەكتىڭ شاكىرتتەرى وزا شاپتى. سونىمەن قاتار, بىلىكتى باپكەر ەلىمىزدىڭ جاستار قۇراماسىن 10 جىل جاتتىقتىردى. وسى كەزەڭدەردەگى تابىستاردىڭ بارلىعىن تىزبەلەيتىن بولساق, وتاندىق سپورتىمىزدىڭ وركەندەۋىنە كەراعاڭنىڭ سىڭىرگەن ەڭبەگى وراسان زور ەكەنىنە انىق كوز جەتكىزەمىز.
مىنە, وسى ابزال ازاماتتىڭ قۇرمەتىنە سەمەيدە دۇركىرگەن جارىس ءوتتى. وسى جارىستى تاماشالاۋ ءۇشىن ايتۋلى ءوڭىردىڭ باسشىلارى مەن وسى سپورت ءتۇرىنىڭ باسى-قاسىندا جۇرگەن ازاماتتاردان باستاپ, كەراعاڭنىڭ شاكىرتتەرى كوپتەپ كەلدى.
سونىمەن قاتار, كەرەي قويشىبەكتىڭ سەمەيدەگى شاكىرتتەرى ابسوليۋتتىك سالماقتا بەلدەسۋ ۇيىمداستىرىپ, تۇيە بالۋاندى انىقتى. بۇل تارتىستا جەرگىلىكتى ءاپايتوس رۋسلان جارقىنباەۆ جەڭىمپاز اتاندى. اقتىق ايقاستا ول قىزىلوردالىق عالىمجان ءابدىراحمانوۆتان ايلاسىن اسىردى. ال قولا مەدالدى شىمكەنتتەن كەلگەن سپورتشى نۇربولات مايلىباەۆ يەلەندى.