جاۋىنگەرلىك ۇرىس جوسپارلارىنا سايكەس «باتىس» وڭىرلىك قولباسشىلىعىنىڭ «قاراباتان», «ەسەت باتىر» جانە «ويماشا» پوليگوندارىندا بايلانىس بولىمشەلەرىنىڭ تاكتيكالىق-ساپتىق جاتتىعۋلارى وتۋدە.
وقۋ ءۇردىسىنىڭ وسى كەزەڭىندە اسكەري بايلانىسشىلار ۆزۆودتاردىڭ ۇيلەسىمدىلىگىن اياقتاپ, ۆزۆود قۇرامىنداعى جاۋىنگەرلىك تاپسىرمالاردى ورىنداۋعا كىرىسىپ كەتتى. بايلانىس روتالارىنىڭ كومانديرلەرى باعىنىشتى جەكە قۇرامنان نورماتيۆتەر مەن سىناقتاردى قابىلداپ, ولاردىڭ ءىس-قيمىلدارىنا ناقتى باعا بەردى. ۆزۆود جەكە قۇرامى دابىل بويىنشا ءىس-ارەكەتتەرىن پىسىقتاپ, دالالىق جاعدايدا بايلانىس قۇرالدارىن جايىپ-قۇراپ, بايلانىس ورناتۋمەن جانە بايلانىسپەن قامتاماسىز ەتۋمەن اينالىستى.
تاكتيكالىق-ارنايى جاتتىعۋلار - جاۋىنگەرلەردىڭ فۋنكتسيونالدىق مىندەتتەرىن ورىنداۋ ءادىسى بولىپ تابىلادى. بۇل رەتتە, بولىمشە كومانديرلەرى جەكە قۇرامدى وقىتۋمەن قوسا, ولاردى باسقارۋ بويىنشا دا تاجىريبە الادى, سونىمەن قوسا ۇرىستىڭ كەز-كەلگەن فورماتىندا بايلانىستى ورناتۋدىڭ قولايلى جانە ءتيىمدى تاسىلدەرىن ىزدەستىرەدى.
بۇگىنگى كۇنى, تاكتيكالىق-ارنايى ساباقتار - اسكەرلەردىڭ دالالىق وقىتىلۋى مەن ماشىقتىلىعىن ارتتىرۋداعى باستى قۇرالى رەتىندە قالىپتاسىپ قالدى. سەبەبى, وسى ساباقتار بارىسىندا جەكە قۇرام بار تەوريالىق بىلىمدەرىن پىسىقتاۋمەن قاتار, كەشەندى تۇردە بايلانىس ورناتۋ, ءتۇرلى كليماتتىق جانە بەيتانىس مەكەن جاعدايىندا بايلانىستى ورناتۋ ماشىقتىلىعىن ارتتىرادى.
«باتىس» وڭىرلىك قولباسشىلىعىنىڭ بايلانىسشىلارى ۇدايى جاۋىنگەرلىك كەزەكشىلىكتە ءجۇرىپ, تاۋلىكتىڭ كەز-كەلگەن ۋاقىتىندا اسكەرلەردى تۇراقتى جانە ساپالى بايلانىسپەن قامتاماسىز ەتۋگە ءازىر. بايلانىس – اسكەردى جانە ۇرىستى باسقارۋدىڭ باستى امالى مەن كوزى, سوندىقتان اسكەري بايلانىسشىلارعا ۇلكەن تالاپتار قويىلادى, اقپاراتتى جەدەل, ءبىر ۋاقىتتا بىرنەشە وبەكتىگە, ءتۇرلى اراقاشىقتىققا جەتكىزۋ بايلانىسشىلاردىڭ مويىنىندا ءاردايىم قالا بەرمەك.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى