ەل گازەتى «Egemen Qazaqstan» گازەتىنىڭ 2017 جىلعى 11 شىلدەدەگى سانىندا بەلگىلى جۋرناليست ساعيدوللا سيقىمباي ۇلىنىڭ اتتارى اڭىزعا اينالعان 28 پانفيلوۆشىنىڭ ءبىرى, كەڭەس وداعىنىڭ باتىرى مۇسابەك سەڭگىرباەۆقا كىندىك قانى تامعان باقاناس اۋىلىنداعى (الماتى وبلىسى, بالقاش اۋدانى) №1 باقاناس ورتا مەكتەبىنە اتىن بەرىپ, لايىقتى قۇرمەت جالعاسىن تاپسا دەگەن ءبىر توپ سوعىس جانە ەڭبەك ارداگەرلەرى ۇسىنىسىمەن جازىلعان «بالقاشتان شىققان باتىر» دەگەن ماتەريالى جارىق كورگەن ەدى.
ۇلىستىڭ ۇلى كۇنى بالقاشتىقتار باتىر جەرلەستەرى – №1 باقاناس ورتا مەكتەبىنە مۇسابەك سەڭگىرباەۆتىڭ ەسىمى بەرىلۋى سالتاناتتى شاراسىنىڭ كۋاسى بولدى. ەلىن جاۋدان قورعاۋ جولىندا قازا تاپقان مۇسابەك سەڭگىرباەۆ سىندى ۇلىقتى ەلدىڭ رۋحتى ەرىنىڭ اتىن ەلگە تانىتۋ, عاسىرلاردان عاسىرلارعا جەتكىزۋ – ەل الدىنداعى قاسيەتتى پارىز. كوپشىلىكتىڭ تىلەگى قابىل بولىپ, 2019 جىلدىڭ 25 قاڭتار كۇنى قازاقستان رەسپۋبليكاسى ۇكىمەتىنىڭ «الماتى وبلىسىنىڭ كەيبىر ءبىلىم بەرۋ ۇيىمدارىنا اتاۋ بەرۋ جانە قايتا اتاۋ تۋرالى» №17 قاۋلىسى شىقتى. اتالعان قاۋلىدا بالقاش اۋدانى حالقىنىڭ باس باسىلىمنىڭ ماقالاسىندا ايتىلعان ۇسىنىسى ەسكەرىلىپ, الماتى وبلىسى, بالقاش اۋدانى №1 باقاناس ورتا مەكتەبىن «بالقاش اۋداندىق ءبىلىم ءبولىمىنىڭ مەكتەپكە دەيىنگى شاعىن ورتالىعى بار مۇسابەك سەڭگىرباەۆ اتىنداعى ورتا مەكتەپ» مەملەكەتتىك كوممۋنالدىق مەكەمەسى دەپ اتاۋ كورسەتىلدى. وسى قاۋلىنىڭ كۇشىنە ەنۋىنە بايلانىستى №1 باقاناس ورتا مەكتەبىندە ناۋرىز مەرەكەسى كۇنى مەكتەپكە باتىردىڭ اتى بەرىلۋ سالتاناتتى شاراسى وتكىزىلدى. بالقاش اۋدانىنىڭ اكىمى عالىم توقپەيىسوۆ, باتىردىڭ تۋعان نەمەرەسى تولەگەن مۇسابەكوۆ, گەنەرال پانفيلوۆتىڭ نەمەرەلەرى – الماتىداعى 28-پانفيلوۆشىلار اسكەري-تاريحي مۇراجايىنىڭ ديرەكتورى الۋا بايقاداموۆا, قوعام قايراتكەرى ايگۇل بايقاداموۆالار سالتاناتتى شارادا وزدەرىنىڭ باتىر ەسىمىنىڭ ۇلىقتالۋىنا بايلانىستى قۋانىشتارىن جەتكىزدى. جينالعان قاۋىم ەل گازەتى «Egemen Qazaqstan» گازەتىنىڭ رەداكتسياسىنا وسى شارانىڭ ورىندالۋىنا باستاما كوتەرىپ, مۇرىندىق بولعانى ءۇشىن ريزاشىلىقتارىن ءبىلدىردى.
تالعات ءسۇيىنباي,
«Egemen Qazaqstan»