اقتوبەدەگى قازاقستان حالقى اسسامبلەياسىنىڭ عيماراتىندا ەلوردانىڭ نۇر-سۇلتان اتاۋىنا قولداۋ كورسەتۋگە ارنالعان جيىن ءوتتى. جيىنعا وبلىستىق ءماسليحات دەپۋتاتى, اقتوبە اۋىل شارۋاشىلىعى كوللەدجىنىڭ ديرەكتورى امانگەلدى ەسىركەپوۆ, «اقتوبە» فۋتبول كلۋبىنىڭ باس ديرەكتورى سامات سماقوۆ, «ەر-باقىت» سپورتتىق-پاتريوتتىق كلۋبى» قوعامدىق ۇيىمىنىڭ توراعاسى, اۋعان سوعىسىنىڭ ارداگەرى مارات قويلىباەۆ, كاسىپكەر, اقتوبە وبلىسىنىڭ ىسكەر ايەلدەر قاۋىمداستىعىنىڭ مۇشەسى التىناي مۇحانوۆا, «نۇر وتان» پارتياسى وبلىستىق فيليالى «جاس وتان» جاستار قاناتىنىڭ توراعاسى اسىلجان بۇركىتالين قاتىسىپ, ەلورداعا نۇر-سۇلتان اتاۋىنىڭ بەرىلۋىنە بايلانىستى ءوز ويلارىمەن ءبولىستى.
ء«بىز, عاسىرلار توعىسىندا دۇنيە ەسىگىن اشقان جاس ۇرپاق, شىن مانىندە باقىتتىمىز! تاۋەلسىز ەلدە تۇلعا بولىپ دامۋعا بارلىق جاعداي جاسالدى. قازىر ەلىمىزدەگى بالالار مەكتەپكە دەيىنگى, مەكتەپتەگى بىلىممەن تولىق قامتىلعان. مەكتەپ تۇلەكتەرىنە العاشقى كاسىپ يگەرۋ ءۇشىن تەگىن كاسىپتىك ءبىلىم دە بەرىلەدى. جوعارى وقۋ ورىندارىندا جىل سايىن بولىنەتىن گرانتتار سانى دا ۇلعايىپ كەلەدى. الەمنىڭ كەز كەلگەن ۇزدىك وقۋ ورىندارىندا تەگىن ءبىلىم الۋعا مۇمكىندىك بەرەتىن «بولاشاق» باعدارلاماسىمەن 10 مىڭنان استام جاس بىلىكتىلىگىن ارتتىردى.
كوپتەگەن زامانداستارىمىز مەملەكەتتىك قولداۋدىڭ ناتيجەسىندە جاڭادان ءوز كاسىپتەرىن اشتى. جاس مەملەكەتىمىز دە ءوستى. 30 جىلعا جۋىق ۋاقىت ىشىندە قازاقستان الەمدەگى كەز كەلگەن مەملەكەتپەن تەرەزەسى تەڭ دارەجەگە جەتتى. ەلىمىز ەقىۇ مەن يسلام ەلدەرى كونفەرەنتسياسىندا توراعالىق ەتتى, الەمدىك دەڭگەيدەگى ەكسپو كورمەسىن وتكىزدى, سيريا احۋالىن شەشۋدە ماڭىزدى رولگە يە بولدى. الەمنىڭ باسەكەگە قابىلەتتى الدىڭعى قاتارلى 50 مەملەكەتىنىڭ قاتارىنا كىردى. بۇل جەتىستىكتىڭ ەكى سەبەبى بار. ول تالاي قيىندىق بولسا دا مويىماي, جاسىماي وتكەن قازاق حالقى جانە حالىقتى باسقارعان تۇڭعىش پرەزيدەنت نۇرسۇلتان نازارباەۆ. داۋىرلەر توعىسىندا تۇتاس مەملەكەتتى اياعىنا تۇرعىزعان تۇلعا, استانانى عانا ەمەس, ەلدى قايتا قۇرعان ازاماتقا ەلوردانىڭ اتاۋىن بەرۋ تاريحي زاڭدىلىق. اقتوبەلىك جاستار استانا قالاسى اتاۋىنىڭ وزگەرۋىن قولدايدى», دەدى «جاس وتان» جاستار قاناتى اقتوبە وبلىستىق فيليالىنىڭ توراعاسى اسىلجان بۇركىتالين.