حالىقارالىق تەاتر كۇنىنە وراي حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا مەرەكەلىك شارا ءوتىپ, تەاتردىڭ ءبىر توپ قىزمەتكەرى ءتۇرلى ماراپاتقا يە بولدى.
27 ناۋرىز – حالىقارالىق تەاتر كۇنى دۇنيەجۇزىندە 1961 جىلدان بەرى اتالىپ كەلەدى. بۇل كۇندى تاريحى مىڭجىلدىقتارمەن ەسەپتەلەتىن كونە ونەردىڭ ءوز وكىلىنە اينالعانىنا شيرەك عاسىردان ەندى اسقان ورالدىق تەاتر دا سالتاناتتى شارامەن, مەرەكەلىك كوڭىل كۇيمەن قارسى الدى. ساحنا تورىنە كيەلى ونەردىڭ ىستىعى مەن سۋىعىنا ءتوزىپ, كورەرمەن قاۋىمعا رۋحاني ءلاززات سىيلاپ جۇرگەن قاراپايىم قىزمەتكەرلەر شاقىرىلىپ, سىي-قۇرمەت كورسەتىلدى.
- ءبىزدىڭ تەاتر بۇگىنگى مەرەكەگە تولاعاي تابىسپەن كەلىپ وتىر دەسەك, قاتەلەسپەيمىز. وزدەرىڭىز كۋاسىزدەر, حاديشا بوكەەۆا تەاترى جىل سايىن كورەرمەنگە 8-9 پرەمەرا ۇسىنىپ ءجۇر. بۇل ۇلكەن ەڭبەك! بيىلدىڭ وزىندە 5 پرەمەرا قويىلدى. بۇل داستۇرگە اينالىپ كەلەدى. بىلتىر ونەر ۇجىمى ءوزىنىڭ 25 جىلدىق مەرەيتويىن بيىك دەڭگەيدە اتاپ ءوتتى. اتاق-داڭقى قازاقستانعا تاراعان اعا بۋىنمەن بىرگە, ونەرگە قۇلاش ۇرعان جاستار تولقىنى دا ءوسىپ كەلەدى. ءوڭىر جاستارى اراسىندا اكتەرلىك سالاعا دەن قويعان جاستارىمىز كوپتىگى قۋانتادى. سوڭعى كەزدە جاستار تەاترىن اشۋ جونىندە ۇسىنىس كوپ ەدى. ءوڭىر باسشىسى التاي كولگىنوۆ وسى ۇسىنىستى قولداپ, باتىس قازاقستان وبلىستىق جاستار شىعارماشىلىق ورتالىعىنا قوسىمشا 30 شتاتتىق بىرلىك بەرۋ جونىندە شەشىم شىعاردى. بۇل جۇمىس ورنى تەاتر سالاسىن تاڭداعان جاس ماماندارعا ارنالعان. اعا بۋىن وكىلدەرىنىڭ سالىپ كەتكەن سارا جولىن جاستار جالعاستىرۋى ءتيىس. ءبىز جاس تالانتتاردى ىزدەيمىز, ولاردىڭ جۇلدىزىن جاققىمىز كەلەدى, الدا ۇلكەن جۇمىستار كۇتىپ تۇر, - دەدى ءوز سوزىندە باتىس قازاقستان وبلىسى مادەنيەت باسقارماسىنىڭ باسشىسى قادىربولات مۇساعاليەۆ.
سالتاناتتى شارادا حاديشا بوكەەۆا اتىنداعى باتىس قازاقستان وبلىستىق قازاق دراما تەاترىنىڭ ءبىر توپ قىزمەتكەرى باقتىگۇل حابيقىزى, جاسقايرات ءسابيت ۇلى, اسەم جالعاسقىزى, ءادىلجان ەلتاي ۇلى, اياكوز ساعيتجانقىزى, سامال سايلاۋقىزى وبلىس اكىمى التاي كولگىنوۆتىڭ العىس حاتىمەن ماراپاتتالدى. ال عالىمجان بوپەنياز ۇلى, اقجول ەگىنباي ۇلى, قۇرالبەك ءىلياس ۇلى, سەرگەي راينسكي, قانات ايتقالي ۇلى, اسەل جانبولاتقىزى, داناگۇل رۋسلانقىزىنا باتىس قازاقستان وبلىسى مادەنيەت باسقارماسىنىڭ العىس حاتى تاپسىرىلدى. ايتا كەتەيىك, جوعارىدا اتالعانداردىڭ ءبارى ساحنا ءارتيسى ەمەس, ولاردىڭ اراسىندا ادەتتە كورەرمەن كوزىنە تۇسە بەرمەيتىن قاراپايىم قىزمەتكەرلەر – جارىق بەرۋشى, جۇرگىزۋشى, شارۋاشىلىق ماماندارى دا بار.
