تاياۋدا قازاقستاننىڭ بوستاندىعى مەن تاۋەلسىزدىگى ءۇشىن كۇرەستە زارداپ شەككەن تۇلعالاردى اقتاۋ, ولاردىڭ قۇقىعىن قالپىنا كەلتىرۋ جانە ەرلىكتەرىن ماڭگى ەستە قالدىرۋدا بىرقاتار جۇمىستى قولعا العان «قاھارماندار» قوعامدىق قورىنىڭ نەگىزى ماقسات-مىندەتتەرى مەن قىزمەتىنىڭ باعىتتارىن كوپشىلىككە تانىستىرۋ بويىنشا ءىس-شارا ءوتتى.
وعان بەلگىلى جازۋشى الدان سمايىل, مەملەكەت تاريحى ينستيتۋتىنىڭ ديرەكتورى بۇركىتباي اياعان, ينستيتۋت ديرەكتورىنىڭ ورىنباسارى امانگەلدى قاشقىنباەۆ, بەلگىلى جۋرناليست, «ەگەمەن قازاقستان» رەسپۋبليكالىق گازەتىنىڭ شولۋشىسى جىلقىباي جاعىپار ۇلى, كاسىپكەر مارات نابيەۆ قاتىسىپ, ءسوز سويلەدى.
ءىس-شارا بارىسىندا قوردىڭ استاناداعى وكىلدىگىن ۇيىمداستىرۋ بويىنشا ماسەلەلەر تالقىلانىپ, قوردىڭ قامقورشىلىق كەڭەسىنىڭ توراعاسى بولىپ تانىمال مەملەكەت جانە قوعام قايراتكەرى ورالباي ابدىكارىموۆ سايلاندى. سونداي-اق ەلىمىزدىڭ تۇتاستىعى ءۇشىن كۇرەسكەن وڭىردەگى اقتالماعان جانە ۇلىقتالماعان اقتاڭداقتاردى اقتاۋ جانە ەرلىكتەرىن ماڭگى ەستە ساقتاۋ ماسەلەلەرى ءسوز بولدى.
ءىس-شارانى ۇيىمداستىرۋشىلاردىڭ ايتۋلارىنا قاراعاندا, تۇجىرىمدامانى ازىرلەۋ كەزىندە تانىمال عالىمدار مەن قوعام قايراتكەرلەرى, اكادەميكتەر – مامبەت قويگەلدى, ديحان قامزابەك ۇلى, بۇركىتباي اياعان, زيابەك قابىلدينوۆ, تالاس وماربەكوۆ, امانگەلدى ايتالى, سەيداحمەت قۇتتىقادام جانە وسى تاقىرىپپەن اينالىساتىن زەرتتەۋشىلەردىڭ دە كەڭەستەرى پايدالانىلعان.
قور وكىلدەرى كوپەتنوستى حالقىمىزدىڭ بۇگىنگى جانە بولاشاق ۇرپاعىن پاتريوتتىق رۋحتا تاربيەلەۋ, سونداي-اق, ەلباسىنىڭ «ماڭگىلىك ەل» ستراتەگياسى جانە «رۋحاني جاڭعىرۋ» مەن « ۇلى دالانىڭ جەتى قىرى» باعدارلامالارىن ىسكە اسىرۋدى يدەولوگيالىق جاعىنان قامتاماسىز ەتۋدە, وتانىمىزدىڭ ازاتتىعى مەن بوستاندىعى جولىندا جاسالعان ەرلىكتەرى مەن قاھارماندىق ىستەرىن ناسيحاتتاۋ مەن جاڭعىرتۋ جولىندا جۇمىس ىستەي بەرەتىندەرىن ايتتى.
ەسكە سالا كەتسەك, «قاھارمان» قوعامدىق قورىنىڭ پرەزيدەنتى – بەلگىلى زاڭگەر, قۇقىق قورعاۋشى, بۇل ماسەلەلەردى تەرەڭ بىلەتىن ازامات سابىر قاسىموۆ.