«حارەكەت» قايىرىمدىلىق قورى كوپبالالى وتباسىعا پاتەر كىلتىن تابىس ەتتى

قاراعاندى وبلىسى بويىنشا قايىرىمدىلىق قورىنىڭ وكىلى اقتوتى جۇنىسوۆا  «حارەكەت» قايىرىمدىلىق قورىنىڭ اشىلعانىنا نەبارى ءبىر جىل بولسا دا,  وسى ۋاقىت ارالىعىندا 82 وتباسىن باسپانامەن قامتاماسىز ەتكەنىن ايتتى. مەرەكە كۇنى قاراعاندى وبلىسىنداعى  كوپ بالالى اناعا پاتەر كىلتىن تابىستاعان.

ونىڭ ايتۋىنشا, التى بالانىڭ اناسى ارداق ولارعا قۇجاتتارىن تاپسىرعانىنا ءبىر اپتا عانا ۋاقىت وتكەن, ال بۇگىن مايقۇدىق ىقشام اۋدانىندا ەكى بولمەلى پاتەردىڭ كىلتىن الدى.

- ۇلكەن راحمەت, مەن بارلىعىنا جانە «حارەكەت» قورىنا وتە ريزامىن. مەن جەسىرمىن, جالعىز ءوزىم التى بالانى اسىراپ وتىرمىن. ۇلكەن ۇلىم 21, ال كىشى قىزىم 9 جاستا. بەس جىل بۇرىن قاراعاندىعا كوشىپ كەلدىك, وسى ۋاقىت ىشىندە ءبىز پاتەر جالداپ تۇردىق, وتە قيىن بولدى. بىراق بۇگىن, ناۋرىز مەيرامىندا ماعان توسىن سىي جاسادى, پاتەر كىلتتەرىن تابىس ەتتى, مەن وتە قۋانىشتىمىن. ايتا كەتەتىن جايت, قازىر تۇڭعىش پرەزيدەنتتىڭ تاپسىرماسى بويىنشا مەن سياقتى كوپ بالالى انالارعا بارلىق قاجەتتى كومەك كورسەتىلە باستادى. بۇل ءۇشىن ەلباسىنا, جەرگىلىكتى بيلىككە جانە وسىنداي قايىرىمدىلىق قورلارعا العىسىمدى بىلدىرەمىن, - دەدى كوپبالالى انا ارداق جۇمابەكوۆا.

ايتا كەتەيىك, ورتالىق ساياباقتا ناۋرىز مەرەكەسىنە قاراي 30 ەكسپوزيتسيالىق كيىز ءۇي مەن 20-عا جۋىق ساۋدا شاتىرى ورناتىلعان. مۇندا «شەبەرلەر قالاسى» مەن التىباقان دا بار.

وبلىستىق ولكەتانۋ مۇراجايى ەكى كيىز ءۇيدى ۇسىندى. وندا ۇلى دالانىڭ جەتى قىرىن بەينەلەيتىن ءداستۇرلى قازاق قولونەرى مەن جادىگەرلەرىن كورۋگە بولادى.

ساياباقتا مەرەكەلىك ءىس-شارالار مەن كونتسەرت جالعاسۋدا. ساحنادا حالىق ۇجىمدارى مەن ق. بايجانوۆ اتىنداعى كونتسەرتتىك بىرلەستىكتىڭ سوليستەرى ونەر كورسەتەدى. 

ەستەرىڭىزگە سالا كەتەيىك, قاراعاندىدا ناۋرىز مەيرامىن تويلاۋ ءبىر كۇنمەن شەكتەلمەيدى. 25 ناۋرىزعا دەيىن قالادا ۇلتتىق سپورت تۇرلەرى بويىنشا سپورتتىق جارىستار, ساندىك-قولدانبالى ونەر بۇيىمدارىنىڭ كورمەلەرى, سۇلۋلىق بايقاۋلارى, ۇلتتىق تاعامداردى دايىنداۋ بويىنشا وتباسىلىق سايىستار وتەدى.

اۋلا كلۋبتارىندا اشىق الاڭداردا مەرەكەلىك كونتسەرتتەر مەن ۇلتتىق سپورتتىق سايىستار ۇيىمداستىرىلدى.