ينفلياتسيا بويىنشا نىسانالى باعدار 2022 جىلدان باستاپ 3-5 پايىزعا دەيىن تومەندەتىلەدى. بۇل تۋرالى بۇگىن ۇكىمەت وتىرىسىندا «ۇكىمەت پەن ۇلتتىق بانك اراسىنداعى 2019 جىلعا ارنالعان ماكروەكونوميكالىق ساياسات شارالارىن ۇيلەستىرۋ تۋرالى كەلىسىمى جونىندە» بايانداعان قر ۇلتتىق بانك توراعاسى ەربولات دوساەۆ ايتتى, دەپ حابارلايدى قازاقپارات ءتىلشىسى.
«تۇڭعىش پرەزيدەنت - ەلباسى نۇرسۇلتان ءابىش ۇلى نازارباەۆتىڭ مەملەكەتتىك باعدارلامالار مەن قۇرىلىمدىق رەفورمالاردى ىسكە اسىرۋ بويىنشا قازاقستان رەسپۋبليكاسى پرەزيدەنتى قاسىم-جومارت كەمەل ۇلى توقاەۆتىڭ تاپسىرماسىن ورىنداۋ ماقساتىندا ۇلتتىق بانك ۇكىمەتپەن 2019 جىلعا ارنالعان ماكروەكونوميكالىق ساياسات شارالارىن ۇيلەستىرۋ تۋرالى كەلىسىمگە قول قويۋ بويىنشا باستاما جاسايدى. كەلىسىمدە ۇكىمەت پەن ۇلتتىق بانكتىڭ ەكونوميكانىڭ ورنىقتى ءوسۋىن قامتاماسىز ەتۋ جانە باعالاردىڭ تۇراقتى دەڭگەيىن قولداۋ بويىنشا بىرلەسكەن قىزمەتىنىڭ قاعيداتتارى مەن نەگىزگى باعىتتارى بەلگىلەنەدى», - دەدى ول.
ونىڭ ايتۋىنشا, كەلىسىمدە 10 نەگىزگى مىندەت ايقىندالعان. بۇل رەتتە تەڭەستىرىلگەن سالىق-بيۋدجەت ساياساتى تولىق ۇكىمەتتىڭ قۇزىرەتىنە جاتادى.
«ۇلتتىق بانك تومەن ينفلياتسيانى قولداۋعا, سونداي-اق ەلدىڭ ەكونوميكالىق دامۋىنىڭ ورنىقتىلىعىن جانە حالىقتىڭ ءومىر ءسۇرۋ دەڭگەيىنىڭ وسۋىنە باسىمدىق بەرە وتىرىپ ينفلياتسيالىق تارگەتتەۋ رەجيمىن ساقتايدى. بۇل رەتتە ينفلياتسيا بويىنشا نىسانالى باعدار ناقتىلانادى. 2021 جىلعا دەيىن 4-6 پايىز ءدالىزىن ساقتاۋ, ال 2022 جىلدان باستاپ ونى 3-5% دەيىن تومەندەتۋ جانە ۇزاق مەرزىمدى پەرسپەكتيۆادا وسى دالىزدە ساقتاۋ ۇسىنىلادى», - دەدى ۇب باسشىسى.
ە.دوساەۆتىڭ ايتۋىنشا, ۇلتتىق بانك بازالىق ستاۆكا دەڭگەيىن ناقتى كورسەتكىشتە وڭ بولاتىن 3-3,5 پايىز شەگىندە قولداۋعا ۇمتىلاتىن بولادى.
«ينفلياتسيالىق پروتسەستەر كۇشەيگەن جانە ينفلياتسيانىڭ بەلگىلەنگەن نىسانالى دالىزدەن اسۋ تاۋەكەلدەرى ارتقان كەزدە اقشا-كرەديت ساياساتى قاتاڭداتىلۋى مۇمكىن», - دەدى ول.