مۇنان بىلاي شىمكەنتتە جۇرگىزۋشى كۋالىگىن زاڭسىز تىركەۋدىڭ جولى كەسىلمەك. وسىعان وراي قالالىق حالىققا قىزمەت كورسەتۋ بويىنشا مامانداندىرىلعان ءبولىمى جەرگىلىكتى كولىك جۇرگىزۋشىلەرىنە ارناپ «تەگىن قىزمەتكە اقى تولەمە!» اكتسياسىن ۇيىمداستىردى.
شىمكەنت قالاسىنداعى مامانداندىرىلعان حقو ءۇش جىل بويى مەملەكەتتىك قىزمەتتەردى ستاندارتتارعا سايكەس قولدانىلاتىن بيزنەس-ۇردىستەر بويىنشا جۇرگىزۋدە. مۇندا كۇن سايىن 200-گە جۋىق جۇرگىزۋشى كۋالىگى بەرىلىپ, 1000-نان استام كولىك قۇرالدارى تىركەلەدى.
«ونلاين رەجيمدەگى قىزمەتتى الۋ مەحانيزمى وتە قاراپايىم. ول ءۇشىن egov.kz پورتالىنا كىرىپ, ءوتىنىمدى تولتىرىپ جانە ءوزىنىڭ جەكە ەلەكتروندى تسيفرلىق قولتانباسىمەن (ەتسق) قول قويسا جەتكىلىكتى. وتىنىمگە فوتوسۋرەت جانە قولتاڭبانىڭ سكانەرلەنگەن سۋرەتى قوسا جۇكتەلەدى. جەكە كابينەتتە قۇجاتتىڭ دايىن ەكەندىگى تۋرالى حابارلاما العاننان كەيىن ء(موبيلدى ازاماتتار بازاسىنا تىركەلگەننەن كەيىن SMS-حابارلاما جولدانادى) مامانداندىرىلعان حقو – عا بارىپ تەك دايىن جۇرگىزۋشى كۋالىگىن الىپ كەتەدى. ايتا كەتەيىن, جىل باسىنان بەرى ونلاين رەجيمدە قالا بويىنشا 80 استام اۆتوكولىك قۇرالدارى تىركەلىپ, 20 جۋىق جۇرگىزۋشى كۋالىگى بەرىلدى», - دەيدى «ازاماتتارعا ارنالعان ۇكىمەت» كە اق شىمكەنت قالاسى بويىنشا فيليالىنىڭ ديرەكتورىنىڭ ورىنباسارى جومارت ۇمبەتاليەۆ.
وتكەن جىلدان بەرى ازاماتتار وزدەرىنە قولايلى كەز-كەلگەن ۋاقىتتا ەلەكتروندى ۇكىمەت پورتالى ارقىلى جۇرگىزۋشى كۋالىگىن الماستىرىپ, اۆتوكولىكتى قايتا تىركەي الۋ مۇمكىندىگىنە يە بولدى. بۇل ازاماتتاردىڭ ۋاقىتىن ايتارلىقتاي ۇنەمدەيدى جانە كەزەككە تۇرۋ قاجەتتىگىن بولدىرمايدى.
سالا ماماندارىنىڭ ايتۋىنشا مۇنداي ءىس-شارالار حالىقتىڭ تسيفرلىق ساۋاتتىلىعىن ارتتىرۋعا جانە «كومەك» دەپ اتالاتىن دەلدالدارمەن كۇرەسۋگە كومەكتەسەدى.
نۇرشات توكەن,
«Egemen Qazaqstan»
شىمكەنت