بۇگىن «Nur Otan» پارتياسىنىڭ ورتالىق اپپاراتىندا 1 ناۋرىز – پارتيا كۇنىنە وراي پارتيا قاتارىنا قابىلداۋ سالتاناتى ءوتتى. ءىس-شاراعا جاس نۇروتاندىقتارمەن بىرگە ساياسي ۇيىمنىڭ قالىپتاسۋىنا ەڭبەك سىڭىرگەن پارتيا ارداگەرلەرى دە ارنايى قاتىستى. پارتيا توراعاسىنىڭ ءبىرىنشى ورىنباسارى ماۋلەن اشىمباەۆ بارشا نۇروتاندىقتاردى پارتيا كۇنىمەن جانە وسى مەرەكەمەن قاتار كەلگەن العىس ايتۋ كۇنىمەن قۇتتىقتاپ, ىستەرىنە ساتتىلىك تىلەدى. سونداي-اق ول «Nur Otan»-نىڭ الدىندا ەلباسى, پارتيا توراعاسى نۇرسۇلتان ءابىش ۇلى نازارباەۆ پارتيانىڭ XVIII سەزىندە ايقىنداپ بەرگەن ماڭىزدى مىندەتتەر تۇرعانىنا نازار اۋداردى.
جالپى بيىل «Nur Otan» پارتياسى ءۇشىن ەرەكشە جىل. ويتكەنى ساياسي ۇيىمنىڭ قۇرىلعانىنا بيىل 20 جىل تولىپ وتىر. وسى مەرەيلى داتاعا ورايلاستىرىلعان پارتيانىڭ كەزەكتى XVIII سەزىندە مەملەكەت باسشىسى, پارتيا توراعاسى نۇرسۇلتان نازارباەۆ بارشا نۇروتاندىقتاردى اتالعان مەرەيتويمەن قۇتتىقتادى.
تاريحقا از-كەم توقتالار بولساق, وسىدان تۋرا 20 جىل بۇرىن, ياعني 1999 جىلدىڭ 1 ناۋرىزىندا پارتيانىڭ ءبىرىنشى تاريحي سەزى ءوتىپ, وندا ەلباسى ءبىراۋىزدان «Nur Otan» پارتياسىنىڭ توراعاسى بولىپ سايلاندى. سودان بەرى پارتيا جىلناماسىنا التىن ارىپتەرمەن جازىلعان 1 ناۋرىز پارتيا كۇنى رەتىندە اتالىپ وتىلەدى. بۇگىندە «Nur Otan» 1 ميلليوننان استام پارتيا مۇشەسى مەن 6 مىڭ باستاۋىش پارتيا ۇيىمىنىڭ باسىن بىرىكتىرەدى. ەلىمىز بويىنشا پارتيانىڭ 248 فيليالى جۇمىس ىستەيدى.
الدىمەن وسى ماسەلەلەرگە توقتالعان ماۋلەن اشىمباەۆ وتكەن جىلداردا پارتيانىڭ ەلباسىنىڭ ەڭ سەنىمدى تىرەگى جانە ەلىمىزدىڭ جەتەكشى ساياسي كۇشى رەتىندە قالىپتاسىپ ۇلگەرگەنىن ايتتى.
– پارتيا 20 جىلدا ەلباسىنىڭ ەكونوميكانى رەفورمالاۋعا, الەۋمەتتىك سالانى دامىتۋعا, قوعامداعى وزەكتى ماسەلەلەردى وڭ شەشۋگە باعىتتالعان ستراتەگيالىق باستامالارىن جۇزەگە اسىرۋعا بەلسەنە قاتىستى. سوندىقتان ەلىمىزدىڭ بارلىق جەڭىستەرى مەن جەتىستىكتەرىندە «Nur Otan» پارتياسىنىڭ, سونداي-اق, ءار نۇروتاندىقتىڭ ۇلەسى بار, – دەدى پارتيا توراعاسىنىڭ ءبىرىنشى ورىنباسارى.
ونىڭ ايتۋىنشا, وسى ۋاقىت ارالىعىندا پارتيانىڭ قوعامدىق قابىلداۋ بولمەلەرىنە 1 ميلليوننان استام قازاقستاندىق ءوز ءوتىنىشىن ايتىپ كەلگەن. «Nur Otan» 20 جىلدا 1 ميلليون 600 مىڭعا جۋىق ارىز-شاعىم جانە وتىنىشتەر مەن ۇسىنىستاردى قاراپ, ازاماتتاردى الاڭداتقان ماسەلەلەردىڭ وڭ شەشىلۋىنە ىقپال ەتكەن.
سونداي-اق ەلباسىنىڭ مەملەكەتتىڭ الدىنا بۇرىنعىدان دا اۋقىمدى ستراتەگيالىق ماقساتتار قويىپ وتىرعانىن ايتقان ماۋلەن اشىمباەۆ باستى مىندەت – ەلدى جۇيەلى جاڭعىرتۋ ارقىلى الەمنىڭ ەڭ دامىعان 30 مەملەكەتىنىڭ قاتارىنا قوسىلۋ ەكەنىنە نازار اۋداردى.
