اتىراۋدا قىزدى قۇتقارام دەپ سۋعا كەتكەن شالقار اقىمعاليەۆ مەملەكەتتىك ناگراداعا ۇسىنىلادى. بۇل جايىندا ىشكى ىستەر ءمينيسترىنىڭ كەڭەسشىسى ءارى رەسمي وكىل-ءباسپاسوز ءحاتشىسى نۇردىلدا وراز ايتتى.
«ىشكى ىستەر ءمينيسترى ەرلان تۇرعىمباەۆ پوليتسيا قىزمەتكەرى اقىمعاليەۆ شالقار كوكىنباەۆتىڭ وتباسىنا قايعىلارىنا ورتاقتاسىپ, كوڭىل ايتتى. اتىراۋدا قىزدى قۇتقارام دەپ سۋعا باتىپ كەتكەن پاترۋلدىك پوليتسيا سەرجانتى شالقار اقىمعاليەۆ مەملەكەتتىك ناگراداعا ۇسىنىلادى.ش.اقىمعاليەۆتىڭ وتباسىنا ءىىم جەكە قۇرامى تاراپىنان ماتەريالدىق كومەك كورسەتىلەتىن بولادى», - دەدى ءنۇردىلدا وراز.
ءىىم ەرلان تۇرعىمباەۆ شالقاردىڭ اناسى ءلاززات ماجەنقىزىنا جولداعان كوڭىل ايتۋ حاتىندا ىشكى ىستەر ورگاندارى جانە قالىڭ قازاق جۇرتى ءوزىنىڭ ەر-جۇرەك, باتىر ۇلىنىنان كوز جازىپ قالعاندىعىن, بۇل ورنى تولماس قايعى ەكەندىگىن باسا اتاپ وتكەن.
«قازاقتىڭ داڭقتى باتىرى باۋىرجان مومىش ۇلىنىڭ «ادام بولۋ - قاسيەت, ازامات بولۋ - مىندەت, پاتريوت بولۋ - پارىز» دەگەن قاناتتى ءسوزى بار. سىزدەر تاربيەلەپ وسىرگەن ۇلدارىڭىز شالقار كوشكىنباي ۇلى وسى قاسيەتتەرگە لايىق ەدى. ادام رەتىندە قالىپتاستى, ازامات بولىپ اتقا قوندى, پاتريوتتىق بولمىسىمەن ەل تىنىشتىعىن قورعادى. ول ءاربىر قازاقستاندىقتىڭ ءومىرىن ساقتاۋدى ءوزىنىڭ قاسيەتتى بورىشى سانادى. سوندىقتان سىن ساعاتتاردا ناعىز باتىرلارعا ءتان ەرلىككە بارىپ, وزگەنىڭ ءومىرى ءۇشىن ءوز جانىن قۇربان ەتتى», - دەپ جازدى ول.
مينيستر حاتىندا شالقار كوشكىنباي ۇلى ىشكى ىستەر سالاسىندا بەس جىل قىزمەت اتقارعانىن, ونى ارىپتەستەرى قىزمەتىنە ادال, دوستىققا بەرىك, جۇرەگى ۇلكەن ازامات رەتىندە بىلەتىندىگىنە باسا نازار اۋدارعان.
«ەلىن شەكسىز سۇيگەن, حالقى ءۇشىن ادال قىزمەت اتقارىپ, تۋعان جەر تىنىشتىعىن قاس قاقپاي قورعاعان باتىر ۇل وسىرگەندەرىڭىز ءۇشىن الدارىڭىزدا باسىمىزدى يەمىز. ءبىز ونىڭ ەرەن ەرلىگىن, باتىرلىق بولمىسىن, بيىك ازاماتتىق كەلبەتىن ەشقاشان ۇمىتپايمىز. اسىل ەردىڭ جانى ءجانناتتا, توپىراعى تورقا, يمانى جولداس بولسىن!», دەدى ە.تۇرعىمباەۆ. بۇعان دەيىن اتىراۋدا پوليتسيا سۋعا باتقان ايەلدى قۇتقارام دەپ مەرت بولعانىن حابارلاعان ەدىك.