4-7 ءساۋىر ارالىعىندا الماتىدا حالىقارالىق دجاز فەستيۆالى داستۇرگە ساي جامبىل اتىنداعى قازاق مەملەكەتتىك فيلارمونياسىندا وتەدى. بۇل فەستيۆال وسى باعىتتى جانىمەن سۇيەتىن مۋزىكانتتاردىڭ ءوز اراسىندا «حالىقارالىق دجاز مەرەكەسى» دەپ تە اتالادى. جيىرما جىلعا جۋىق ومىردەرەگى بار اۋقىمدى ءان-كۇي مەرەكەسىندە 300-دەن اسا مۋزىكانت ونەر كورسەتكەن. ال بيىلعى فەستيۆالدە قازاقستاندىق تىڭدارماندار يزرايل, ۆەنگريا, اۆستريا, پولشا, تۇركيا, گەرمانيا جانە فرانتسيادان كەلگەن توپتار مەن جەكەلەگەن انشىلەر ونەرىن تاماشالاماق. دجاز فەستيۆالىنىڭ ساحناسىندا قازاقستاندىق توپتارمەن بىرگە Almaty Jazz Youth Band مەكتەپ وركەسترى دە ورىنداۋشىلىق شەبەرلىگىن كورسەتەدى. «ءبىز قازاقستاننىڭ ساحناسىندا, سىزدەردىڭ الماتىداي عاجايىپ شاھارلارىڭىزدا ونەر كورسەتەتىنىمىزگە, سىزدەرمەن بىرگە مۋزىكا اۋەنىمەن بىرگە تەربەلەتىنىمىزگە ءالى سەنە الماي تۇرمىز», – دەيدى يزرايلدىك دجازمەن گاي مينتۋس.
فەستيۆال اياسىندا شەتەلدىك قوناقتاردىڭ قاتىسۋىمەن تەگىن ءداستۇرلى شەبەرلىك ساعاتتارى وتكىزىلەدى. ايتا كەتسەك, 4 ءساۋىر كۇنى پولشا مەن تۇركيادان كەلگەن مۋزىكانتتار, 5 ساۋىردە فرانتسيا مەن يزرايل, 6 ساۋىردە گەرمانيا مەن اۆستريانىڭ دجاز ارتىستەرى ونەر كورسەتىپ, ال 7 ساۋىردەگى كونتسەرتتىك باعدارلامانى قازاقستان, ۆەنگريا جانە امەريكا مۋزىكانتتارى مەن توپتارى تۇيىندەمەك. الماتى قالاسى اكىمدىگىنىڭ قولداۋىمەن وتكىزىلىپ كەلە جاتقان فەستيۆالدىڭ باستى ۇيىمداستىرۋشىلارى الماتى دجاز مەكتەبىنىڭ ديرەكتورى تاگير زاريپوۆ پەن جوبانىڭ مەنەدجەرى قارلىعاش ماقاتوۆا.
الماتى