– الداعى ۋاقىتتا پارتيامىز وسى باعىتتاردا جۇيەلى جۇمىس ىستەيدى. ودان بولەك, پارتيانىڭ كەزەكتى XVIII سەزىندە مەملەكەت باسشىسىنىڭ الداعى ماقسات-مىندەتتەرگە توقتالىپ, بىرقاتار ناقتى تاپسىرما بەرگەنى بەلگىلى. اسىرەسە, الەۋمەتتىك سالادا اتقارىلاتىن ۇتىمدى جوبالاردى ايقىنداپ, ولاردى جۇزەگە اسىرۋدىڭ ءتيىمدى جولدارىن كورسەتتى. بۇل جۇمىستارعا كولەمدى قاراجاتتىڭ بولىنەتىنىن دە جەتكىزدى. ەلباسىنىڭ سەزدە بەرگەن تاپسىرمالارىن ساپالى ءارى ۋاقىتىلى ورىنداۋ ءۇشىن بارشا نۇروتاندىق كۇش بىرىكتىرىپ, بىرلەسىپ جۇمىس ىستەيمىز دەپ سەنەمىن, – دەدى ماۋلەن اشىمباەۆ.
اتالعان سەزدە قازاقستان پرەزيدەنتى حالىقتىڭ ءال-اۋقاتىن جاقسارتىپ, تۇرمىس ساپاسىن ارتتىرۋ ماقساتىندا ۇكىمەتكە بىرقاتار تاپسىرما بەردى. پارتيا توراعاسى ءبىرىنشى ورىنباسارىنىڭ سوزىنە قاراعاندا, وسى ماقساتتا ۇلتتىق قور مەن رەسپۋبليكا بيۋدجەتىنەن 2 تريلليون 350 ميلليارد تەڭگە بولىنەدى. بۇل ەلىمىزدەگى وزەكتى الەۋمەتتىك ماسەلەلەردى شەشۋگە باعىتتالعان ناقتى كومەك ەكەنى ءسوزسىز.
– سەزدە ەلباسى پارتياعا اتالعان باستامالاردى جۇزەگە اسىرۋعا بەلسەنە قاتىسىپ قانا قويماي, بولىنگەن قاراجاتتىڭ ماقساتتى جۇمسالۋى مەن بەرىلگەن تاپسىرمالاردىڭ ورىندالۋ بارىسىنا باقىلاۋ جۇرگىزۋدى جۇكتەدى. سونىمەن قاتار مەملەكەت باسشىسى ناقتى 4 پارتيالىق جوبا تۋرالى ايتىپ ءوتتى. ولاردىڭ ءبىرىنشىسى «باقىتتى وتباسى جوباسى». بۇل باستاما الدىمەن از قامتىلعان جانە كوپ بالالى وتباسىلارعا قولداۋ كورسەتۋ ماقساتىندا قولعا الىنىپ وتىر. جوبا اياسىندا پارتيانىڭ قوعامدىق قابىلداۋ بولمەلەرى مەن فيليالدارى ارقىلى مۇقتاج جاندارعا ناقتى كومەك كورسەتىلەدى. ەكىنشى «قۇتتى مەكەن» جوباسى الدىمەن اۋىلدىق جەرلەردىڭ ينفراقۇرىلىمىن دامىتۋعا باعىتتالعان. «اۋىل – ەل بەسىگى» جوباسى دا اۋىلدارىمىزدى دامىتىپ, ول جاقتا جۇمىس ورىندارىن اشىپ, جايلى ءومىر سۇرۋگە قولايلى جاعداي جاساۋدى كوزدەيدى. ءتورتىنشى «حالىققا كومەك» جوباسى بويىنشا قوعامدىق قابىلداۋ بولمەلەرىندە «بىرىڭعاي الەۋمەتتىك تەرەزەلەر» اشىپ, حالىققا جەدەل ءارى ناقتى كومەك كورسەتۋدى قولعا الدىق, – دەگەن ماۋلەن اشىمباەۆ ەلباسىنىڭ وسى جوبالارعا ءمان بەرۋى پارتيا ءۇشىن ۇلكەن سەنىم مەن جاۋاپكەرشىلىك ەكەنىن ايتتى.
ءسوز سوڭىندا پارتيا توراعاسىنىڭ ءبىرىنشى ورىنباسارى بارشا جيىنعا قاتىسۋشىلاردى العىس ايتۋ كۇنىمەن قۇتتىقتادى.
– بۇل كۇن ەلدىڭ ىنتىماعى مەن بىرلىگىن ودان ءارى ارتتىراتىن زور ماڭىزعا يە. سوندىقتان بارشا قازاقستاندىقتاردى اتاۋلى كۇنمەن قۇتتىقتاپ, شىنايى العىسىمدى بىلدىرەمىن. ءاردايىم ەلىمىز امان, جۇرتىمىز تىنىش بولسىن, – دەدى ماۋلەن اشىمباەۆ.
