قالادا عانا ەمەس, دالادا دا سەلدىڭ قاۋپى سەيىلگەن جوق. قايتا قار جاڭا ەرىپ, قاتەردى مولايتا تۇسۋدە. ءساۋىر تۋىسىمەن ەسىل, مويىلدى, جاباي, سىلەتى, شاعالالى, قالقۇتان وزەندەرى مەن استانا سۋ قويماسىنداعى سۋ دەڭگەيى كوتەرىلە باستادى. جىلعا-جىلعامەن قۋالاي اققان سۋ قارامى مول. ۇستىمىزدەگى جىلى قار قالىڭ ءتۇستى. ىلعال قورىنىڭ كولەمى نورمادان 70 پروتسەنتكە دەيىن كوپ. سۋ سىڭە قويادى دەيتىندەي جەردىڭ ۇستىڭگى قاباتى دا جىبىگەن جوق. قاۋىپ تونگەن سوڭ قازاقستان رەسپۋبليكاسى سۋ رەسۋرستارى جونىندەگى كوميتەت سۋ قويمالارىنان ارتىق سۋدى اعىزۋدى ۇسىنىپ وتىر. وتكەن تاۋلىكتەردە كۇن 2-7 گرادۋسقا جىلىنىپ, 1,4 ميليمەتر جاۋىن-شاشىن ءتۇستى. جالپى وڭىردە وتكەن اپتادا 40 ميليمەتر شاماسىندا جاۋىن جاۋىپ, قارعىن سۋدى مولايتا ءتۇستى. وقىرمانعا تۇسىنىكتى بولۋى ءۇشىن بۇل كورسەتكىشتىڭ ايلىق نورمادان 74 پروتسەنت كوپ ەكەندىگىن ايتا كەتسەك تە بولار. وسىنداي سەبەپتەن سۋ كوبەيىپ, سىلەتى وزەنى بويىنداعى بەستوعاي, پريرەچەن, ەسىل وزەنى جاعالاۋىنداعى تۇرگەن ەلدى مەكەندەرىنىڭ سۋ استىندا قالۋ قاۋپىن تۋعىزىپ وتىر.
–وبلىس بويىنشا الداعى ءۇش تاۋلىكتە جاڭبىر جاۋى مۇمكىن. كۇندىز 12 گرادۋسقا دەيىن جىلى بولادى,–دەيدى «قازگيدرومەت» رەسپۋبليكالىق مەملەكەتتىك كاسىپورنى اقمولا وبلىستىق فيليالىنىڭ ديرەكتورى باقىت ماقاجانوۆا,–زەرەندى, بۋراباي, بۇلاندى, ءبىرجان سال, اقكول, ەرەيمەنتاۋ اۋداندارىندا نورمادان تىس جاۋىن جاۋادى.
وبلىس ورتالىعىن ءىشىنارا سۋ باسۋى قىلشاقتى وزەنىنىڭ بويىمەن يۆانوۆكا سۋ قويماسىنان بوساتىلعان سۋدىڭ اعۋىنان. بولجام بويىنشا يۆانوۆكا سۋ قويماسىنا 2-2,5 ميلليون تەكشە مەتر, كوكشەتاۋ قالاسىنا 1,5-2 ميلليون تەكشە مەتر سۋ كەلۋى مۇمكىن.
–وسى جايلارعا بايلانىستى قاۋىپتى جەرلەرگە باقىلاۋ بەكەتى ورنالاستىرىلىپ, سۋ دەڭگەيىنە تۇراقتى مونيتورينگ جۇرگىزىلۋدە,–دەيدى وبلىستىق توتەنشە جاعدايلار دەپارتامەنتى باسشىسىنىڭ ورىنباسارى ماناربەك شاپاعاتوۆ,–كەنەسارى سۋ قويماسىن قارعىن سۋ بۇزىپ كەتتى. قازىر قاتەردىڭ الدىن الۋ جانە سالدارىن جويۋعا 258 ادام مەن 20 تەحنيكا جۇمىلدىرىلعان. وبلىستىق توتەنشە جاعدايلار دەپارتامەنتىنىڭ جەكە قۇرامىنان 130 ادام جانە ارنايى 5 تەحنيكا, جەرگىلىكتى اتقارۋشى ورگانداردان 40 ادام مەن 5 تەحنيكا جۇمىس ىستەۋدە. سونداي-اق, وزگە دە مەكەمەلەردەن قاجەتتى تەحنيكا مەن ادامدار ءبولىنىپ, قاۋىپتىڭ الدىن الىپ جاتىر.
اقمولا وبلىسى