سىرتقى ىستەر ءمينيسترىنىڭ ورىنباسارى ەرجان اشىقباەۆتىڭ باسشىلىعىمەن قازاقستان رەسپۋبليكاسىنىڭ دەلەگاتسياسى بۇۇ ادام قۇقىقتارى جونىندەگى كەڭەسىنىڭ (اقك) جوعارى دەڭگەيلى سەگمەنتى (جدس) جانە قارۋسىزداندىرۋ جونىندەگى كونفەرەنتسيا شەڭبەرىندەگى جۇمىسىن باستادى. بۇل تۋرالى ءسىم ءباسپاسوز قىزمەتى حابارلادى.
اقك جدس سەسسيا قاتىسۋشىلارىنىڭ الدىندا ءسوز سويلەۋ كەزىندە قازاقستاندىق ديپلومات بۇۇ قاۋىپسىزدىك كەڭەسىنىڭ مۇشەسى بولا تۇرا, ەلىمىزدىڭ جاھاندىق دەڭگەيدە ادام قۇقىقتارىن ساقتاۋعا, ىزگىلىكتىك كۇيزەلىسكە ىقپال ەتۋگە, جانجالداعى ايەل جانە بالا قۇقىقتارىن قورعاۋعا جوعارى نازار اۋداراتىندىعىن اتاپ ءوتتى.
ۇلتتىق دەڭگەيدەگى ادام قۇقىقتارىن قورعاۋعا قاتىستى قازاقستان دەلەگاتى دەموكراتيالىق قۇندىلىقتاردىڭ «قازاقستان 2050» ستراتەگياسىنا نەگىزدەلىپ, ەكونوميكالىق ىنتىماقتاستىق پەن دامۋ ۇيىمىنا مۇشە بولۋ جولىنداعى پروگرەستىڭ ينديكاتورى بولىپ تابىلاتىندىعىن ايتتى. ەلباسىنىڭ قازانداعى قازاقستان حالقىنا جولداۋىندا ۇلتتىق قۇقىق قورعاۋ جۇيەسىن ءارى قاراي نىعايتۋ, ازاماتتاردىڭ ساياسي, الەۋمەتتىك جانە ەكونوميكالىق قۇقىقتارىن بۇدان ءارى ىسكە اسىرۋ بويىنشا ءىس-شارالار باياندالعان. سونىمەن قاتار, ە. اشىقباەۆ بۇۇ ادامي قۇقىق مەحانيزمدەرىن ورىنداۋ بويىنشا وتكىزىلىپ جاتقان جۇيەلىك جۇمىس جونىندە حابارلادى.
جۇمىس تيىمدىلىگىن جوعارىلاتۋ جانە اقك قۇرىلىمدىق جۇمىسىنا جەتۋ ماقساتىندا قازاقستاندىق ديپلومات كەڭەس كۇنتىزبەسىندەگى بارلىق ماسەلەلەردى قاراستىرۋ بارىسىندا بەيتاراپتىلىقتى, تەڭ قۇقىلى ديالوگتى جانە تەڭگەرىمدى كوزقاراستى تانىتۋدىڭ ماڭىزدىلىعى اتادى. قازاقستان اقك جۇمىسىنداعى ءوز كوزقاراسىن العا جىلجىتۋ ماقساتىندا 2022-2024 جىلدار ارالىعىنا ءوز كانديداتۋراسىن كەڭەس مۇشەلىگىنە ۇسىندى.
قارۋسىزدانۋ جونىندەگى كونفەرەنتسيادا ءسوز سويلەگەن ە. اشىقباەۆ كونفەرەنتسيا ءۇشىن مەرەيتويلىق جىل – 40 جىل بۇرىن بۇۇ مۇشەلەرى قارۋسىزدانۋ جونىندەگى فورۋم قۇرۋ تۋرالى شەشىم قابىلداعانىن, «نەۆادا – سەمەي» حالىقارالىق يادرولىق قارۋعا قارسى قوزعالىسىنىڭ 30 جىلدىعىمەن جانە قازاقستاننىڭ يادرولىق قارۋدى تاراتپاۋ تۋرالى شارتقا قوسىلۋىنىڭ 25 جىلدىعىمەن تۇسپا-تۇس كەلەتىنىن اتاپ ءوتتى.
