بۇگىنگى ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى جىل سوڭىنا دەيىن قاراعاندى وبلىسىندا فەرروسيليتسيا جانە الماتى قالاسىندا بولات سپيرالدى قۇبىر وندىرەتىن زاۋىت ىسكە قوسىلاتىنىن مالىمدەدى.
«مەتاللۋرگيا بويىنشا وتكەن جىلى شىعىس قازاقستان وبلىسىندا «باقىرشىق تاۋ-كەن ءوندىرۋ كاسىپورنى» جاۋاپكەرشىلىگى شەكتەۋلى سەرىكتەستىگىندە تاۋ-كەن بايىتۋ كەشەنى جانە قاراعاندى وبلىسىندا «Sary-Arka Copper Processing» جاۋاپكەرشىلىگى شەكتەۋلى سەرىكتەستىگىنىڭ كاتودتى مىس شىعارۋ زاۋىتى سياقتى ءىرى جوبالار ىسكە قوسىلدى», دەدى رومان سكليار.
ونىڭ ايتۋىنشا, بيىل وسى كاسىپورىندار مەن «ارسەلورميتتال تەمىرتاۋدىڭ» جوبالىق قۋاتقا شىعۋى سالانىڭ جوسپارلى كورسەتكىشكە قول جەتكىزىپ, وڭدەۋ ونەركاسىبىنىڭ ءوسىمىن قامتاماسىز ەتۋگە مۇمكىندىك بەرەدى.