بوچەنسكي مەن فرەتتيننىڭ بەنەفيسى

ون مىڭعا جۋىق جانكۇيەردىڭ قولداۋىمەن «بارىس ارەنا» مۇزاي­دىن سارايىندا وتكەن كەزدە­سۋدە «بارىس» كومانداسى جان­كۇيەرلەر كۇتكەندەي ماتچ باسىندا ويىن تىزگىنىن ءوز قولىنا الىپ, پلەي-وفف كەزەڭىنىڭ كەلەسى ساتىسىنا شىعۋدى الدىنا ماقسات ەتىپ قويعانى انىق بايقالدى. ءتىپتى, ماتچتىڭ بەسىنشى مينۋتىندا مەتتيۋ فرەتتين «تورپەدو» قاق­­پاشىسى براست بارريمەن بىر­گە-ءبىر شىققان بولاتىن, بىراق بارري شەبەرلىگىمەن كوزگە ءتۇسىپ, قاقپاسىن گولدان ساقتاپ قالدى. ماتچتاعى ەسەپتى ءبىرىنشى بولىپ قوناق كوماندا اشتى. ويىننىڭ 12-مينۋتىندا «تورپەدو» ويىن­شىسى روبەرت سابوليچ مەر­گەن­دىگىمەن كوزگە ءتۇسىپ, كومانداسىن ەسەپتە العا شىعاردى. جەر­لەستەرىمىز ءبىرىنشى كەزەڭدە ەسەپتى تەڭەستىرۋگە تىرىسىپ باق­قانىمەن, قارسىلاستار شايبا سوعۋعا مۇمكىندىك بەرگەن جوق. 

«بارىس» حوككەيشىلەرى ەكىن­شى كەزەڭىنىڭ ورتا تۇسىنان باس­تاپ قارسىلاس كوماندانىڭ قاقپاسىنا قاراي شابۋىلدى قارشا بوراتتى. ءتىپتى, تابلوداعى كورسەتكىش 0:1 ەمەس, 10:1 ناتي­جەسىمەن «بارىس» پايداسىنا شەشىلۋى مۇمكىن ەدى. بىراق «تورپەدو» قاقپاشىسى براست ءبارريدىڭ شەبەرلىگىن ەرەكشە اتاپ ءوتۋ كەرەك. «بارىستىڭ» ەكىنشى كەزەڭ بويى تىنىمسىز شابۋىلىنىڭ ناتي­جەلى اياقتالۋىنا بارري مۇمكىندىك بەر­مەدى. ول قاقپاسىنا بىردە-ءبىر شايبا وتكىزگەن جوق. «بارىس» ويىنشىلارى ەكىنشى كەزەڭنىڭ سوڭعى مينۋتىندا ەسەپ­تى تە­ڭەستىرۋگە مۇمكىندىك ال­دى. شاي­با اۆتورى – اندرە پەتەرس­سون. 

ءۇشىنشى كەزەڭدە دە ويىن تىزگىنىن قولعا العان ەلوردا كومانداسى 42-مينۋتتا ءوز دەگەنىنە جەتىپ, برەندون بوچەنسكيدىڭ سوققان شايباسىنىڭ ناتيجە­سىندە ەسەپتە العا شىقتى. ارادا ەكى مي­نۋت وتكەندە مەتتيۋ فرەت­­تين مەرگەندىگىمەن كوزگە ءتۇسىپ, كومانداسىنىڭ ءۇشىنشى شاي­باسىن سوقتى. «بارىستىڭ» باسىمدىعىمەن وتكەن كەزدە­سۋدىڭ نۇكتەسىن 56-مينۋتتا كو­ماندا كاپيتانى برەندون بو­چەنسكي قويدى. قورىتىندى ەسەپ – 4:1, «بارىستىڭ» پايداسىنا. 

بۇگىنگە دەيىن ەكى كلۋب تۇ­راقتى بىرىنشىلىك اياسىندا ءوزارا 24 كەزدەسۋ وتكىزدى. سونىڭ 11-ىندە «بارىس» باسىمدىق تا­نىتقان بولاتىن. قالعانىندا «تورپەدونىڭ» اسىعى الشىسىنان ءتۇستى. ايتا كەتۋ كەرەك, ەلوردالىقتار 8 مارتە نەگىزگى ۋاقىتتا جەڭىسكە جەتسە, ەكى ويىندا وۆەرتايمدا باسىم تۇسكەن. ال ءبىر كەزدەسۋدە «بارىس» بۋلليت سەرياسى بويىنشا ۇتقان بولاتىن. ەلوردا كومانداسى قارسىلاس قاقپاسىنا 71 شايبا سوقسا, «تورپەدو» ويىنشىلارى 68 مارتە مەرگەندىك تانىتقان. ەكى كوماندا سوڭعى رەت بىلتىر 14 قىركۇيەكتە كەزدەسىپ, «با­رىس ارەنادا» وتكەن ماتچتا ەلور­دالىقتار 4:1 ەسەبىمەن جەڭىسكە جەتكەن ەدى.

ەكى كوماندا اراسىنداعى پلەي-وفف كەزەڭىنىڭ ەكىنشى كەز­دەسۋى بۇگىن «بارىس ارەنا» مۇزاي­­دىن سارايىندا وتەدى. قال­عان ەكى ويىن 2 جانە 4 ناۋرىز­دا تومەنگى نوۆگورودتا وتەدى. اي­تا كەتەيىك, پلەي-وفف كەزەڭى ەكى كو­ماندانىڭ ءبىرى ءتورت رەت جەڭىسكە جەتكەنگە دەيىن جالعاسادى.

ءالي بيتورە,

«Egemen Qazaqstan»