مەنىڭ ءبىر بايقاعانىم, ەلباسى نۇرسۇلتان نازارباەۆ قازاقتىڭ بايىرعى ءبىتىم, ماعىناسىمەن ساقتالعان كونە ءسوز تىركەستەرى مەن اتاۋلارىن ءسوز اراسىندا ۇنەمى قولدانىپ جۇرەدى.
بۇل تۇڭعىش پرەزيدەنتتىڭ جاس كەزىنەن دانا قارتتارمەن كوپ اڭگىمەلەسكەنىنىڭ بەلگىسى بولسا كەرەك. ءارى قازىرگى زاماندا ءتىل بايلىعىن قالىپتاسىرىپ, ساقتاپ قالۋ ءۇشىن كوركەم كىتاپتى كوپ وقۋ كەرەك. دەمەك, ەلباسىنىڭ كىتاپتى كوپ وقيتىنى, ونىڭ ىشىندە قازاقتىڭ كونە ءتىلىنىڭ قايماعى ساقتالعان شىعارمالاردى ۇنەمى وقيتىنى اڭعارىلادى. بۇل جەردە ادامنىڭ قانى مەن تەگىنە قاتىستى دا دۇنيە بار. قانداعى قازاقىلىق, تەكتەگى ۇلتتىق كود, تىرشىلىكتەگى ۇلتجاندىلىق قانشا جەردەن قۋاتتى بولسا دا جاھاندانۋ مەن وركەنيەت سوققىسىن دارىتقان ەمەس. ءتىپتى جوعارى ەليتا اراسىندا اقسۇيەكتەر مادەنيەتىنىڭ ەكسپانسياسىنا جۇتىلىپ, ءتىلىن جوعالتىپ العان تۇلعالاردىڭ بار ەكەنىن كورىپ جۇرگەنىمىز جاسىرىن ەمەس.
ەلباسىنىڭ وسى قازاقىلىعى, قازاقجاندىلىعى بولۋى كەرەك, پرەزيدەنت بولىسىمەن الەمگە تارىداي تاراعان قازاقتاردىڭ باسىن قوسىپ, الماتىدا دۇنيەجۇزى قازاقتارىنىڭ العاشقى قۇرىلتايىن وتكىزدى. بۇل – سوناۋ الاشوردا تۇسىندا وتكەن مۇسىلماندار قۇرىلتايىنان كەيىن نەبىر زوبالاڭدى باستان كەشىرىپ, ەرىكسىز ەلىنەن قاشۋعا ءماجبۇر بولعان قازاقتاردىڭ قايتا ءبىر تۇگەندەلۋى ەدى. مۇنىڭ ساياسي ۇلكەن قىرلارىن ايتپاساق تا, بۇل قۇرىلتايدىڭ ءوتۋى – الاشوردالىقتار ارمانىنىڭ ورىندالۋى ەكەنىن ايتۋعا ءتيىستىمىز.
1998 جىلى موڭعوليانىڭ ەكىنشى پرەزيدەنتى باگاباندي ءبىزدىڭ ەلگە رەسمي ساپارمەن كەلدى. قابىلداۋدا ءبىز دە بولعانبىز. كوزبەن كورىپ, قۇلاقپەن ەستىدىك. سوندا دەلەگاتسيا قۇرامىندا موڭعوليادا تۇراتىن, مينيستر دارەجەسىنە كوتەرىلگەن قانداستارىمىز دا ءجۇردى. نۇرەكەڭ ءسوز اراسىندا الگى قازاق باۋىرلارىنا قاراتا «قانە, باۋىرلارىم, جاعدايلارىڭ قالاي؟ ەلگە قاشان ورالاسىڭدار؟ سەندەردى تەزىرەك كەلسىن دەپ, استانانى دا سەندەرگە جاقىنداتىپ قويدىم», دەدى. ەلباسىنىڭ رەسمي قابىلداۋدا وسىلايشا, قازاقتاردى ەرەكشە باۋىر تارتىپ, قازاقشا سويلەگەنىنە موڭعول جۋرناليستەر تاڭ-تاماشا بولدى. «نازارباەۆ يۋ حەلەۆ؟» («نازارباەۆ نەنى ايتتى؟») دەپ بىزدەن سۇرادى. ءبىز تۇگەل اۋدارىپ بەردىك. ولار «نازارباەۆ ەرىكسىز الەمدى مويىنداتار كورەگەن باسشى ەكەن!..» دەسىپ, تاڭدانىستى.
مىنە, ءبىز بىلەتىن ەلباسى وسىنداي ادام.
جۇكەل حاماي ۇلى,
اقىن, تۇركىتىلدەس حالىقتار پوەزياسى فەستيۆالىنىڭ لاۋرەاتى
تالدىقورعان