«Nur Otan» پارتياسىنىڭ XVIII سەزىندە نۇرسۇلتان نازارباەۆ ءتيىستى مەكەمەلەرگە تۇرمىسى تومەن كوپ بالالى وتباسىلارىنا 2-3% يپوتەكالىق نەسيە بەرۋ باعدارلاماسىن ازىرلەۋدى تاپسىرعان بولاتىن. قولجەتىمدى باسپانا باعدارلاماسى مەملەكەتتىك تۇرعىن ءۇي قۇرىلىس جيناق بانكى ارقىلى ساۋىردەن باستاپ جۇزەگە اسىرىلا باستايدى دەپ حابارلايدى قازاقپارات ءتىلشىسى.
مامانداردىڭ ەسەبىنشە, ەگەر پاتەردىڭ قۇنى 8 ملن تەڭگە بولسا, باستاپقى 8 جىلدا نەسيە الۋشى اي سايىن 42 مىڭ تەڭگەدەن, كەيىنگى 11 جىل ىشىندە 27,400 تەڭگەدەن تولەپ وتىرادى. بۇل - ازىرشە جوبا عانا.
«ەلباسى «نۇرلى جەر» باعدارلاماسى اياسىندا تۇرمىسى تومەن كوپبالالى وتباسىلار ءۇشىن 40 مىڭنان استام جالدامالى پاتەر سالىناتىندىعىن اتاپ ءوتتى. بۇل ماقساتقا الداعى 7 جىلدا جىل سايىن قوسىمشا 50 ملرد تەڭگە بولىنبەك. سونىمەن قاتار مەملەكەت باسشىسى كوپبالالى جانە تولىق ەمەس وتباسى, مۇمكىندىگى شەكتەۋلى بالالارى بار, سونداي-اق كىرىسى تومەن وتباسىلارعا باسپانا ساتىپ الۋدىڭ قولجەتىمدىگىن ارتتىرۋ قاجەتتىگىن اتاپ ءوتتى. تۇرعىن ءۇي قۇرىلىس جيناق بانكى قازىر جاڭا باعدارلاما ازىرلەپ جاتىر. ءساۋىر ايىنان باستاپ جۇزەگە اسىرىلا باستايدى دەپ جوسپارلاپ وتىرمىز», - دەيدى «تۇرعىن ءۇي قۇرىلىس جيناق بانكى» اق سقوف ءبولىم باسشىسى ءامىر نۇرمۇقانوۆ.