بۇل تاريحي تۇلعانىڭ تاريحي شەشىمى. نۇرسۇلتان نازارباەۆ ءوز مالىمدەمەسىندە بيلىكتە بولعان 30 جىلىنا شولۋ جاساپ, مەملەكەت تاريحىنداعى ماڭىزدى وقيعالارعا توقتالىپ ءوتتى. شىن مانىندە تۇڭعىش پرەزيدەنت وتە قيىن, كۇردەلى كەزەڭدە ەل تىزگىنىن قولىنا الدى. كەڭەستىك قازاقستان قالىپتاستىرۋ جولىندا ۇلكەن جاۋاپكەرشىلىكتى موينىنا جۇكتەدى. قيىن-قىستاۋ ۋاقىتتا ەلدى امان الىپ شىقتى.
وسىنىڭ ءبارى مەملەكەتتىك ساياساتتا ساباقتاستىقتىڭ جۇرەتىنىن كورسەتەدى. تاۋەلسىزدىك جىلدارى تۇڭعىش پرەزيدەنتتىڭ ەل قۋاتىن ەسەلەۋگە قوسقان ەڭبەگى مەن ۇلەسى شەكسىز. ەلباسىنىڭ تالاي جىلعى تىنىمسىز ەڭبەگىنىڭ ناتيجەسىندە قازاق مەملەكەتى جاڭعىردى. شەكارامىز بەلگىلەنىپ, مەملەكەتتىك رامىزدەرىمىز انىقتالدى. تاۋەلسىز قۇندىلىقتار قالىپتاستى. وتىز جىلعا جۋىق مەملەكەت باسىندا بولىپ, قانشاما قيىن-قىستاۋ جاعدايلاردان شاشاسىنا شاڭ جۇقتىرماي شىعا بىلگەن, قازاقستاندى تاۋەلسىزدىك تۇعىرىنا قوندىرىپ, الەمدىك وركەنيەت كوشىنىڭ الدىڭعى لەگىنە قوسقان تارلان تۇلعا بۇل جولى دا پاراسات بيىگىنەن تانىلا ءبىلدى. بۇل – الەمدىك وركەنيەتتىڭ وزىق ۇلگىسى. وسى تاريحي شەشىم ارقىلى ول ءوزىنىڭ ادامزاتتىق قۇندىلىقتارعا, الەمدىك دەموكراتيالىق ۇردىسكە, ۇلتتىق مۇددەگە ادال الەمدىك دەڭگەيدەگى تۇلعا ەكەندىگىن دالەلدەدى.
بۇگىندە نۇرسۇلتان نازارباەۆ پەن قازاقستان ەگىز ۇعىمعا اينالعانىن ەشكىم جوققا شىعارا قويماس. جۋىردا عانا ەلىمىزدىڭ باس ورداسى استانا قالاسىن نۇر-سۇلتان قالاسى دەپ وزگەرتۋ تۋرالى شەشىم شىقتى. بۇل وتە ادىلەتتى شەشىم, ەلباسىنىڭ ۇزاق جىلعى ەلى ءۇشىن ەتكەن ەڭبەگىنە بەرىلگەن بيىك باعا. وسى ۋاقىتقا دەيىن ەگەمەن ەلىمىزدىڭ ايبىنىن اسىرىپ, مەرەيىن تاسىتقان استانا قالاسى بۇدان كەيىن دە نۇر-سۇلتان شاھارى رەتىندە قازاق ۇلتىن الەمگە ايگىلەي بەرەتىنىنە كۇمان جوق. سونىمەن قاتار, باس قالانىڭ ەلباسى اتىمەن اتالۋىن كيەلى اۋليەاتا وڭىرىندەگى پارتيا ۇيىمدارى دا بەلسەنە قولدايدى.
تۇڭعىش پرەزيدەنت ءوز ەڭبەكتەرى ارقىلى ءبىز قاستەرلەپ ايتاتىن «ماڭگىلىك ەل», « ۇلى دالا ەلى», «قازاق ەلى» سياقتى قاسيەتتى ۇعىمداردى سانامىزعا سىڭىرە ءبىلدى. سول ارقىلى ۇلتتىڭ رۋحىن كوتەرىپ, كەمەل كەلەشەككە دەگەن سەنىمىن ۇيالاتتى. وسى جولدا ول ءوزىنىڭ ناعىز ساياساتكەرگە ءتان قىرلارىن, تۇلعالىق شەبەرلىكتەرىن, ادامي قاسيەتتەرىنىڭ ءبارىن كورسەتتى. ەندى سولاردىڭ ءبارى تاريحتىڭ ەنشىسىنە اينالىپ, ۇزاق جىلدار بويى زەرتتەۋشىلەردىڭ نىساناسىنا اينالاتىن بولادى. نۇر-سۇلتان قالاسىندا دا كەيىنگى ۋاقىتتاردا ەل ءۇشىن ماڭىزدى شەشىمدەر قابىلدانىپ, تاريحي كەزەڭدەر قالىپتاسا بەرەتىنىنە سەنىم مول.
شابدەن تىلەۋمۇرات,
«Nur Otan» پارتياسى جامبىل وبلىستىق فيليالى توراعاسىنىڭ ورىنباسارى, وبلىستىق قوعامدىق كەڭەستىڭ حاتشىسى