حالىقارالىق ءبىلىم قۇرىلتايىن شاكارىم اتىنداعى مەملەكەتتىك ۋنيۆەرسيتەت ۇجىمى ۇيىمداستىردى. ۋنيۆەرسيت رەكتورى, پروفەسسور مەيىر ەسكەندىروۆتىڭ ايتۋىنشا, ءبىلىم قۇرىلتايىننىڭ باستى ماقساتى, قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ جولداۋى مەن «بولاشاققا باعدار: رۋحاني جاڭعىرۋ» باعدارلامالىق ماقالالارىن جۇزەگە اسىرۋ ماقساتىندا شەتەلدەگى قازاق دياسپوراسىنىڭ باسىن قوسۋ بولىپ تابىلادى.
- شەتەلدەگى قانداستارىمىز, تۇركى الەمىنىڭ وزىق عالىمدارى, قازاق دياسپوراسى رۋحانيات تۋرالى كەڭ اۋقىمدى وي-پىكىرلەرىمەن تاجىريبە الماسىپ, ۇلىستىڭ ۇلى كۇنى ناۋرىزدا اباي ەلىندە, قازاق جەرىندە باس قوسسىن, دەپ نيەتتەندىك,-دەدى شاكارىم ۋنيۆەرسيتەتىنىڭ رەكتورى مەيىر عاريپوللا ۇلى,-ءبىلىم-عىلىم تۋرالى ءوزارا بىرلەسە ەڭبەك ەتىپ, ەلىمىزگە وزىق تەحنولوگيالاردى تارتۋىمىز قاجەت. ءبىلىمدى ەكسپەرتتەۋدىڭ ءوزى ءبىز ءۇشىن اسا ماڭىزدى. جانە بيىل «جاستار جىلى» دەپ جاريالانعاندىقتان ءبىلىمدى دە كرەاتيۆتى جاستارعا قولداۋ كورسەتۋىمىز قاجەت.
ءبىلىم قۇرىلتايىندا شاكارىم ۋنيۆەرسيتەتىنىڭ پروفەسسورى اراپ ەسپەنبەتوۆ الىستان ات ارىلتىپ كەلگەن قوناقتارعا ىزگى تىلەگىن ءبىلدىرىپ, ناۋرىز مەيرامىمەن قۇتتىقتادى. «رۋحاني جاڭعىرۋ» جوبالىق كەڭسەسىندە ابايتانۋشى عاريفوللا ەسىم, تاريحشى-عالىم مۇحتاربەك كارىموۆتەر دە ءسوز سويلەپ, ۇلتتىق ءتىل, دۇنيەتانىم جايلى دارىستەر وقىدى. تاريحشى-عالىم احمەت توقتاباي تۇڭعىش پرەزيدەنتتىڭ « ۇلى دالانىڭ جەتى قىرى» ماقالاسىنا وراي, ستۋدەنت قاۋىمعا جىلقى مالىنىڭ ەرەكشەلىگى تۋرالى ءدارىسىن وقىپ, ويلارىن ورتاعا سالدى.
ەلىمىزدىڭ ءار تۇكپىرىنەن جينالعان ستۋدەنت جاستار اراسىندا رەسپۋبليكالىق ءمۇشايرا, سۋرەتشىلەر, انشىلەر بايقاۋلارى ءوتىپ, قازاق كۇرەسىنەن «شاكارىم بارىسى» ءتۋرنيرى ءوتتى. قۇرىلتايعا قاتىسۋشىلار شاكارىم ەسكەرتكىشىنە تاعىزم ەتىپ, گۇل شوقتارىن قويعان سوڭ, مادەني شارا ءبىلىم الاڭدارىندا جالعاستى. ءبىلىم الاڭدارىندا «Foundation» جوباسى بويىنشا جۇمىس ىستەيتىن قازاق ءتىلىن ۇيرەتۋ ورتالىعىندا قازاق رۋحانياتىنا جول تارتار لاتىن ءالىپبيى تۋرالى كەلەلى اڭگىمە قوزعالدى. جانە «اكمە» كلۋبىندا الىستان كەلگەن قانداستارىمىزدىڭ قاتىسۋىمەن قازاق رۋحانياتىنا قاتىستى وي تالقى دۇنيەلەر ورتاعا سالىندى. شاقىرىلعان قوناقتار اراسىندا گەرمانيا مەملەكەتى, ميۋنحەننەن ەۋروپا قازاقتار قاۋىمداستىعىنىڭ ەكس-توراعاسى, ساياساتتانۋ عىلىمدارىنىڭ دوكتورى ابدۋلكايۋم كەسيجي, تۇركيا مەملەكەتى, ستامبۋل, تۇركياداعى قازاقتار قاۋىمداستىعىنىڭ توراعاسى فازىل توپلۋ, فرانتسيا, پاريجدەن مادەنيەتارالىق بي جانە فولكلور قاۋىمداستىعىنىڭ توراعاسى نەزيھا تۇركەن جانە تاعى باسقالارى بار.
راۋشان نۇعمانبەك.
«ەgemenQAZAQSTAN»
سۋرەتتەر اۆتوردىكى
سەمەي