ۇلىستىڭ ۇلى كۇندەرى ءوڭىردىڭ ءتارتىپ ساقشىلارى باستاماشىلدىعىمەن قايىرىمدىلىق اكتسيالارى ۇيىمداستىرىلىپ, جۇرەك جىلۋىمەن, ىزگى تىلەكتەرىمەن جانە سىيلىقتارىمەن بالالار مەن قارتتاردى قۋانتتى.
«پوليتسيا دەپارتامەنتى باستىعىنىڭ ءبىرىنشى ورىنباسارى قايرات ورازالين باستاعان قايىرىمدىلىق توپ «پەتروپاۆل بالالارعا الەۋمەتتىك قىزمەت كورسەتۋ» ورتالىعىندا اۋىر ناۋقاستان ەمدەلىپ جاتقان جۇزدەن استام بۇلدىرشىنگە سىي-سياپاتتارمەن قوسا ۆوكالدىق توپتىڭ كونتسەرتتىك باعدارلاماسىن ۇسىندى.
«مۇنداي اكتسيالار بارشامىزدىڭ ومىرلىك ماقساتتارىمىزدى بىرىكتىرەدى. ءبىز بالالاردىڭ تەزىرەك ساۋىعىپ كەتۋىن, قاباقتارىن مۇڭ شالماۋىن تىلەيمىز», دەدى پوليتسيا پولكوۆنيگى.
جۇمىسشى كەنتىندەگى قارتتار ۇيىندە تۇرىپ جاتقان وتىز شاقتى زەينەتكەرگە دە تارتۋ-تارىلعىلار ۇلەستىرىلدى. سولاردىڭ ءبىرى 83 جاستاعى ۆاليا كەيۋانانىڭ اۋرۋحانادان شىققان بەتى ەكەن.
پوليتسەيلەر تايىنشا جانە اققايىڭ اۋداندارىنداعى قارتتار مەن مۇگەدەكتەرگە ارنالعان ينتەرنات-ۇيلەرىندە بولدى. قايرات ورازالين بيىل 100 جاسقا تولعالى وتىرعان تىل ەڭبەككەرىن مەرەكەمەن قۇتتىقتاپ, گۇل شوعىن سىيلادى. مەكەمەلەرگە تۇرمىستىق تەحنيكا, ال تۇرعىندارعا ءان-كۇي تارتۋ ەتىلدى.
جامبىل اۋدانىنىڭ از قامتىلعان وتباسىلارىنان 18 بالا كينولوگتاردا قوناقتا بولدى. ماماندار بالالاردى ءتورت اياقتى كومەكشىلەردىڭ جۇمىسىمەن تانىستىردى. مۇندا بالاقايلار پونيعا ءمىنىپ, سەرۋەندەدى. اكۆاپاركتى ارمانسىز ارالادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى