ەلىمىزدىڭ اۋماعىندا 2 ماگيسترالدى گاز قۇبىرى, 3 گاز قۇبىرى جانە 1 اۆتوماتتاندىرىلعان گاز تاراتۋ ستانساسى سالىنادى. بۇل تۋرالى بۇگىن ۇكىمەت وتىرىسىندا ەنەرگەتيكا ءمينيسترى قانات بوزىمباەۆ مالىمدەدى.
«2 ماگيسترالدى گاز قۇبىرىن سالۋعا 60 ملرد تەڭگە ءبولۋ ۇسىنىلىپ وتىر. ءبىرى - اقتوبە وبلىسى 30 ملرد تەڭگە, ال, ەكىنشىسى - ماڭعىستاۋ ءوڭىرى. ول جاققا دا شامامەن 30 ملرد تەڭگە قاراستىرۋ قاجەت. جوبالاردى جۇزەگە اسىرۋ ناتيجەسىندە ماڭعىستاۋ جانە اقتوبە وبلىستارىندا گازبەن جابدىقتاۋ جۇيەسىنىڭ سەنىمدىلىگى ۇلعايادى. ايتا كەتۋ كەرەك, ءبىر ماڭعىستاۋ وبلىسىنىڭ وزىندە 130 مىڭ تۇرعىن قوسىمشا گازبەن قامتىلادى» دەدى ول.
سونىمەن قاتار مينيستر 3 گاز قۇبىرىن جانە ءبىر اۆتوماتتاندىرىلعان گاز تاراتۋ ستانساسىن سالۋعا قارجى ءبولۋدى ۇسىندى. ونىڭ جالپى سوماسى 12,3 ملرد تەڭگەنى قۇرايدى. «سونىڭ ىشىندە جامبىل وبلىسىندا 3 جوبانىڭ جالپى سوماسى 8,4 ملرد تەڭگەنى قۇرايدى. جوبالار جۇزەگە اسقاننان كەيىن 175 مىڭ ادام گازبەن قامتىلادى. قوستاناي وبلىسىندا - 1 جوبا. ونىڭ قۇنى 3,9 ملرد تەڭگە. ناتيجەسىندە 9 مىڭ ادام گازبەن قامتىلادى. جالپى ايتقاندا, بۇل جوبالار ىسكە اسسا, وسى وڭىردەگى 184 مىڭ حالىق گازبەن قامتىلادى» دەدى مينيستر.
ق.بوزىمباەۆ باتىس قازاقستان وبلىسىنىڭ تەرەكتى اۋدانىندا گاز تاراتۋ جەلىلەرىن سالۋعا 1,6 ملرد تەڭگە قاجەت ەكەندىگىن ايتتى. بۇل جوبا 10 مىڭ ادامدى كوگىلدىر وتىنمەن قامتىماق.