ايتا كەتەيىك, پارتيا كۇنىنە وراي ەلىمىز بويىنشا 3 مىڭنان استام قازاقستاندىق پارتيا مۇشەسى اتاندى. استانا قالاسىنىڭ وزىندە ءار سالادا ەڭبەك ەتىپ جۇرگەن 20 ازاماتقا پارتيا بيلەتى سالتاناتتى جاعدايدا تابىس ەتىلدى. اتاپ ايتقاندا, «تىنىس» اكتسيونەرلىك قوعامىنىڭ باس ديرەكتورى, ۇكىمەتتىڭ «Caپa سالاسىنداعى جەتiستiكتەرi ءۇشiن» سىيلىعىنىڭ يەگەرى قايرات قالمانباەۆ, «Agro Processing» جانە «Apple World» جاۋاپكەرشىلىگى شەكتەۋلى سەرىكتەستىكتەرىنىڭ باس ديرەكتورى, Almaty Urban Farm Festival, Alma Sunday, Alma Music سياقتى اۋىلشارۋاشىلىق جارمەڭكەلەرى مەن فەستيۆالدەرىن ۇيىمداستىرۋشى ارسەن رىسداۋلەتوۆ, «اينەك-تارا» اينەك زاۋىنىڭ ديرەكتورى, «جىل كوشباسشىسى-2017» ۇلتتىق سەرتيفيكاتىنىڭ يەگەرى, «بيزنەس كوشباسشىسى» سىيلىعىنىڭ لاۋرەاتى ناتەللا دزوتسەنيدزە, بەلگىلى كينو جانە تەاتر اكتەرى, قازاقستاننىڭ ەڭبەك سىڭىرگەن قايراتكەرى ءادىل احمەتوۆ, «وليمپيونيك – الەۋمەتتىك قورى» قوعامدىق قورىنىڭ قۇرىلتايشىسى زەينوللا اقان, جەكە كاسىپكەر ليۋدميلا نەسياەۆا, جاس عالىم, كاسىپكەر, مۋزىكانت, «بيوۆ» قاۋىپسىزدىك تەحنيكالارى جۇيەسىنىڭ اۆتورى ءامىر قۋات, ديريجەر, قازاق ۇلتتىق ونەر ۋنيۆەرسيتەتىنىڭ ءانشى-كونترتەنورى. حالىقارالىق بايقاۋلاردىڭ لاۋرەاتى باتىرجان سماقوۆ, «ليتەر» رەسپۋبليكالىق قوعامدىق-ساياسي گازەتى باس رەداكتورىنىڭ ورىنباسارى جاننات ويشىباەۆا, قازاقستاننىڭ 100 جاڭا ەسىمى بايقاۋىنىڭ جەڭىمپازدارى: بولات سۇلتانقۇلوۆ, الماز يبراگيموۆ جانە عالىم نۇرلانوۆ, «التىن ادام» تىگىن فابريكاسى ديرەكتورىنىڭ ورىنباسارى ءاليا وتاروۆا, بالالارعا ارنالعان كيىمدەر شىعاراتىن «MIMIORIKI» تۇڭعىش قازاقستاندىق برەندتىڭ ارت-ديرەكتورى مايا جۇمانبەكوۆا, «نپپ Kazakh Osseter» جاۋاپكەرشىلىگى شەكتەۋلى سەرىكتەستىگىنىڭ ديرەكتورى تۇرسىنگۇل جاقىپوۆا, قازاقستاننىڭ ەڭبەك سىڭىرگەن قايراتكەرى, بەلگىلى تەلەجۇرگىزۋشى قاراگوز سۇلەيمەنوۆا, كوستەنكو اتىنداعى شاحتانىڭ جۇمىسكەرى, اكروباتيكادان الەم كۋبوگى مەن ازيا چەمپيوناتىنىڭ جۇلدەگەرى دانيەل ديل, «جاڭعىرۋ جولى» قازاقستان حالقى اسسامبلەياسى جاستار قاناتى استانا قالالىق شتابىنىڭ جەتەكشىسى ناتاليا كاراگەۋر, «ارۋ-تاس» بەتون بۇيىمدارىن شىعارۋ زاۋىتىنىڭ ديرەكتورى, «دارىن» مەملەكەتتىك سىيلىعىنىڭ لاۋرەاتى بەكجان الىمقۇلوۆ جانە «حابار» اگەنتتىگى» اكتسيونەرلىك قوعامى باسقارما توراعاسىنىڭ ءبىرىنشى ورىنباسارى رينات كەرتاەۆ «Nur Otan» پارتياسىنىڭ مۇشەسى اتاندى.
ءىس-شارا سوڭىندا پارتيا ارداگەرلەرى ءسوز الىپ, پارتيانىڭ قالىپتاسۋ كەزەڭى تۋرالى ايتتى. سونداي-اق ولار جاستارعا باتالارىن بەرىپ, ەلدىك مۇددە جولىنداعى ىستەرىنە تابىس تىلەدى.