سەنبى, 22 جەلتوقسان 2012 7:11
داۋ قايتا ءورشۋى مۇمكىن
جاپونيانىڭ تەڭىز جاعالاۋى كۇزەتى داۋلى ارالدار سەنكاكۋ ماڭىنان قىتايدىڭ ءۇش بارلاۋ كەمەسىن بايقاعان. «فرانس-پرەسس» اقپارات اگەنتتىگىنىڭ جازۋىنشا, داۋلى اۋماقتان قىتاي كەمەلەرىنىڭ كورىنۋى جاپونيادا وتكەن پارلامەنتتىك سايلاۋدان كەيىن بولعان العاشقى جاعداي.
سەنبى, 22 جەلتوقسان 2012 7:11
داۋ قايتا ءورشۋى مۇمكىن
جاپونيانىڭ تەڭىز جاعالاۋى كۇزەتى داۋلى ارالدار سەنكاكۋ ماڭىنان قىتايدىڭ ءۇش بارلاۋ كەمەسىن بايقاعان. «فرانس-پرەسس» اقپارات اگەنتتىگىنىڭ جازۋىنشا, داۋلى اۋماقتان قىتاي كەمەلەرىنىڭ كورىنۋى جاپونيادا وتكەن پارلامەنتتىك سايلاۋدان كەيىن بولعان العاشقى جاعداي.
كەمەلەر سەنكاكۋ ارحيپەلاگىنا كىرەتىن كۋبادزيما ارالىنىڭ سولتۇستىك-باتىسىندا جەرگىلىكتى ۋاقىت بويىنشا ساعات 10.20-دا بايقالعان. بۇل ارەكەتتەرگە جاۋاپ رەتىندە توكيو وسى ايماققا سەگىز يسترەبيتەل مەن تاعى ءبىر اسكەري ۇشاق جىبەرىپتى. ايتا كەتەيىك, 1970 جىلدان بەرى جالعاسىپ كەلە جاتقان سەنكاكۋ ارالدارىنا قاتىستى ەكى مەملەكەت اراسىنداعى داۋ, وندا كومىرسۋتەگى تابىلعاننان كەيىن قايتا ورشىگەن ەدى.
ەل تاريحىندا تۇڭعىش رەت
وڭتۇستىك كورەيادا وتكەن پرەزيدەنتتىك سايلاۋدا «سەنۋري» كونسەرۆاتيۆتىك بيلەۋشى پارتياسىنىڭ وكىلى پاك كىن حە جەڭىسكە جەتتى.
وسى ەلدىڭ سايلاۋ كوميسسياسى تاراتقان مالىمەتتەر بويىنشا, اسا تارتىستى وتكەن پرەزيدەنتتىك سايلاۋدا پاك كىن حە ءوزىنىڭ نەگىزگى باسەكەلەسى مۋن چجە ءيندى ارتتا قالدىرىپ, سايلاۋشىلاردىڭ 51 پايىزدان استام داۋىسىنا يە بولدى. ەل تاريحىندا تۇڭعىش رەت پرەزيدەنتتىككە ايەل ادامنىڭ سايلانۋى ونىڭ ەنشىسىنە ءتيىپ وتىر. ەندى ول 2013 جىلدىڭ اقپانىندا وكىلەتتىگى اياقتالاتىن لي مەن باكتى اۋىستىرادى. پاك كىن حە گەنەرال پاك چون ءحيدىڭ قىزى. اكەسى كەزىندە وڭتۇستىك كورەياداعى ەڭ كورنەكتى تۇلعالاردىڭ ءبىرى بولعان. 1963-1979 جىلدار ارالىعىندا پرەزيدەنت تاعىنا دا وتىرعان.
اسكەريلەر جىبەرۋدى ماقۇلدادى
بۇۇ-نىڭ قاۋىپسىزدىك كەڭەسى مالي ەلىنىڭ قاۋىپسىزدىگىن قورعاۋ ماقساتىندا وسى مەملەكەتكە حالىقارالىق اسكەري كونتينگەنت جىبەرۋ ماسەلەسىن ماقۇلدادى. ۇيىم سايتىنداعى اقپاراتقا قاراعاندا, قاۋىپسىزدىك كەڭەسىنە مۇشە 15 ەلدىڭ بارلىعى جاقتاپ داۋىس بەرگەن.
حالىقارالىق اسكەري ميسسياعا ەل ۇكىمەتىنىڭ سولتۇستىك ايماقتارداعى تەررورشىلارمەن, ەكسترەميستەرمەن جانە قارۋلى توپتارمەن كۇرەسىنە كومەك كورسەتۋ ءۇشىن «قاجەتتى بارلىق شارالاردى» قولدانۋعا دا رۇقسات ەتىپتى. وسىعان بايلانىستى قاراردا جۇزەگە اسىرىلاتىن وپەراتسيالار حالىقارالىق گۋمانيتارلىق قۇقىق نورمالارىن جانە ادام قۇقىقتارىن بۇزباۋ جاعى اتاپ كورسەتىلگەن. ميسسياعا باستاپقى ماندات ءبىر جىل مەرزىمگە بەرىلگەن. «فرانس-پرەسس» اگەنتتىگىنىڭ اقپاراتى بويىنشا, كونتينگەنتتىڭ مىندەتى – ەلدىڭ قارۋلى كۇشتەرىن دايىنداۋ, اسكەري وپەراتسيالارعا قولداۋ كورسەتۋ, سونداي-اق تۇرعىنداردىڭ قاۋىپسىزدىگىن قورعاۋ جانە بوسقىنداردى ءوز ەلىنە قايتارۋ.