وسى كەشتە وبلىستىق تەاتر باسشىلىعى جىل سايىن ءتول مەرەكەسى تۇسىندا تاپسىراتىن ءداستۇرلى جۇلدە جەڭىمپازدارىن دا جاريا ەتتى. بۇل ماراپاتتى بەلگىلى ايتىس اقىنى شولپان قىدىرنيازوۆا مەن تانىمال جۋرناليست لاۋرا بەكبولاتوۆا تاپسىردى. ءسويتىپ, «ەڭ ۇزدىك ەر ادام بەينەسى» اتالىمىنا – رايىمبەك داۋرەن ۇلى, «ەڭ ۇزدىك ايەل ادام بەينەسى» اتالىمىنا – نازگۇل تۇرعىنعاليقىزى, «جاڭا ءرولدى جەدەل مەڭگەرگەنى ءۇشىن» اتالىمىنا – دارىن ساعىن ۇلى, «ۇزدىك دىبىس رەتتەۋشى» اتالىمىنا – مەيىرلان ەرمەكقالي ۇلى, «ۇزدىك سۋرەتشى» اتالىمىنا – قاسىم حالەن ۇلى, «ۇزدىك تازالىقشى» اتالىمىنا – شولپان قوڭقابايقىزى, «ۇزدىك كۇزەتشى» اتالىمىنا – اقادىل ءسابيت ۇلى, «ۇزدىك تىگىنشى» اتالىمىنا – ۆەنەرا وتەگەنقىزى, «قۇتتى قادام» ارنايى اتالىمىنا - ارمات ەربولات ۇلى, دانيار قانات ۇلى جانە ناۋرىز اباي ۇلى يە بولدى.
بۇگىندە «ايشىلىق الىس جەرلەردەن جىلدام حابار العىزعان» تەحنولوگيا مۇمكىندىگىن وسى جەردەن كوردىك. حاديشا بوكەەۆا اتىنداعى وبلىستىق قازاق دراما تەاترى ۇجىمىن ءتول مەرەكەمەن قۇتتىقتاعان ارىپتەستەرىنىڭ بەينەقۇتتىقتاۋلارى ساحنا تورىندەگى led ەكراننان توگىلدى. ولاردىڭ اراسىندا شاحمەت قۇسايىنوۆ اتىنداعى اقمولا وبلىستىق مۋزىكالىق-دراما تەاترى, ءىلياس وماروۆ اتىنداعى قوستاناي وبلىستىق دراما تەاترى, عابيت مۇسىرەپوۆ اتىنداعى مەملەكەتتىك اكادەميالىق بالالار مەن جاسوسپىرىمدەر تەاترى, وڭتۇستىك قازاقستان وبلىستىق وزبەك جانە ورىس تەاترلارى ۇجىمى ورالدىق ساحنا ساڭلاقتارىن ءتول مەرەكەمەن قۇتتىقتاپ, شىنايى لەبىز ءبىلدىردى.
ارينە, تەاتر تويى – مادەنيەت سالاسىندا جۇرگەن بارشا ونەرپازداردىڭ ورتاق مەرەكەسى. سالتاناتتى شاراعا عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ ءانشىسى, قازاقستان رەسپۋبليكاسىنىڭ ەڭبەك سىڭىرگەن قايراتكەرى جاڭىلسىن حاسانوۆا اننەن شاشۋ شاشسا, بەلگىلى اكتريسا, قازاقستان رەسپۋبليكاسىنىڭ ەڭبەك سىڭىرگەن قايراتكەرى, مەملەكەتتىك «دارىن» سىيلىعىنىڭ يەگەرى اسەل مامبەتوۆا اسەرلى مونولوگ وقىپ, «جان دوسىم» ءانىن شىرقاپ بەردى. تەاتردىڭ تاعى ءبىر تانىمال ءارتيسى, حورەگراف اقمارال اماندىقوۆا دايىنداعان «التىن بولاشاق» ونەر ستۋدياسىنىڭ بالعىن بيشىلەرى يسپان ءبيىن ورىنداپ, ساحنانىڭ ءسانىن كىرگىزدى. حاديشا بوكەەۆا اتىنداعى وبلىستىق قازاق دراما تەاترىنىڭ جاس بۋىنى دايىنداعان مۋزىكالىق-دراماتۋرگيالىق كومپوزيتسيا دا كوپشىلىك كوڭىلىنەن شىقتى.
قازبەك قۇتتىمۇرات ۇلى,
«Egemen Qazaqstan»
باتىس قازاقستان