قازاقستاندىق جاس شاحماتشى, حالىقارالىق شاحمات فەدەراتسياسىنىڭ شەبەرى ءبيبىسارا اساۋباەۆانىڭ اناسى ليانا تاڭجارىقوۆا سپورتشىنىڭ قازاقستانعا ورالۋ سەبەپتەرىن ايتتى. بۇل تۋرالى قازاقپارات حابارلادى.
ء«بيبىسارانىڭ قازاقستاندا جەتىستىككە جەتۋى بىرنەشە سەبەپتەن مۇمكىن بولماي تۇردى. مەن ونىڭ اكەسىمەن اجىراسىپ كەتكەنمىن. ءبيبىسارانىڭ اعاسى ءبىزدىڭ العاشقى التىن مەدالىمىزدەن سوڭ ۇنەمى اياقتان شالا باستادى. بىراق, ءبىز قارسىلاسا المادىق. سەبەبى, ول كەزدە اعاسى بەدەلدى شەنەۋنىك بولاتىن. ءبىزدى شارالارعا شاقىرمايتىن بولدى. شاحماتتىڭ دامۋىنا قاتىستى كوپ شارالار ءبيبىسارانىڭ قاتىسۋىنسىز ءوتىپ جاتتى», - دەدى ليانا تاڭجارىقوۆا.
بۇل جاعدايلاردان سوڭ اناسى قىزىن الىپ, رەسەيدىڭ تۋىن جەلبىرەتۋگە كەتتى. ولاردى ماسكەۋ وبلىستىق شاحمات فەدەراتسياسىنىڭ پرەزيدەنتى سەرگەي نەستەروۆ شاقىرعان.
ء«بيبىسارا رەسەي قورجىنىنا العاشقى التىن مەدالدى سالعان سوڭ, ءبىزدىڭ «اعامىز» كەدەرگى كەلتىرە المايتىن بولدى. مەن وڭتايلى ءساتتى پايدالانىپ, قازاقستان پرەزيدەنتى نۇرسۇلتان نازارباەۆقا حات جازدىم. ءبىزدى قابىلداپ, قايتا ورالۋىمىزعا رۇقسات بەرىلدى. رەسەيدە بىزگە پاتەر بەرىلگەن. ونى جەكەشەلەندىرىپ الۋعا دا بولار ەدى. سپورت فورماسىن الىپ, سپورت مينيسترلىگىنەن قارجىلاندىرۋعا دا قول جەتكىزۋگە بولار ەدى. بىراق تەك قانا تولقۇجات اۋىستىرعان جاعدايدا. ءبىز تولقۇجات اۋىستىرمادىق! مەن ۆ.پۋتين بەرسىن دەگەن شارت قويدىم. بۇل ورىندالۋى مۇمكىن ەمەس شارت ەدى», - دەدى شاحماتشىنىڭ اناسى.
ونىڭ ايتۋىنشا, ءبيبىسارانىڭ كەلۋىنە ماڭعىستاۋ وبلىسىنان ۇسىنىس تۇسكەن. ولارعا اقش-تان دا شاقىرتۋ كەلگەن.
«2018 جىلدىڭ قاراشاسىندا اقش-قا گارري كاسپاروۆتىڭ سەسسياسىنا شاقىردى. ول جاقتا سپورتشىلارعا جاقسى جاعداي جاسالعان. ولاردا امەريكانىڭ كەز-كەلگەن جوو-سى گرانت بەرەدى, ءجۇرىپ-تۇرۋى تەگىن بولادى. اقش-تا ءوز تولقۇجاتىڭدى اۋىستىرماساڭ دا بولادى. ولاردا ونداي تالاپ جوق», - دەدى ليانا تاڭجارىقوۆا.
وسىنىڭ ءبارىن ويلانا كەلە سپورتشىنىڭ اناسى ءارى مەنەدجەرى قازاقستانعا كەلۋ تۋرالى شەشىم قابىلداعان.
«سىزدەر پاتريوت بولىپ كەتتى دەپ ويلايسىزدار ما؟ ءيا, ءدال سولاي. پاتريوتپىز. ءبىز ءوز ەلىمىزدەن باسقا ەشكىمگە كەرەك ەمەسپىز! مەن ومىردەن ساباق الىپ كەلە جاتىرمىن! مەن ەلباسى نۇرسۇلتان ءابىش ۇلىنا العىس ايتامىن! ول سپورتشى بالالاردى نازارىنان تىس قالدىرعان ەمەس. 2019 جىلدىڭ جاستار جىلى دەپ جاريالانۋى - پرەزيدەنتتىڭ كورەگەندىگىن بىلدىرەدى. ءبيبىسارا ەندى ءوز ەلىنىڭ لايىقتى قىزى بولۋى ءۇشىن بارىن سالاتىن بولادى», - دەدى اناسى.
سونىمەن قاتار, ليانا تاڭجارىقوۆا قر پرەزيدەنتى اكىمشىلىگىنىڭ جەتەكشىسى اسەت يسەكەشوۆكە, بەلگىلى بيزنەسمەن قايرات بورانباەۆقا, عالىمجان ەسەنوۆكە, ارىستانبەك مۇحامەدي ۇلىنا العىسىن ءبىلدىردى.
«بارلىعىڭىزعا قيىن ساتتە دەمەۋ بولعاندارىڭىز ءۇشىن العىس ايتامىن. بيبىساراعا باپكەرگە قارسى تۇرۋ وڭاي بولعان جوق. مەن تەك سوت بىتكەنىن كۇتتىم. مەن ءبىزدىڭ جەڭىسكە جەتەتىنىمىزگە سەنىمدى بولدىم. باپكەردىڭ بىزگە تاققان ايىپتارى جالعان بولاتىن. سوت ءادىل شەشىم شىعاردى. ادۆوكاتتارىمىز الەكساندر دوبروۆينسكيگە, مارينا دۋبروۆسكاياعا, يرينا بۋلكاتوۆاعا العىس ايتامىن! ولار - ناعىز ءوز ءىسىنىڭ ماماندارى! ەندى ءبيبىسارا اساۋباەۆا ءوز وتانىنىڭ نامىسىن بار ىنتاسىمەن قورعايتىن بولادى», - دەدى ول.
ايتا كەتۋ كەرەك, 2017 جىلدىڭ كۇزىندە رەسەي شاحمات قۇراماسىنىڭ باپكەرى ەۆگەني سولوجەنكين ءبيبىسارا اساۋباەۆانى الاياقتىق جاسادى دەپ ايىپتادى. ونىڭ ايتۋىنشا, ءبيبىسارا ۋرۋگۆايداعى الەم چەمپيوناتى كەزىندە ەلەكتروندى نۇسقاۋ بەرۋشىنى پايدالانعان دەگەن ءۋاج كەلتىردى. ول كەزدە ءبيبىسارا 14 جاسقا دەيىنگى قىزدار اراسىندا وينايتىن. كەيىنىرەك ماسكەۋ اپەللياتسيالىق سوتى اساۋباەۆانىڭ ءوز ار-ۇياتىن قورعاۋ تۋرالى ارىزىن قاناعاتتاندىردى. جاس سپورتشى جاقىندا قازاقستان قۇراماسىنا ەندى. ول ەندى استانادا 4-15 ناۋرىز ارالىعىندا وتەتىن الەم چەمپيوناتىندا باق سىنايتىن بولدى.