سەرديۋكوۆتىڭ دا اتى اتالدى
رەسەي قورعانىس مينيسترلىگىنە قارايتىن «وبورونسەرۆيس» ءىسى بويىنشا قاماۋدا وتىرعان دميتري ميتياەۆ تەرگەۋشىلەرگە بەرگەن جاۋاپتارىندا بۇرىنعى مينيستر اناتولي سەرديۋكوۆتىڭ ۆەدومستۆونىڭ م ۇلىكتەرىنە قاتىستى جاساعان ايلا-شارعىسى تۋرالى ايتىپ بەردى. بۇل جونىندە كەشە «يزۆەستيا» گازەتى جازدى.
جۋرناليستەرگە بەلگىلى بولعانىنداي, د.ميتياەۆتىڭ ايتۋىنشا, سەرديۋكوۆتىڭ جەكە ءوزى «وبورونسەرۆيس» ديرەكتورلار كەڭەسىنىڭ مۇشەلەرىنە, اسىرەسە, ە.سمەتانوۆاعا مينيسترلىكتىڭ م ۇلىكتەرىن ساتۋ ماسەلەلەرى بويىنشا قالاي داۋىس بەرۋ قاجەت ەكەندىگى جونىندە تاپسىرما بەرگەن كورىنەدى. بىراق بۇل تەرگەۋشىلەردى قىزىقتىرا قويماعان. ال ميتياەۆتىڭ ادۆوكاتى تاراپ كەتكەن اقپارات تۋرالى ايتىپ بەرۋدەن باس تارتقان. ول تەك ميتياەۆتىڭ ءىسى «وبورونسەرۆيستىڭ» نەگىزگى ىستەرىنەن بولەك قارالىپ جاتقانىنان, ميتياەۆتىڭ ءىسىن تەرگەۋ كوميتەتىنىڭ اسكەر باسقارماسى ەمەس, ءىىم-ءنىڭ تەرگەۋ دەپارتامەنتى تەرگەگەنىنەن حاباردار ەتكەن.
«ماگنيتسكي زاڭىنا» قارسى جاۋاپ
اقش-تىڭ مەملەكەتتىك دەپارتامەنتى رەسەيدىڭ «ماگنيتسكي زاڭىنا» جاۋاپ رەتىندە قابىلداعان الداعى ۋاقىتتا امەريكالىقتاردىڭ رەسەيلىك بالالاردى اسىراپ الۋعا تىيىم سالۋ تۋرالى قۇجاتىنا الاڭداۋشىلىق ءبىلدىردى.
مەملەكەتتىك دەپارتامەنت وكىلىنىڭ مالىمدەمەسىندە: «ءبىز زاڭنىڭ سوڭعى نۇسقاسىن كۇتىپ وتىرمىز, ءوزىمىزدىڭ كوزقاراسىمىزدى جەتكىزۋ ماقساتىندا رەسەيلىك رەسمي تۇلعالارمەن بايلانىساتىن بولامىز», دەلىنگەن. سونىمەن بىرگە, وكىل حالىقارالىق اسىراپ الۋدىڭ ارقاسىندا جىل سايىن «مىڭداعان بالا اتا-انالى بولاتىنىن», ال امەريكالىق وتباسىلاردىڭ ءومىرى جاقسى ەكەنىن دە اتاپ ءوتىپتى. بۇل قۇجاتتا اقش ازاماتتارىنىڭ رەسەيلىك بالالاردى اسىراپ الۋعا تىيىم سالۋ عانا ەمەس, اقش تاراپىنان قارجىلاندىرىلىپ, ساياساتپەن اينالىساتىن قۇرىلىمداردىڭ قىزمەتىن توقتاتۋ شارالارى دا قاراستىرىلعان.
قۇجات ماتەريالدارى جاريا ەتىلەدى
ليۆيا ۇكىمەتى 270 ادامدى اجال قۇشتىرعان شوتلانديانىڭ لوكەربي قالاسىنداعى تەررورلىق ارەكەتكە قاتىستى قۇجاتتى جاريا ەتپەك. قۇجات ەندى ءبىر جىلدان سوڭ دايىن بولاتىن سياقتى. بۇل كەشە, ياعني تەررورلىق ارەكەتتىڭ 24 جىلدىعىنا بايلانىستى حابارلاندى.
اتالعان قۇجاتتىڭ جاريا ەتىلۋىنىڭ ءبىر جىلعا جۋىق كەشىكتىرىلۋىن ليۆيانىڭ ۇلىبريتانياداعى ەلشىسى ماحمۇد ناكۋا بيلىككە كەلگەن ليۆيا ۇكىمەتىنىڭ ەڭ الدىمەن ەلدەگى تۇراقتىلىق پەن قاۋىپسىزدىكتى قامتاماسىز ەتۋگە قول جەتكىزۋ قاجەتتىگىمەن بايلانىستىردى. ونىڭ ۇستىنە ەكى ەل اراسىندا قۇجاتتى جاريا ەتۋگە قاتىستى قازىرشە ەشقانداي كەلىسىم جاسالعان جوق. تەررورلىق ارەكەت 1988 جىلى 21 جەلتوقساندا جاسالعان ەدى. تەررورشىلار «بوينگ-747» ۇشاعىن لوندوننان نيۋ-يورككە ۇشىپ شىققاندا جارىپ جىبەرگەن بولاتىن.
ينتەرنەت ماتەريالدارى نەگىزىندە ازىرلەندى.