قازاقستان دەلەگاتسياسىنىڭ باسشىسى الەمدەگى كۇردەلى جاعدايدى, قارۋسىزدانۋدىڭ نەگىزگى ماسەلەلەرى بويىنشا جەتەكشى دەرجاۆالاردىڭ كەلىسپەۋشىلىكتەرىن ەسكەرە وتىرىپ, قازاقستان پرەزيدەنتى نۇرسۇلتان نازارباەۆتىڭ باستاماشىلىق ەتكەن بەلسەندىلىگىن اتاپ ءوتتى. جاھاندىق انتيادرولىق قوزعالىس كۇمان تۋدىرمايدى. ءمينيستردىڭ ورىنباسارى, سەنىمدى قالپىنا كەلتىرۋدە بارلىق مەملەكەتتەردىڭ ءوزارا بىرلەسىپ جۇمىس ىستەۋ ماڭىزدىلىعىن ەسكەرىپ, بۇل ءوز كەزەگىندە قازىرگى زاماننىڭ كوپتەگەن پروبلەمالارىن شەشۋدىڭ كىلتى بولىپ تابىلاتىنىن باسا ايتتى.
بۇل تۇرعىدا قازاقستان بۇۇ باس حاتشىسى انتونيۋ گۋتەرريشتىڭ «قارۋسىزدانۋ جونىندەگى كۇن تارتىبىنە» پراكتيكالىق ۇلەسىن قوسىپ, بارلىق يادرولىق قارۋسىز ايماقتار اراسىنداعى ىنتىماقتاستىق تەتىگىن قۇرۋ جانە استانادا بارلىق ايماقتار وكىلدەرىنىڭ كەزدەسۋىن وتكىزۋ جونىندەگى باستامانى قولدايدى.
سونداي-اق ءىس-شارا الاڭدارىندا ە. اشىقباەۆتىڭ بۇۇ ەۋروپالىق ەكونوميكالىق كوميسسيانىڭ اتقارۋشى حاتشىسى ولگا الگاەروۆامەن كەزدەسۋى ءوتتى. اتقارۋشى حاتشى 2018 جىلى ورتالىق ازيا ەلدەرىنىڭ ەكونوميكاسى ءۇشىن بۇۇ ارنايى باعدارلاماسىنداعى (سپەكا) قازاقستاننىڭ ءتيىمدى توراعالىق ەتۋىن جانە باعدارلامانىڭ 20 جىلدىعىنا وراي الماتى قالاسىندا سپەكا شارالارىن ءساتتى وتكىزگەندىگىن اتاپ ءوتىپ, ترانسشەكارالىق اعىن سۋلار مەن حالىقارالىق كولدەردى قورعاۋ جانە پايدالانۋ تۋرالى كونۆەنتسيا سەسسياسىن وتكىزگەندىگى, سونداي-اق جاھاندىق دەڭگەيدە قازاقستاننىڭ سۋ كونۆەنتسياسىندا توراعالىق ەتكەندىگى ءۇشىن العىس ءبىلدىردى.
ە. اشىقباەۆ جول قوزعالىسىنىڭ قاۋىپسىزدىگى, تۇرعىن ءۇي شارۋشالىعى مەن قالا دامۋى, كولىكتىڭ باسەكەگە قابىلەتتىلىگى, ەكولوگيالىق ساياسات, ساۋدانى رەتتەۋ بويىنشا بۇۇ ەەك ساراپشىلارى وتكىزگەن كونسۋلتاتيۆتىك جانە ساراپشىلىق جۇمىستارىن جوعارى باعالادى.