ۇكىمەت وتىرىسىندا «نۇرلى جەر» جانە 7-20-25 باعدارلامالارىنىڭ ىسكە اسىرىلۋ بارىسى قارالدى. يندۋستريا جانە ينفراقۇرىلىمدىق دامۋ ءمينيسترى ر. سكليار, «باسپانا» يپوتەكالىق ۇيىمىنىڭ باسقارما توراعاسى ق. التىنبەكوۆ ءسوز سويلەدى, سونىمەن قاتار مەملەكەتتىك باعدارلاما كورسەتكىشتەرىنە قول جەتكىزبەگەن پاۆلودار جانە باتىس قازاقستان وبلىستارىنىڭ اكىمدەرى تىڭدالدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
«نۇرلى جەر» جانە «7-20-25» باعدارلامالارى – حالىقتىڭ تۇرعىن ءۇي جاعدايىن جاقسارتۋ جونىندەگى ەلباسىنىڭ الەۋمەتتىك ساياساتىنىڭ نەگىزى», — دەگەن پرەمەر-مينيستر ا. مامين, كەلەسى باعىتتار بويىنشا شارالار قابىلداۋ كەرەكتىگىن اتاپ ءوتتى.
ءبىرىنشى. تۇرعىن ءۇي قۇرىلىسىن ودان ءارى دامىتۋ.
«بيىل ءبىز 13,1 ملن شارشى مەتر پاتەردى پايدالانۋعا بەرۋىمىز كەرەك. اكىمدىكتەر جانە ءتيىستى مەملەكەتتىك ورگاندار جەر تەلىمدەرىن ءبولۋ, ينجەنەرلىك-كوممۋنالدىق ينفراقۇرىلىمدى سالۋ, سونىمەن قاتار ينۆەستيتسيالىق تۇرعىن ءۇي جوبالارىن سۇيەمەلدەۋ بويىنشا جۇمىس قارقىنىن ارتتىرۋى قاجەت», — دەدى ا. مامين.
سونىمەن قاتار, مەملەكەت باسشىسىنىڭ تاپسىرماسىنا سايكەس جەكە تۇرعىن ءۇي قۇرىلىسىندا ورتاق ارحيتەكتۋرالىق كەلبەتتى ساقتاۋ كەرەك. پرەمەر-مينيستر اتاپ وتكەندەي, بۇل تاپسىرما تەك ءۇش وڭىردە: اقتوبە, سولتۇستىك قازاقستان جانە قوستاناي وبلىستارىندا ورىندالعان. ال قالعان وڭىرلەردە, بۇل باعىتتا جۇمىس ەندى باستالۋدا. سوندىقتان دا, وسى جۇمىستىڭ قارقىنىن ارتتىرۋدى تاپسىرامىن.
ەكىنشى. مەملەكەت باسشىسىنىڭ تاپسىرماسى بويىنشا «نۇرلى جەر» باعدارلاماسىنا وزگەرىستەر ەنگىزۋ.
ەلباسىنىڭ الەۋمەتتىك قامقورلىق شارالارىن ىسكە اسىرۋ اياسىندا 5 جىلدىڭ ىشىندە, جىل سايىن 6 مىڭعا جۋىق كوپبالالى وتباسى ۇيمەن قامتاماسىز ەتىلەدى.
«1 مامىردان باستاپ پاتەر ءبولۋدى باستايمىز. تۇرعىن ءۇي قۇرىلىس جيناق بانكى ارقىلى جەڭىلدىكتى زايم بويىنشا 22,5 مىڭ وتباسى باسپانا الادى», — دەدى ا. مامين.
بۇل تەتىك زاڭنامالىق اكتىلەرگە وزگەرىستەر ەنگىزىلگەن سوڭ ىسكە قوسىلاتىنى اتاپ ءوتىلدى.
ءۇشىنشى. قۇرىلىستاعى وتاندىق ۇلەستى 90 پايىزعا دەيىن ۇلعايتۋ.
ۇكىمەتتىڭ كەڭەيتىلگەن وتىرىسىندا ەلباسى قۇرىلىستاعى وتاندىق ۇلەستى ۇلعايتۋ مىندەتىن قويدى. وتاندىق قۇرىلىس ماتەريالدارىن شىعارۋ قاراپايىم زاتتار ەكونوميكاسى باعدارلاماسىنىڭ ارنايى باعىتى بولىپ تابىلادى. ونىڭ ورىندالۋىنا 600 ملرد تەڭگە كولەمىندە قاراجات ءبولىنىپ وتىر.
«بۇل ءۇشىن جەڭىلدىكتى قارجىلاندىرۋ مەن مەملەكەتتىك قولداۋ شارالارى كوزدەلگەن. وسى باعىتتا جاڭا جوبالاردى دامىتۋ كەرەك, — دەدى پرەمەر-مينيستر. — جەرگىلىكتى ءونىمدى پايدالانۋ ەكونوميكانىڭ باسقا سالالارىنا مۋلتيپليكاتيۆتى اسەر ەتەدى, جۇمىس ورىندارىن قۇرۋعا مۇمكىندىك بەرەدى».
مىسالى, تۇركىستان قالاسىندا اۋقىمدى قۇرىلىس ءجۇرىپ جاتىر دەپ اتاپ ءوتتى ا. مامين, وسى جەردە قۇرىلىس ماتەريالدارىن شىعارۋ بويىنشا جوبالار جۇزەگە اسىرىلۋى قاجەت. جالپى, وسىنداي وندىرىستەردى بارلىق وڭىرلەردە قۇرۋ تاپسىرىلدى.