بيىل ەلىمىز ءۇشىن «نۇر وتان» پارتياسىنىڭ 20 جىلدىعى اتالىپ وتەتىن ماڭىزدى جىل. وسىدان 20 جىل بۇرىن ەلباسىمىز نۇرسۇلتان ءابىش ۇلى نازارباەۆتىڭ جانىنا توپتاسقان ازاماتتار «وتان» حالىقتىق-دەموكراتيالىق پارتياسىن تىركەۋ تۋرالى ءبىراۋىزدان شەشىم قابىلداعان بولاتىن. وسى جىلداردا ەلباسىمىز باستاعان پارتيا ەلىمىزدەگى ساياسي جانە قوعامدىق جاڭارۋلاردىڭ قوزعاۋشى كۇشى بولىپ كەلەدى.
مەملەكەت باسشىسى «نۇر وتان» پارتياسىنىڭ XVIII سەزىندە الەۋمەتتىك قولداۋدى كۇشەيتۋ جانە حالىقتىڭ ءومىر ءسۇرۋ ساپاسىن ارتتىرۋ جونىندەگى اۋقىمدى شارالاردى ۇسىندى. وسى شارالاردى ىسكە اسىرۋ ءۇشىن مەملەكەت باسشىسىنىڭ تاپسىرماسى بويىنشا رەسپۋبليكالىق بيۋدجەت پەن ۇلتتىق قوردان قوماقتى قارجى بولىنەتىن بولادى. تەك بيىلدىڭ وزىندە ەل بيۋدجەتىنىڭ 45 پايىزى الەۋمەتتىك سالاعا جىبەرىلمەك.
سەزدە حالىققا ارنالعان اسا ماڭىزدى ماسەلەلەر – بالالاردىڭ جاردەماقىسى, تۇرعىن ۇيمەن قامتۋ, الەۋمەتتىك سالانى جاڭعىرتۋ جانە باسقا دا ماڭىزدى مىندەتتەر بەلگىلەندى.
قازاقستان پرەزيدەنتى نۇرسۇلتان نازارباەۆ حالىقتىڭ الەۋمەتتىك ءالسىز توپتارىن قولداۋدىڭ ماڭىزدىلىعىن اتاپ ءوتتى. جاڭا الەۋمەتتىك ساياسات ەلدەگى الەۋمەتتىك تۇراقتىلىقتى قامتاماسىز ەتۋگە جانە قازاقستاننىڭ بارلىق ازاماتتارىنا بىردەي العا باسۋ شارتتارىن جاساۋعا ءتيىس. بۇل ەڭ الدىمەن حالىقتىڭ الەۋمەتتىك ءالسىز توپتارى مەن جاستارعا قاتىستى بولىپ وتىر. كوپ بالالى, تابىسى از وتباسىلار ەرەكشە قامقورلىققا الىنىپ, نازاردا بولادى. قامتىلۋى تومەن وتباسىلاردى قولداۋدى ۇلعايتۋ ءۇشىن كۇنكورىس دەڭگەيىنىڭ تومەنگى شەگى 70 پايىزعا دەيىن ۇلعايادى. اتاۋلى الەۋمەتتىك كومەك ءۇشىن كوپ بالالى وتباسىنداعى ءار بالاعا 21 مىڭ تەڭگەگە جۋىق تولەم بەرىلۋى جوسپارلاندى.
قازاقستاندىقتاردى تۇرعىن ۇيمەن قامتاماسىز ەتۋ جونىندەگى جۇمىستار قارقىن الا تۇسەدى. ەلباسى 40 مىڭنان استام جالعا بەرىلەتىن پاتەر سالۋعا جانە وسى ماقساتتا جىل سايىن 50 ميلليارد تەڭگە ءبولۋ جونىندە تاپسىرما بەردى. كوپ بالالى, تولىق ەمەس جانە تابىسى از وتباسىلار ءۇشىن تۇرعىن ءۇي قۇرىلىس جيناق بانكى ارقىلى جىلىنا 2 پايىزدىق باعدارلاما ازىرلەنەتىن بولادى.
ەلدى الەۋمەتتىك جاڭعىرتۋ جونىندەگى جاڭا مىندەتتەردى ىسكە اسىرۋدى كوزدەيتىن جاڭا ۇكىمەت قۇرىلدى, ول ناقتى ناتيجەگە باعىتتالعان ىرگەلى ىستەردىڭ ۇكىمەتى بولۋعا ءتيىس. مەملەكەت باسشىسى ۇكىمەت الدىنا حالىق ءومىرىنىڭ دەڭگەيى مەن ساپاسىن ارتتىرۋ, تابىسى از ازاماتتاردىڭ تۇرعىن ءۇي ماسەلەلەرىن شەشۋ, ءبىلىم بەرۋ جانە دەنساۋلىق ساقتاۋ, ايماقتاردى كەشەندى تۇردە دامىتۋعا باعىتتالعان باسىم مىندەتتەردى قويدى.
«نۇر وتان» پارتياسىنىڭ مەرەيتويلىق سەزىنىڭ دەلەگاتتارى قۇندىلىق باعدارىن بەكەمدەۋگە جانە پارتيانىڭ الداعى ونداعان جىلدارداعى ميسسياسىن ايقىنداۋعا باعىتتالعان جاڭا ساياسي دوكتريناسىن قابىلدادى.
ەكونوميكانى دامىتۋ مەن ازاماتتاردىڭ الەۋمەتتىك ءال-اۋقاتىن ارتتىرۋدىڭ ەڭ وزەكتى ماسەلەلەرىنە نازار اۋدارۋ اسا ماڭىزدى. بۇل ماسەلەلەردى شەشۋ ءبىزدىڭ پارتيامىزدىڭ ءبىرىنشى كەزەكتەگى باسىمدىعى.
بۇگىن پارتيا مۇشەلەرىنىڭ الدىندا مەملەكەت باسشىسىنىڭ تاپسىرمالارىن ىسكە اسىرۋ مىندەتتەرى تۇر. وتانىمىز – قازاقستان رەسپۋبليكاسىن وركەندەتۋ جولىنداعى ەل پرەزيدەنتى, «نۇر وتان» پارتياسى توراعاسىنىڭ الەۋمەتتىك جانە ساياسي رەفورمالار جونىندەگى باستامالارىن جۇزەگە اسىرۋدا ءبىز ونىڭ سەنىمدى تىرەگى ەكەنىمىزدى ناقتى ىستەرمەن, ايقىن ناتيجەمەن دالەلدەۋىمىز كەرەك دەپ ويلايمىن.
اسقار بەيسەنباەۆ,
سەنات دەپۋتاتى, ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى