بۇل تۋرالى اقوردانىڭ ءباسپاسوز قىزمەتى حابارلادى.
پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى قاسىم-جومارت توقاەۆ كونستيتۋتسيالىق كەڭەس مۇشەلەرىنىڭ, جوعارعى سوت سۋديالارىنىڭ, قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ, ۇكىمەت مۇشەلەرىنىڭ قاتىسۋىمەن قازاقستان حالقىنا انت بەردى.
– قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا, ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە, قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن, – دەدى قاسىم-جومارت توقاەۆ.
مەملەكەت باسشىسى راسىمگە قاتىسۋشىلار الدىندا سويلەگەن سوزىندە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ەگەمەن ەلىمىزدى قالىپتاستىرۋعا جانە وركەندەتۋگە, سونداي-اق ەلوردامىز – استانانى تۇرعىزۋعا سىڭىرگەن زور ەڭبەگىنە ايرىقشا توقتالدى.
– بۇگىندە نۇرسۇلتان ءابىش ۇلى نازارباەۆ الەم تاريحىنا اسا كورنەكتى رەفورماتور رەتىندە ەندى. ول قازاقستاندى دۇنيە جۇزىندەگى باسەكەگە قابىلەتتى 50 ەلدىڭ قاتارىنا قوسىلعان زاماناۋي ءارى وزىق مەملەكەتكە اينالدىرا ءبىلدى. ونىڭ ەكونوميكالىق جانە ساياسي رەفورمالارى مەملەكەتتىك سىندارلى ساياساتتىڭ سيمۆولى بولدى, – دەدى قازاقستان پرەزيدەنتى.
قاسىم-جومارت توقاەۆ جوعارى ءارى جاۋاپتى قىزمەتتى اتقارا وتىرىپ, ەلباسىنىڭ ستراتەگيالىق باعىتىن جالعاستىرا بەرەتىنىن ايتتى.
ءراسىم بارىسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسىعا «حالىق قاھارمانى» اتاعى بەرىلىپ, «التىن جۇلدىز» ايرىقشا بەلگىسى تابىس ەتىلدى.